„Тивки несогласувања“ откриваат растечка отпорност во Фед кон намалувањата на Пауел

Претседателот на Федералните резерви, Џером Пауел, ги претстави како незначајни гласовите на несогласување со одлуката од средата повторно да се намалат каматните стапки, но низа посуптилни детали од состанокот открија колку е поделен централниот банкарски систем.

Пауел го протурка намалувањето од четвртина процентен поен не само спротивно на ставот на неколкумина со право на глас. Многу поголема група претседатели на регионалните банки на Федералните резерви, кои учествувале во дебатата, но оваа година не се во списокот гласачи, исто така сигнализирале дека се против намалувањето.

Овие пукнатини може да навестат што следува во 2026 година, кога новиот претседател можеби уште потешко од Пауел ќе успева да изгради консензус во Фед.

„Многу е невообичаено. Во моите повеќе од десет години работа поврзана со Фед не сум видел вакво нешто“, рече Патрик Харкер, кој беше претседател на Филаделфиската регионална банка на Федералните резерви сѐ до своето пензионирање во јуни.

Само двајца креатори на политики, претседателот на регионалната банка на Фед во Канзас Сити, Џеф Шмид; и претседателот на регионалната банка на Федералните резерви во Чикаго, Остин Гулсби, формално гласаа против, во корист на задржување на каматните стапки непроменети. Другото несогласување дојде од страна на гувернерот Стивен Миран, кој продолжи да повикува на поголемо намалување на каматата. Преостанатите негодувања стигнаа преку други канали.

Во кварталните проекции за каматните стапки што Фед ги објави заедно со одлуката, шестмина креатори на политики навеле дека референтната стапка на федералните фондови треба да ја заврши 2025 година во опсег од 3,75 до 4 отсто, ниво на кое беше пред намалувањето во средата, што јасно укажува дека не го поддржале потегот.

Бидејќи најмалку четворица, а можеби и сите шестмина од тие претставници немале право на глас на состанокот, некои набљудувачи на Федералните резерви високите проекции за каматни стапки во 2025 година ги нарекоа „тивки несогласувања“.

„Јас би бил едно од тие тивки несогласувања“, рече Харкер. „Мислам дека намалувањето е грешка.“

Имаше уште една скриена трага во материјалите што Федералните резерви ги објавија во средата. Во нив беше наведено дека, покрај официјалните претставници на состанокот, свои мислења доставиле и деловните лидери од управните одбори на регионалните банки на Фед.

Bloomberg

Тие доставуваат препораки за уште една краткорочна каматна стапка што ја утврдува Фед, која во практика секогаш се движи нагоре или надолу заедно со главната референтна стапка на централната банка.

Историски гледано, таа препорака служела како показател за сопствената позиција на претседателот на регионалната банка. Во овој случај само четири од 12-те регионални банки побарале намалување, што сугерира дека осуммина претседатели можеби биле против намалувањето.

Тоа гласање покажува дека наклонетоста кон задржување на каматните стапки непроменети била концентрирана кај претседателите на регионалните банки. Тие претставници често се залагале за повисоки каматни стапки отколку членовите на Одборот на гувернери на Федералните резерви во Вашингтон, кои се именуваат од Белата куќа и ги потврдува Сенатот.

Пауел на прес-конференцијата по состанокот рече дека моменталната состојба на економијата, со инфлација што сè уште е значително над целта од 2,0 отсто на Федералните резерви и со пазар на труд што покажува знаци на слабеење, е таква што несогласувањата се очекувани.

„Многу голем број учесници сметаат дека ризиците се движат во нагорна линија и за невработеноста и за инфлацијата, па што да направите“, рече Пауел. „Имате една алатка, не можете да правите две работи истовремено. Ситуацијата е многу предизвикувачка.“

Но, бидејќи толку многу креатори на политики преку своите „тивки и формални несогласувања сега јасно покажуваат дека ќе останат цврсти во ставовите, кого и да го избере претседателот Доналд Трамп за наследник на Пауел следната година, вклучувајќи го и фаворитот за функцијата, директорот на Националниот економски совет на Белата куќа, Кевин Хасет, веројатно ќе се соочи со тешкотии во усогласувањето на Комитетот за отворен пазар.

„Претседателот Пауел е долго време на функцијата и ужива голема почит во Комитетот за отворен пазар“, рече Келвин Тсе, раководител на стратегија и економија за САД во „БНП Парибас“ (BNP Paribas).

„Ако дури и под негово водство се појавуваат три несогласувања, тешко е да се замисли дека новиот претседател на Федералните резерви ќе успее полесно да постигне едногласност меѓу учесниците во Комитетот.“