Почнува притисокот врз приходите, Фед го најавува крајот на лесните приноси

За инвеститорите што вложуваат во приходи, деновите на лесни приноси исчезнуваат.

Во изминатите години инвеститорите добиваа одлична исплата играјќи на сигурно. Краткорочните американски државни обврзници носеа принос над 5,0 отсто – ретка можност да се оствари солиден поврат без врзување на капиталот или преземање ризик. За пензиските фондови, осигурителните компании и фондациите, тоа претставуваше јасен пресврт во однос на посткризниот период од една деценија со речиси нулти каматни стапки. Иако високата инфлација ги намалуваше реалните приноси, институциите што порано мораа да бркаат принос одеднаш добија простор да останат мирни.

Тој прозорец повторно се затвора. Фед се очекува повторно да ги намали каматните стапки оваа недела, како дел од циклусот на олабавување што веќе ги спушти приносите далеку под нивните постпандемиски максимуми. За портфолијата насочени кон приходи, лесните добивки од сигурните средства избледуваат. Во исто време, конвенционалните алтернативи – од корпоративни обврзници до глобални акции – изгледаат високо оценети, оставајќи помала заштита и помалку јасни опции за понатаму.

Притисокот се гради со месеци. Широкиот вкрстен раст на средствата, поттикнат од еуфоријата околу ВИ и одржливиот раст на САД, ги намали приносите низ јавните пазари. За инвеститорите што управуваат со долгорочни обврски, компромисите стануваат поостри: за да го задржат чекорот, портфолијата мора да го продолжат рокот на достасување, да се откажат од ликвидност или да преземат поголем ризик.

Јавните пазари нудат мала утеха. Дивидендните приноси на глобалните акции, следени преку индексот MSCI All Country World, остануваат близу најниските нивоа од 2002 година. Премиите на обврзниците со инвестициски рејтинг се само малку над најниските нивоа во повеќе децении, оставајќи многу мал простор за грешка доколку економските изгледи се влошат.

Bloomberg

Очекуваното намалување на каматните стапки од страна на Фед е потсетник дека „денешните приноси можеби нема секогаш да бидат достапни“, вели Џејмс Тарнер, кораководител на глобални фиксни приходи за ЕМЕА во „Блекрок“ (BlackRock) во Лондон. Пензиските и осигурителните клиенти се насочуваат кон високоприносни обврзници, долг од пазарите во развој, ААА-класифицирани обезбедени заемски обврски и инвестиции засновани на пренесени кредитни побарувања, со цел „да го зголемат приходот и да диверзифицираат“, додава тој.

Приватниот кредит, кој долго време се претставува како можност за диверзификација, веќе апсорбира стотици милијарди долари од институции што бараат приноси надвор од должничките инструменти што се тргуваат на берза. Иако тој апетит ослабна годинава поради загриженост околу квалитетот на зделките и заситеноста, пониските приноси на државните обврзници ќе им помогнат на застапниците на приватните средства полесно да го претстават својот предлог, бидејќи алокаторите повторно ја преиспитуваат својата структура на приходи.

„ЏП Морган“ (JPMorgan Asset Management) предвидува поголемо насочување кон приватните пазари за приходи. И покрај неодамнешните грижи, инвеститорите ќе бидат „наградени за дополнителниот ризик што го преземате во приватниот кредит“, вели Кери Крејг, глобален стратешки аналитичар за пазари во компанијата за управување со средства во Мелбурн.

И други инвеститори се согласуваат.

„Бидејќи каматните стапки паднаа, а премиите се намалија, поголем предизвик е да се добие разумна каматна стапка“, вели Ник Ферес, главен инвестициски директор во ВПАМ (Vantage Point Asset Management) во Сингапур. Фирмата минатата година лансира австралиски приходен фонд и неодамна додаде приватен кредит на селективна основа за да помогне во создавање принос, додава тој.

Засилената трка по принос никогаш навистина не запре. „Потрагата по принос“ стана кратенка за ерата на политиката на нулта каматна стапка - ЗИРП ( zero-interest-rate policy), но динамиката опстојуваше дури и кога прогнозите за повисоки каматни стапки подолго време се зацврстија, поддржувајќи ги приносите на државните обврзници. Обложувањата на средства за раст, еуфоријата околу ВИ и обновената склоност кон ризик ги задржаа тековите насочени кон изложеност со поголема волатилност. Како што сигурните приноси опаѓаат, стимулот повторно се гради за поместување по нагорниот ризичен спектар.

Bloomberg

Капитал исто така се влева во поспецифични сегменти на финансиските пазари.

Катастрофалните обврзници и хартии поврзани со осигурување, инструменти што го монетизираат ризикот од ретки настани, повторно привлекуваат институционална побарувачка поради нивните неповрзани исплати. „Виктори пајонир“ (Victory Pioneer CAT Bond Fund), лансиран вво почетокот на 2023 година, сега има 1,6 милијарда долари во средства. Фондот продолжува да привлекува инвеститори „што се соочуваат со предизвикот на приносите“, вели портфолио-менаџерот Чин Лиу.

Акциите нудат помала поддршка за портфолијата насочени кон приходи. Глобалните дивидендни приноси на акциите паднаа, бидејќи растечките цени на акциите, особено во технологијата, ги намалуваат приносите, додека компаниите сè повеќе им даваат предност на откупите наместо на дивиденди заради поголема флексибилност.

„Станува сè потешко да се пронајде принос“ кај глобалните акции, вели Данкан Бернс, директор за инвестиции за азиско-пацифичкиот регион во „Венгард“ (Vanguard) во Мелбурн. „Гледаме тренд на засилени откупи и изгледа дека дел од тоа доаѓа на сметка на дивидендите.“

Сепак, приносите не се движат по права линија. Иако Фед се подготвува за ново намалување на каматните стапки, приносите на државните обврзници со подолг рок на достасување се искачија на повеќемесечни максимуми, бидејќи трговците ги намалија очекувањата за олабавување во 2026 година. Додека краткорочните стапки остануваат тесно поврзани со политиката, долгорочното задолжување ги одразува растот, инфлацијата и фискалниот ризик. За инвеститорите насочени кон приходи, тоа значи дека добивките зависат од моментот и убеденоста исто колку и од сигналите на централната банка.

Неколку тактички поволни точки сè уште постојат. Упорната инфлација во Австралија поттикна очекувања за понатамошни зголемувања на каматните стапки. Во Обединетото Кралство приносите на државните обврзници со подолг рок на достасување пораснаа поради зголеменото владино задолжување. Но тоа се исклучоци од правилото: низ глобалните пазари, условите за приходи се стеснуваат.

„Пониските каматни стапки во САД создаваат потешка средина за инвеститорите насочени кон приходи“, вели Хиби Чен, аналитичар во „Вантеџ маркетс“ (Vantage Markets) во Мелбурн. „Падот на приносите на државните обврзници и речиси рекордно тесните кредитни премии ги туркаат инвеститорите подалеку по ризичниот спектар за сè помали награди.“