Моди ги зацврстува врските со Кина и Русија спротивно на ставот на Трамп

Индискиот премиер Нарендра Моди го искористи своето прво патување во Кина по седум години за да ги обнови односите со моќниот сосед на Индија, истовремено настојувајќи да ги зајакне врските и со Русија, додека претседателот Доналд Трамп ги зголемува тензиите со Њу Делхи.

Моди во неделата имаше разговори со кинескиот претседател Шји Џјинпинг во Тијанџин на регионален безбедносен и економски самит, при што двете страни ветија дека ќе бидат партнери, а не ривали. Според официјалните соопштенија, тие разговарале за граничните прашања, обновување на директните летови и зголемување на трговијата.

Моди денеска се сретна со претседателот Владимир Путин на самитот во Тијанџин, во време кога односите меѓу двете земји се под лупа. Трамп јавно ја нападна Индија за купување нафта од Русија, обвинувајќи го Њу Делхи дека го финансира војувањето на Путин во Украина. Администрацијата на Трамп минатата недела воведе царини од 50 отсто на индиската стока наменета за САД, што е највисоко ниво во Азија, со цел да ја казни за тие енергетски набавки.

Потезите на Трамп ѝ покажале на Индија дека не може да се потпира на односите со САД, изјави Анил Тригунајат, поранешен индиски амбасадор во Јордан, Либија и Малта.

„Важно е за земји како Индија да ги најдат својот пат и своите партнери“, изјави Тригунајат за „Тајмс нау“ (Times Now) во неделата.

Моди разговараше со украинскиот претседател Володимир Зеленски пред неговото патување во Кина, повторувајќи го својот повик за мир. Зеленски изјави дека Индија е подготвена „да испорача соодветен сигнал до Русија и другите лидери“ за време на средбите на Моди во Тијанџин.

Моди последен пат разговарал со Путин по самитот на рускиот лидер со Трамп во Алјаска, во обид да се постигне мировен договор. Се очекува Путин да ја посети Индија подоцна годинава.

Соработниците на Трамп, како Питер Наваро, изјавија дека Индија профитира од војната, купувајќи нафта со попуст од Русија, која ја рафинира и им ја продава на купувачи во Европа и на други места. Високи претставници на Моди ги бранеа долгогодишните врски на Индија со Русија и тврдеа дека САД претходно ги охрабрувале овие набавки на нафта за да се спречи пад на глобалните цени на енергентите.

Наваро во неделата ги повтори своите критики, истакнувајќи во интервју за „Фокс њуз“ (Fox News) дека Индија не купувала многу нафта од Русија пред нејзината целосна агресија врз Украина, но дека сега го потхранува „рускиот воен апарат“. Тој додаде дека „Индија не е ништо друго освен пералница за Кремљ.“

„Моди е одличен лидер“, рече Наваро. „Не разбирам зошто се вплеткува со Путин и Шји Џјинпинг кога е најголемата демократија во светот.“

Трговската војна на Трамп со Кина и со Индија ги забрза напорите на двете земји да ги обноват врските, откако минатата година презедоа први чекори за намалување на тензиите по должината на нивната необележана граница од 3.488 километри (2.167 милји).

„Меѓународната ситуација е и променлива и хаотична“, рече Шји на средбата со Моди. Тој додаде дека е исправно Кина и Индија „да бидат пријатели со добрососедски и пријателски односи, партнери што си го овозможуваат успехот еден на друг, и змејот и слонот да танцуваат заедно“.

Џереми Чен, виш аналитичар во тимот за Кина и Североисточна Азија во „Евроазија груп“ (Eurasia Group), рече дека надминувањето на граничното прашање отклучило низа области во кои Кина и Индија можат да ја продлабочат соработката. Тој додаде дека внатрешните тензии меѓу двете земји не исчезнале.

„Заемната недоверба ќе остане во двете земји една кон друга и оваа средба меѓу Моди и Шји нема да го реши стратешкото ривалство“, рече Чен.

Моди настојува да ја зајакне индиската економија во услови на царините на Трамп, намалувајќи ги даноците за да го поттикне домашното трошење, додека бара нови пазари за индиската стока. САД се најголемиот извозен пазар на Индија, а економисти, како на пример од „Ситигруп“ (Citigroup Inc.), проценуваат дека царините ќе го намалат годишниот раст дури за 0,8 процентни поени.

Пред патувањето во Кина, Моди престојуваше два дена во Јапонија, каде што обезбеди ветувања за инвестиции до 10 трилиони јени (68 милијарди долари) од јапонскиот премиер Шигеру Ишиба. Инвестицијата е дел од поширок пакт за економска безбедност што опфаќа соработка во областа на полупроводници, критични минерали и вештачка интелигенција. Двете страни исто така започнаа нови иницијативи за поддршка на стартапи, како и партнерство во чистата енергија и вселената.

Во моментов нема коментари за веста. Биди прв да коментира...

Остави коментар