Пазарот го кажа своето: очекувањата се дека борбата на Федералните резерви (ФЕД) против инфлацијата е при крајот. Претседателот на ФЕД, Џером Пауел, навести дека зголемувањата на каматните стапки се приближуваат до врвот. Но инфлацијата и натаму, според последните податоци, беше на шест проценти, а Пауел инсистира на тоа дека ФЕД останува посветена на постигнување на целта од два отсто.
Тој може да мисли - како и некои други економисти - дека ФЕД веќе направи доволно. На крајот на краиштата, на зголемувањето на каматните стапки можеби и му треба период од неколку години за неговите ефекти да минат низ економијата и да предизвикаат намалување на инфлацијата. Актуелните банкарски превирања би можеле да бидат првиот знак дека ова почна да функционира. Прогнозите се оддалечија од можноста за помеко сценарио за економијата и сега повторно предвидуваат непосредна рецесија, која треба да ги закова последните клинци во ковчегот на инфлацијата.
За жал, не можеме да сметаме на рецесијата за да го решиме нашиот проблем со инфлацијата. ФЕД веројатно има уште за работа ако е сериозна во намерата да ја врати инфлацијата на два отсто.
Начинот на кој монетарната политика влијае врз економијата и инфлацијата не е добро разбран. Построгата монетарна политика на ФЕД ја намалува понудата на пари, па се претпоставува дека тоа ќе ја намали инфлацијата само затоа што има помалку пари во оптек. Но, како што објасни поранешниот претседател на ФЕД во Њујорк, Бил Дадли, штом ФЕД почна да плаќа камата на банкарските резерви што ги држи, понудата на пари стана помалку важна, бидејќи врската помеѓу понудата на пари и кредити беше прекината.
Сепак, се претпоставува дека повисоката каматна стапка ќе го намали економскиот раст бидејќи ги прави кредитите поретки и поскапи. Тоа значи помалку инвестиции, повеќе пропаднати бизниси, помалку луѓе што купуваат или градат домови и, на крајот, поголема невработеност. Во оваа фаза, работниците добиваат помалку покачувања или воопшто не добиваат, а луѓето генерално се попесимисти и трошат помалку. Така, побарувачката паѓа и ја намалува инфлацијата. Или барем така се мисли.
Овде има многу променливи и, како што покажаа последните три години, работите не секогаш одат во посакуваната насока. Постои можност да се случи рецесија, а сепак да имаме висока инфлација - во суштина враќање на стагфлацијата од 1970-тите. До ова може да дојде ако рецесијата дојде со уште еден шок во понудата, како што е пад на трговијата или зголемување на цените на енергијата. Некои економисти тврдат дека стагфлацијата од 1970-тите била резултат на експанзивна монетарна политика, што значи дека ако рецесијата ја натера ФЕД да ги намали каматните стапки или да го рестартира квантитативното олеснување пред инфлацијата да се смири, може да завршиме со висока инфлација и рецесија.
Друга можност е рецесијата да ја намали инфлацијата донекаде, но не многу. Економистот Џејсон Фурман неодамна истакна дека последните неколку рецесии ја намалиле инфлацијата само помеѓу 0 и 1,9 процентен поен. Во моментов е потребно инфлацијата да падне за повеќе од 2,5 поена за да се вратиме на целта на ФЕД. Се разбира, секој пад е различен и колку е посилен, толку повеќе ја намалува инфлацијата.
Но не знаеме точно колку длабока треба да биде рецесијата за да се поправи стапката на инфлација. Поминаа повеќе од 40 години откако имавме сериозна инфлација и оттогаш се променија многу работи. Економистите проценуваат дека во минатото обично бил потребен пад на БДП од два или три отсто за да се намали инфлацијата за еден процентен поен. Но бидејќи врската меѓу стапката на невработеност и инфлацијата е ослабена од 1980-тите, денес можеби е неопходна многу посилна контракција. ФЕД претпоставува дека невработеноста ќе мора да достигне врв на 4,6 проценти за инфлацијата да се намали на два процента. Но ова изгледа многу оптимистички. Ако претходните бранови на инфлација се некаков водич, ќе биде потребен многу поголем пад на БДП за да се намали инфлацијата на два процента. Поранешниот министер за финансии Лери Самерс минатата есен тврдеше дека невработеноста ќе мора да порасне на шест проценти.
Значи, мала рецесија или сценариото со низок раст што ФЕД се обидува да го постигне, веројатно нема да биде доволно за да се исполни целта од два процента. Тоа немаше да биде доволно во 1980-тите, а има причини да се верува дека сега ќе биде уште помалку ефикасно, бидејќи, иако кредитната контракција ќе наштети, економијата е сè уште доста отпорна. Билансите на домаќинствата и компаниите и натаму се во добра форма од пандемијата. Многу домаќинства имаат ниски стапки на хипотека и нивните одлуки за домување веќе не се многу чувствителни на стапките.
Џером Пауел
Bloomberg
Друга причина зошто рецесијата предизвикана од ФЕД може да не функционира е тоа што ФЕД изгуби дел од својот кредибилитет. Повисоките стапки имаат поголемо влијание кога луѓето веруваат дека ФЕД има моќ и решителност да ја намали инфлацијата. Кога луѓето очекуваат инфлацијата да биде ниска, тие не ги зголемуваат цените и не бараат големи покачувања на платите. Но ако луѓето сè уште очекуваат висока инфлација, рецесијата - особено ако е мала - нема да биде доволна да ја намали.
Еден знак на надеж е дека показателите од пазарот на обврзници укажуваат на пониска инфлација. Но пазарот на обврзници има ужасна историја на предвидување на инфлацијата. Фактот дека пазарите очекуваат намалување на каматните стапки кога гувернерите на ФЕД сè уште зборуваат за зголемувања сугерира дека кредибилитетот на ФЕД е на ниско ниво.
Ако е така, рецесијата може да ја оштети економијата и да ги остави луѓето без работа, без да се случи многу во поглед на намалување на инфлацијата. ФЕД ќе биде во уште потешка позиција: или ќе мора да нанесе повеќе болка или ќе треба да научи да живее со повисока инфлација.
.webp){kind=icon}