Високите кирии во Њујорк ги туркаат станарите до раб на издржливост

Станарите во Њујорк се под сè поголем притисок, бидејќи цените на становите неуморно растат низ сите пет окрузи. Цените на кириите почнаа нагло да растат од 2022 година, кога луѓето што ја напуштија метрополата за време на карантинот поради ковид се вратија назад.

Овој ценовен бран ја нагласи хроничната криза со недостиг од пристапно домување за обичните граѓани на Њујорк, односно оние што не се милионери. Во градот во кој околу 70 проценти од жителите живеат под кирија, кризата со достапноста на станбениот простор е во сржта на претстојната трка за градоначалник. Ветувањето на Зохран Мамдани дека ќе ги замрзне цените на становите со регулирана кирија му помогна да ја добие демократската номинација летово.

Просечната огласена цена за изнајмување стан во Њујорк во трите месеци до крајот на јуни достигна 3.491 долар, што е пораст од 22 отсто во споредба со истиот период во 2019 година, покажуваат податоците на „Риалтор“ (Realtor.com). При таа цена, едно типично домаќинство во Њујорк, со годишен приход од 76.114 долари, троши 55 отсто од своите примања само за кирија – речиси двојно повеќе од долго воспоставената граница на прифатлива кирија, која изнесува 30 отсто од приходот.

Њујорчани притиснати од високите кирии

Уделот на приходите на домаќинствата потрошени за кирија варираше меѓу окрузите, меѓу кои предводи Бронкс, со речиси 82 проценти. Квинс е на дното со 49 проценти.

Во крајно конкурентниот Менхетн, просечната кирија за новозаклучени договори за станови по пазарна цена урна рекорди четири пати само во првата половина од годинава, според податоци од проценителската фирма „Милер Самјуел“ (Miller Samuel) и агенцијата за недвижности „Даглас Елиман“ (Douglas Elliman). И тоа пред да се соберат податоците за јули и август – месеците кога традиционално се изнајмува најмногу.

Но, дури и ако сите кирии низ градот се замрзнат, ќе бидат потребни години за да се надмине кризата со достапноста. Ако цените останат непроменети, а приходите растат по 3 отсто годишно, ќе треба да поминат цели две децении пред трошокот за кирија на едно просечно домаќинство да се сведе на прифатливи 30 отсто, покажуваат пресметките на „Риалтор“.