Закерберг побарал од Трамп да се спротивстави на европските дигитални даноци

Претседателот Доналд Трамп се закани дека ќе воведе „значителни“ царини за земјите што применуваат дигитални даноци, само неколку дена откако извршниот директор на „Мета платформс“ (Meta Platforms Inc.), Марк Закерберг, изразил загриженост околу овие давачки за време на средба во Белата куќа.

Коосновачот на Фејсбук (Facebook) ја посетил Белата куќа кон крајот на минатата недела, наведуваат лица запознаени со приватната средба, кои побарале да останат анонимни бидејќи деталите не се јавно објавени. Како што брифираат изворите, за време на разговорот Трамп и Закерберг дискутирале за заканата од даноци на дигиталните услуги, кои се наплатуваат на приходите што технолошките компании ги остваруваат од корисници во одредена земја.

„Мета“ најголемиот дел од своите приходи го остварува преку рекламирање насочено кон корисниците на Инстаграм (Instagram), Фејсбук (Facebook) и Вотсап (WhatsApp).

Неколку дена подоцна Трамп изјави дека дигиталните даноци и поврзаната регулатива ѝ наштетуваат и ја дискриминираат американската технологија, додека, како што рече, „целосно ги амнестираат најголемите кинески технолошки компании“. Претседателот додаде дека ги предупредува сите земји со такви даноци и дека ќе воведе „значителни“ царини и извозни ограничувања за американските полупроводници доколку „не се укинат овие дискриминаторски мерки“.

„Ќе им се спротивставам на земјите што ги напаѓаат нашите неверојатни американски технолошки компании“, истакна Трамп во понеделникот во објава на неговата социјална мрежа Трут сошл (Truth Social).

Коментарите на претседателот повторно ја разгореа долготрајната расправија со трговските партнери на САД, која започна многу пред минатонеделната средба со Закерберг. Американските официјални лица ја отворија оваа тема и во трговските преговори со други земји и со Европската Унија, тврдејќи дека дигиталните даноци неправедно ги погодиле американските технолошки компании како што се „Мета“, „Амазон“ (Amazon.com Inc.) и сопственикот на „Гугл“ (Alphabet Inc.).

„Претседателот Трамп повеќепати и доследно се спротивставувал на даноците за дигитални услуги и другите неправедни мерки против американските технолошки компании“, изјави портпаролот на Белата куќа, Куш Десај. „Администрацијата повеќепати и доследно ги отворала овие прашања во трговските преговори со други земји, вклучувајќи ја и ЕУ.“

Меѓу земјите што применуваат даноци за дигитални услуги се Франција, Италија, Австрија, Шпанија и Обединетото Кралство. Стапките и праговите се разликуваат во зависност од надлежноста.

Во соопштение, „Мета“ потврди дека двајцата се сретнале. „Марк Закерберг ја посети Белата куќа минатата недела за да разговара за домашните инфраструктурни инвестиции на ’Мета‘ и за унапредување на позицијата на САД како лидер во технологијата во странство“, соопшти компанијата.

Откако Трамп се врати на власт, Закерберг се обидува да ја придобие наклонетоста на претседателот, кој еднаш го нарече „криминалец“ извршниот директор на „Мета“ и се закани дека ќе го испрати во затвор. Тие напори вклучуваат темелна промена на политиките на компанијата за контрола и разновидност на содржината, како и неколку посети на Белата куќа и на одморалиштето на претседателот Мар-а-Лаго во Флорида, заедно со донација од 1 милион долари од „Мета“ за инаугурацијата на Трамп, на која присуствувал и самиот Закерберг.

Закерберг исто така го зголеми своето присуство во Вашингтон, трошејќи десетици милиони долари на две соседни куќи во близината на Воената опсерваторија, каде што живее потпретседателот Џ.Д. Венс, и ангажирајќи неколку сојузници на Трамп во својата компанија и во нејзиниот управен одбор.

Откако нивниот однос се подобри, Закерберг и Трамп повеќепати разговарале за разни теми, од вештачката интелигенција (ВИ) до европската регулатива за големите технолошки компании. Како што брифира изворот, за време на нивната средба во Белата куќа минатата недела Трамп и Закерберг повторно се навратиле на овие теми, дискутирајќи за ВИ, вклучувајќи ги и плановите за огромниот дата-центар на „Мета“ во рурална Луизијана, како и за тоа што двајцата го сметаат за претерана регулатива во Европа. 

Трамп јавно го пофали дата-центарот во Луизијана на состанок на кабинетот во вторникот, покажувајќи графички приказ што му го дал Закерберг, на кој проектот бил прикажан врз мапа на Менхетн за да се демонстрира неговата големина. Американскиот претседател изјави дека му било кажано дека дата-центарот ќе чини 50 милијарди долари и изрази восхит од неговиот обем.

Во моментов нема коментари за веста. Биди прв да коментира...

Остави коментар