До 2027 година Кина ќе има мрежа на „сребрени возови“, со комплет услуги за постари лица

Кина планира да отвори мрежа на туристички возови опремени со медицински и установи за нега на стари лица, како дел од нејзините напори да создаде „сребрена економија“ и да ја отклучи потрошувачката моќ на своето сѐ постаро население.

Денеска министерствата за култура и туризам и за трговија, заедно со „Чајна стејт релвеј“ (China State Railway Group Co.), издадоа насоки за акцискиот план за лансирање возови специјално дизајнирани за туристи пензионери. Националната мрежа на „сребрен туристички воз“ со „разновидни туристички маршрути, широк спектар на туристички теми и сеопфатни услуги“ ќе биде изградена до 2027 година, се наведува во документот.

Долгата политика на еднодетни семејства уште од периодот на беби-бумот од 1960-тите и децениите потоа ја претворија Кина во една од популациите во светот што најбрзо стареат. Во согласност со статистиката од 2022 година на Националната здравствена комисија, секој петти човек во континентална Кина, каде што живеат околу 1,4 милијарда луѓе, е на возраст од 60 или повеќе години, а се очекува за една деценија една третина од популацијата да биде над 60 години.

Многу од овие постари лица се пензионираа со пензии и значителни заштеди, што значи дека тие се една од ретките групи луѓе што Кина може да ги искористи за да ги заживее трошоците во време кога долготрајната имотна криза и зголемените трговски тензии го одолжуваат економскиот раст.

Во планот може да учествуваат и меѓународни туристички компании и оператори на туристички возови, се наведува во документот. Националните и локалните фондови за развој на железницата исто така се охрабруваат и се очекува да го поддржат концептот.

Ќе се стимулираат и медицинските установи да работат со железничкиот оддел за да обезбедат медицински персонал и ресурси за итен третман.

Кина минатата година го претстави планот за сребрена економија, која во следната деценија се проценува дека ќе изнесува 4,1 трилиони долари за опслужување на популацијата што брзо старее и на која треба да се приспособат услугите, почнувајќи од достава на оброци до домови за стари лица и опции за забава.

Многу туристички компании се насочија кон постарите во Кина како целна група од која сакаат да привлечат што повеќе клиенти. Минатата година швајцарската „Викинг крузис“ (Viking Cruises) соработуваше со Шангајскиот универзитет за постари лица за да почне програма за нив што комбинира курсеви за историја и култура додека патуваат низ Азија и Европа.