Двајца функционери на Федералните резерви сигнализираат дека креаторите на политиката можеби се блиску до завршување со зголемувањето на каматните стапки, иако еден од нив се воздржа да ги отфрли натамошните зголемувања додека инфлацијата не биде појасна на надолната патека.
„Можеби ни требаат дополнителни зголемувања и можеби сме многу блиску до местото на кое можеме да се задржиме значително време“, рече претседателката на бостонски Фед, Сузан Колинс, во четвртокот, за време на интервјуто за „Јаху“, пред одржувањето на годишниот симпозиум за економска политика на Фед на Канзас Сити во Џексон Хол. „Веројатно ќе треба значително време да се задржиме на ова ниво на каматните стапки, но каде е точно врвот не би сигнализирала во овој момент“, рече Колинс, која не гласа за политичките одлуки оваа година. „Можеби сме блиску, но можеби ќе треба да се зголеми уште малку“.
Сузан Колинс/Bloomberg Mercury
Колинс разговараше со повеќе медиуми во четвртокот, велејќи дека американската економија сè уште не забавила доволно за да ја стави инфлацијата на одржлива надолна траекторија, што сугерира дека Фед можеби ќе треба дополнително да ги зголеми стапките. Таа исто така рече дека е меѓу креаторите на политиката што очекуваат уште едно зголемување на стапката оваа година.
Патрик Харкер/Bloomberg Mercury
Говорејќи одделно во четвртокот, претседателот на Фед на Филаделфија, Патрик Харкер, го повтори својот став дека Фед треба да ги задржи каматните стапки на сегашното ниво додека го оценува влијанието врз економијата. „Во моментов мислам дека веројатно направивме доволно“, рече Харкер, член со право на глас на Федералниот комитет за отворен пазар што ја поставува политиката, за време на интервјуто за „Си-ен-би-си“ (CNBC).
Централните банкари од целиот свет се собираат во Џексон Хол на годишниот дводневен собир на Федералната банка на Канзас Сити. Инвеститорите ќе анализираат од симпозиумот какви индиции би имало за каматните стапки, кои Фед во јули ги подигна од 5,25 отсто до 5,5 отсто, највисоко ниво во последните 22 години. Нивните економски проекции објавени во јуни покажуваат дека од Фед се очекува да ги зголеми стапките барем уште еднаш оваа година. Но, инвеститорите во голема мера очекуваат Фед да ги задржи стабилни стапките до крајот на годината, според цените во фјучерс-договорите.
.webp){kind=icon}
