.webp){kind=icon}
Инфлацијата во еврозоната во мај се искачи на 8,1 проценти, што е повторно повисока стапка од очекуваната. Досега, и покрај знаците дека инфлацијата пушта корени, Европската централна банка (ЕЦБ) избираше да не прави никакви чекори. Одлуката да се почека имаше свои причини, но тие веќе не се убедливи.
Задачата на ЕЦБ, благо кажано е тешка, а веќе е извесно, станува уште потешка. Лидерите на Европската унија оваа недела изјавија дека се движат кон делумна забрана за увоз на руска нафта, што е всушност суштински чекор во обидот да го принудат режимот на Владимир Путин да ја прекине војната против Украина. Но, за ова има клучен недостаток. Новите ограничувања на увозот на енергија ќе предизвикаат уште еден шок на страната на понудата, одржувајќи ги цените во Европа високи и зголемувајќи го ризикот од стагфлација.
Дилемата на ЕЦБ е многу слична на онаа на Федералните резерви на САД, Банката на Англија и многу други централни банки: монетарната политика не може да направи сè, штетата предизвикана од пандемијата не е намалена и нема безболен начин да се одговори толку ефективно на руската агресија. Сепак, најдобро што можат, централните банки треба да воспостават рамнотежа меѓу поддршката на побарувачката и зауздувањето на инфлацијата. ЕЦБ го сфаќа ова погрешно. Одбра да стане надворешен набљудувач во својот пристап и тоа веднаш треба да се преиспита.
ФЕД и Банката на Англија ги зголемија каматните стапки и им сигнализираа на финансиските пазари дека каматите треба да се зголемуваат уште повеќе. Тие ги напуштија разговорите за „преодна“ инфлација пред неколку месеци и признаа дека требало порано да го сменат курсот. ЕЦБ сè уште многу заостанува. Сè уште не ја подигна својата основна каматна стапка, која сега изнесува минус 0,5 проценти. Нејзините најнови сигнали сугерираат дека првото зголемување ќе биде само четвртина поен и тоа не кога нејзините креатори на политики ќе се состанат следната недела, туку на состанокот после тоа, кон крајот на јули.
Со инфлација над 8 проценти, политиката на стапка на основната камата под нула номинално одржува извонредно и сè понепромислено ниво на дополнителна побарувачка. Превисокиот стимул кој се применува предолго ја зголемува опасноста од насилна корекција подоцна. Цената за избегнувањето на умерено забавување на политиката сега може да стане длабока рецесија во догледно време.
Секако, ЕЦБ мора да се бори со поголеми проблеми отколку тие на ФЕД или Банката на Англија. ЕУ е посилно зависна од руската енергија, така што компонентата на понудата на нејзиниот скок на инфлацијата е поголема. Нејзините основни нивоа на раст и вработеност се пониски, што дава помал простор за грешки. Економските услови исто така варираат во голема мера низ еврозоната, заедно со степените на толеранција за инфлацијата. (Цените се зголемуваат околу 5,8 отсто годишно во Франција, 8,7 проценти во Германија и 20,1 отсто во Естонија.) Правилната монетарна политика во една земја всушност нема да одговара на случајот во друга.
Исто така, ЕЦБ треба да го менаџира фактот дека координирањето на фискалната политика меѓу 19-те членки на еврозоната е тешко. Некои имаат хронични проблеми со јавниот долг, сега надополнети со зголемено трошење поврзано со пандемијата. Ова ги прави повисоките каматни стапки поопасни и потешки за проценка ефектите кои треба да се очекуваат.
Разбирлива е неподготвеноста на ЕЦБ да ги отстрани стимулациите. Но, рамнотежата на ризикот се промени. Изненадувачките нови бројки на стапката на инфлација оправдува - а пошироката ситуација бара - директно ресетирање. Без дополнително одложување, ЕЦБ треба да започне намерни напори за нормализирање на политиката, почнувајќи со зголемување на каматата од 50 базични поени следната недела, а не следниот месец.
