Трамп најави извозни ограничувања и царини како одмазда за дигиталниот данок

Американскиот претседател Доналд Трамп се закани дека ќе воведе нови царини и ограничувања за извозот на напредна технологија и полупроводници како одмазда за дигиталните даноци на услуги наметнати од други земји, кои ги погодуваат американските технолошки компании.

Трамп во понеделникот објави на социјалните мрежи дека мерките „се целосно насочени кон нанесување штета или дискриминација врз американската технологија“ и дека „скандалозно, им даваат целосен имунитет на најголемите кинески технолошки компании“.

„Ова мора да престане, и тоа веднаш!“, напиша Трамп, без да спомене конкретни земји. „Доколку овие дискриминаторски мерки не бидат укинати, јас, како претседател на Соединетите Американски Држави, ќе воведам значителни дополнителни царини на извозот на таа земја кон САД и ќе воспоставам ограничувања на извозот на нашата високо заштитена технологија и чипови.“

Најновиот потег на претседателот во трговската конфронтација повторно ја зголемува неизвесноста околу царините за трговските партнери на САД. Веднаш откако Трамп воведе давачки по земји со десетици партнери во текот на месецов, тој вети нови тарифи на широк спектар увозни производи. Минатата недела најави дека и увезениот мебел ќе биде предмет на нови давачки.

Трамп долго време тврди дека даноците за дигитални услуги ги ставаат во неповолна положба американските технолошки гиганти како „Амазон“ (Amazon), „Алфабет“ (Alphabet), кој е сопственик на „Гугл“ (Google), и „Мета“ (Meta), сопственик на Фејсбук (Facebook). САД сè повеќе применуваат ограничувања на извозот на технологии, вклучувајќи  и напредни чипови од компании како „Енвидија“ (Nvidia) за вештачка интелигенција, кои ги сметаат за клучни за националната или економската безбедност.

Предупредувањето на претседателот дојде една недела откако САД и Европската Унија се согласија во заедничка изјава дека заедно ќе ги „надминуваат неоправданите трговски бариери“ и дека „нема да воведуваат царини на електронски преноси“. Унијата од 27 членки исто така потврди дека нема да воведе такси за користење мрежи.

Сепак, Европската Унија уште еднаш нагласи дека нема преземено обврска да ги измени своите дигитални регулативи, оставајќи го прашањето недопрено како можна алатка за идни трговски преговори, додека ЕУ се залага за бесцарински третман на виното и алкохолните пијалаци.

„Многу јасно ѝ ставивме до знаење на Америка дека измените на нашите дигитални регулативи - Законот за дигитални пазари и Законот за дигитални услуги - не се предмет на разговор“, соопшти ЕУ.

На почетокот на летото Канада се повлече од воведување дигитален данок само неколку часа пред да стапи во сила, откако Трамп ги суспендира трговските разговори со таа земја поради, како што го нарече, ‘скандалозен’ данок.

Други земји, вклучувајќи ја и Велика Британија, не се откажаа од својата давачка од 2 отсто на приходите од пребарувачи, услуги на социјални мрежи и онлајн пазари.

Овој притисок доаѓа во момент кога Организацијата за економска соработка и развој (ОЕЦД), која обединува 38 претежно богати земји, продолжува да работи на договор што би ги укинал дигиталните даноци во корист на меѓународен пакт за тоа како да се распределуваат профитите на мултинационалните компании за даночни цели. Но тој напор може да предизвика отпор од САД, кои би можеле да изгубат дел од правото на оданочување.

Во моментов нема коментари за веста. Биди прв да коментира...

Остави коментар