Индија и Кина водат разговори за повторно воспоставување на граничната трговија со локално произведени стоки, повеќе од пет години по нејзиниот прекин. Овој потег е најнов во низата бавни, но постојани напори на двете азиски земји за ублажување на долгогодишните тензии, велат официјални претставници во Њу Делхи запознаени со прашањето.
Според нив, двете страни предложиле трговијата да се обнови преку одредени пунктови на заедничката граница, а темата моментално е предмет на билатерални разговори. Изворите побарале да останат анонимни бидејќи разговорите сè уште се доверливи.
Кинеското Министерство за надворешни работи во четвртокот соопшти дека Пекинг е „подготвен да ги засили комуникацијата и координацијата со Индија“ за ова прашање. „Граничната трговија меѓу Кина и Индија долго време има значајна улога во подобрувањето на животот на жителите во пограничните области на двете земји“, се наведува во одговор на прашање од „Блумберг њуз“ (Bloomberg News).
Индиското Министерство за надворешни работи не одговори на барањето за дополнителни информации.
Повеќе од три децении, Индија и Кина разменуваа локално произведени стоки, меѓу кои зачини, теписи, дрвен мебел, сточна храна, грнчарија, лековити растенија, електрични уреди и волна, преку три одредени пункта по должината на 3.488-километарската (2.167 милји) спорна хималајска граница. Според најновите достапни владини податоци, вредноста на таа трговија е релативно мала и во 2017–2018 година изнесувала околу 3,16 милиони американски долари.
Пунктовите беа затворени за време на пандемијата на ковид-19, што се совпадна со наглото влошување на односите меѓу двете земји по судирите на границата во Хималаите, во кои загинаа 20 индиски и најмалку четворица кинески војници.
Планираното обновување на трговијата е уште еден знак дека односите меѓу двата соседа постепено се подобруваат, откако минатата година двете страни презедоа чекори за намалување на тензиите на границата. Како што објави „Блумберг њуз“ во вторникот, Кина и Индија планираат да ги обноват директните авионски линии уште следниот месец, а Пекинг ги ублажи ограничувањата за дел од пратките со ѓубрива кон Индија.
Премиерот Нарендра Моди се очекува во август да отпатува во Кина за првпат по седум години, за да присуствува на самитот на Шангајската организација за соработка, регионална безбедносна групација предводена од Пекинг, и да одржи билатерална средба со претседателот Шји Џјинпинг на маргините на настанот.
Нормализирањето на односите меѓу двете земји се одвива во услови на влошени односи меѓу Њу Делхи и претседателот на САД, Доналд Трамп, кој воведе царинска стапка од 50 отсто за индискиот извоз во САД, значително повисока од давачките што важат за другите земји во регионот.
.webp){kind=icon}
