Спасувањето на планетата повеќе не е популарно поради Трамп

Повеќе од една деценија, инвестицискиот менаџер Гарвин Јабуш на своите клиенти им покажувал графикон за зголемените температури на Земјата кога ги презентирал инвестициските идеи, објаснувајќи им како нивната инвестиција може да помогне да се спаси планетата и да се заработат пари во тој процес. Деновиве тој повеќе не ги користи тие графикони и генерално избегнува да зборува за климатските промени.

„Се откажав од идејата дека некој веќе се грижи за тоа“, вели Јабуш, шеф на „Грин алфа инвестментс“, која управува со капитал од околу 300 милиони долари.

И тој не е единствениот инвеститор ориентиран кон климатските промени кој се воздржува од спомнување на глобалното затоплување и слични теми. „Парнасус инвестментс“, најголемата американска фирма за одржливи инвестиции, ја отстрани референцата од својата веб-страница дека нејзините средства се „без фосилни горива“.

Ретерирање од зелената агенда

„Енџин бр. 1“, мала активистичка компанија која доведе до промени во менаџментот на „Ексон мобил“ во 2021 година, го отстрани текстот од својата веб-страница дека корпоративните операции се „многу подобрени“ со инвестирање во работниците, заедницата и животната средина. Тие сега нагласуваат дека инвестираат во компании кои „го поттикнуваат иновациите и реиндустријализацијата на САД“.

Промената на пораките во согласност со променливите трендови на пазарот не е ништо ново. Но, по четири години пад на цените за зелените инвестиции и републиканските напади спонзорирани од нафтената индустрија поради наводното занемарување на фосилните горива, одржливите инвеститори се повеќе ја префрлаат својата реторика кон попрофитабилните сектори. Изборот на Доналд Трамп за претседател на Америка, жесток непријател на ЕСГ кој го нарече глобалното затоплување измама, беше последниот клинец во ковчегот.

Bloomberg Mercury

Паничното повлекување од страна на инвестициските фирми доаѓа по една година во која клиентите повлекле рекордни 20,1 милијарда долари од средствата поврзани со одржливи инвестиции, според истражувачите на „Морнингстар“.

„Парнасус“ е основан во 1984 година и управува со 46 милијарди долари. Компанијата со седиште во Сан Франциско е одговорна за речиси една третина од гореспоменатите повлекувања поради слаб поврат на инвестициите. Нивниот најголем фонд, „Парнасус кор еквити“, оствари поврат од 18,8 отсто минатата година, во споредба со растот на S&P 500 од 25 отсто. Фондот порасна за четири отсто, надминувајќи го главниот американски берзански индекс.

Повикувајќи се на одливите што ги објави „Морнингстар“, портпаролот на „Парнасус“, Џозеф Колинс нагласува дека овие повлекувања се неутрализираат со приливи кон производи кои не се јавни.

Уште во 2020 година, за време на бумот на инвестициите во ЕСГ, „Парнасус“ се опиша себеси како „најголемата компанија за ЕСГ фондови“, а нивната веб-страница беше полна со референци за зелената стратегија. Повеќето од тие референци веќе не постојат. Минатата година „Парнасус“ објави дека повеќе нема експлицитно да наведува во своите проспекти дека ги исклучува компаниите кои генерираат значителни приходи од екстракција, производство и рафинирање на фосилни горива.

„Збунување“ на инвеститорите

Колинс изјави дека терминот ЕСГ е „претерано искористен и неконзистентно се применува низ индустријата“, што доведува до недоразбирање и конфузија кај инвеститорите.

„Ја препознавме потребата за поголема јасност и прецизност“, рече тој. „Избравме да го користиме терминот „одржливост“ затоа што повеќе ни одговара, бидејќи опишува како висококвалитетните компании што ги бараме за нашите портфолија можат да ги задржат своите силни страни и долгорочен успех“.

Во 2020 година, се појави „Енџин бр. 1“ и со притисок го принуди „Ексон“, преку своите акционери, да инвестира во попрофитабилно дупчење и чиста енергија. Компанијата, основана од менаџерот на хеџ фондот Крис Џејмс, нагласи дека интересите на „Мејн Стрит“ и „Волстрит“ на крајот ќе се усогласат, создавајќи можности за соработка со компаниите за да се зголеми вредноста на акционерите.

Таа формулација е отстранета, а фондот минатиот месец објави дека соработува со „Шеврон“ на проект фокусиран на центрите за податоци, за кои е потребна огромна количина на енергија и вода за работа. Тие, исто така, рекоа дека договорот со“ Шеврон“ се однесува на распределба на капитал на сектор на кој „му треба драматично повеќе енергија“.

„Енџин бр. 1“ отсекогаш бил фокусиран на создавање вредност за акционерите, нагласува Ерик Белц, претседател на компанијата. Кампањата на „Ексон“ се фокусираше на управувањето со капиталот и распределбата. Не стануваше збор за идеологија „или фосилни горива или обновливи извори на енергија“, рече тој.

Во Колорадо, Јабуш, чиј фонд падна за четири отсто минатата година, рече дека става поголем акцент на иновациите и технологијата кога разговара со клиентите за инвестиции.

На пример, кога зборува за електрични возила, тој повеќе се фокусира на нивниот технолошки напредок отколку на нивниот низок јаглероден отпечаток. Во однос на соларните панели, тој посочува дека енергијата добиена од нив ќе биде поевтина од онаа од фосилните горива.

„Тоа е попозитивна и пооптимистичка порака“ за климатските промени, заклучува Јабуш.

Во моментов нема коментари за веста. Биди прв да коментира...

Остави коментар