text size
Аеродромот во Катанија на Сицилија ќе остане затворен до раните утрински часови во петок поради ерупциите на блискиот вулкан Етна, поради кои стотици летови беа откажани или пренасочени во текот на изминатата недела.
Сите пристигнувања и поаѓања од аеродромот на островот ќе бидат прекинати до два часот по локално време во петок, соопшти аеродромот во известување објавено доцна во четвртокот.
Околу 700 летови се погодени од 7 август, откако најактивниот вулкан во Европа ја почна својата најнова еруптивна активност. Аеродромот беше затворен во поголемиот дел од тој период, со што беше нарушено патувањето кон популарната летна дестинација. Се проценува дека се погодени повеќе од 100.000 патници, објави „Ла Република“.
Летовите беа пренасочени кон други аеродроми на островот, како Палермо, Трапани или Комизо, но Катанија е најпрометниот аеродром на островот, а и Комизо беше погоден од облаците од вулканска пепел. Некои патници беа принудени да спијат на аеродромот, додека други се префрлија на автобуси и возови, а недостигот од автомобили за изнајмување предизвика вртоглав раст на цените.
„Рајанер“ (Ryanair Holdings Plc), доминантниот авиопревозник во Катанија, на својата веб-страница соопшти дека патниците треба да очекуваат големи доцнења, откажувања и пренасочувања во четвртокот. „Виз ер“ (Wizz Air Holdings Plc), „Изиџет“ (EasyJet Plc) и „Ита ервејс“ (Ita Airways) се меѓу другите авиопревозници што сообраќаат на аеродромот во југоисточна Сицилија.
Честите ерупции на Етна многупати го попречувале авиосообраќајот во Катанија. Вулканската пепел покрива сè, од аеродромските писти до терасите и базените, а авионите што летаат во близина ризикуваат да дојде до затнување на чувствителните делови на моторите.
-Со помош на Тиаго Рамос Алфаро и Кејт Дафи
.webp){kind=icon}
