Стапката на инфлација во Соединетите Американски Држави (САД) продолжи да се движи во надолна линија, па растот на цените во август изнесува 8,3 проценти во споредба со истиот месец лани.
На месечно ниво, односно во август споредено со јули, цените речиси останале непроменети. Поточно, пораснале за само 0,1 отсто, покажуват податоците на американската статистичка агенција.
После рекордот остварен во јуни, од 9,1 проценти раст на цените, стапката на инфлација падна на 8,5 отсто во јули. Иако растот на цените дополнително забави, сепак стапката на инфлација и натаму е поголема од очекувањата на аналитичарите, кои предвидуваа дека на годишно ниво во август ќе биде 8,1 отсто.
Цените на храната во однос на минатата година се покачиле за 11,4 проценти, а во однос на јули се повисоки за 0,8 отсто. Цените на енергенсите, пак, паднаа за 5 проценти на месечно ниво, но и натаму се со висок плус од 23,8 проценти во однос на ланскиот август.
Федералните резерви на САД (ФЕД) од почетокот на годинава ја покачија референтната каматната стапка за вкупно 225 базни поени, па таа сега изнесува 2,5 проценти.
Последните два пати цената за задолжување беше зголемена за по 75 базни поени, а поголем дел од аналитичарите на Блумберг предвидуваат дека ќе биде донесена одлука за уште едно исто толкаво покачување на следниот состанок на ФЕД, закажан за 20 и 21 септември.
.webp){kind=icon}
