Резултатите на „Фолксваген“ за третиот квартал годинава прикажуваат диптих од структурни (стратегиски) предизвици и релативно стабилна финансиска позиција. Структурните предизвици лежат во намалувањето на приходите, поради помалиот број на испорачани и продадени количества. Поточно, приходите на ниво на групацијата „Фолксваген“ во првите девет месеци од 2024 година се намалени за 2,8 отсто во споредба со истиот период минатата година, а продадените количества се намалени за 4,4 отсто. „Фолксваген“ успеа некако да го надомести намалениот обем на продажба со повисоки цени на производите и со тоа да го забави падот на приходите. Сепак, профитабилноста доби силен удар и нето-добивката (добивката по оданочување) падна за 30,7 отсто во првите девет месеци од 2024 година. Трошоците за продадените производи на ниво на целата групација (COGS) покажаа нематеријален раст (0,02 проценти), фиксните трошоци исто така влијаеја на профитабилноста (признаени во рамките на оперативниот резултат). Овде првенствено стануваше збор за трошоците за реструктурирање во апсолутен износ од 2,2 милијарди евра, а кои беа насочени кон субјектите „Батери сел груп“ (Battery cell Group) и „Батери груп партнершипс“ (Battery Group Partnerships), кои се фокусираат на развојот на батериите, како и трошоците за соработка со „Ривиан“ (во која веќе се инвестирани околу една милијарда евра, а во зависност од успешноста на операцијата се очекува инвестиција до 4 милијарди евра).
Падот на профитабилноста е појасен ако го дисецираме портфолиото на производи на „Фолксваген“. „Клучните брендови“ - во кои спаѓаат „фолксваген“, „шкода“, „сеат“ (и кои изнесуваат 43 отсто од приходите за првите девет месеци од 2024 година),- бележат незначителен раст и ниска оперативна маржа од 4,4 отсто. „Клучните брендови“ долго време беа стратегиска „квака 22“ за „Фолксваген“, со оглед на нивните ниски стапки на раст, ниските маржи, но голем удел на приходите. Од друга страна, групите со поголем профитен потенцијал забележаа двоцифрен пад на бројот на испорачани возила и едноцифрен пад на приходите. Групацијата „Прогресив брендс “ („ауди“, „бентли“, „ламборгини“ и „дукати“), со оперативна маржа од 4,5 отсто (преполовена од 9,1 отсто во првите девет месеци од 2023 година) трпи пад на количеството од 15 отсто и пад на приходите од 8 отсто. „Спортско-луксузната“ групација, во која спаѓа и „порше“, има најголема оперативна маржа - 14,6 отсто во првите девет месеци од 2024 година, а приходите се намалени за 7 отсто. Накратко, „Фолксваген“ доживеа негативен производствен микс во овој квартал, односно не успеа да пласира поскапи, премиум производи - на ниво на групација, оперативната маржа падна за 1,5 процентни поени.
Bloomberg Mercury
Во соопштението за печатот, „Фолксваген“ гордо го истакна здравиот раст на нето-готовинскиот тек во автомобилската дивизија (од 38 проценти), но овој раст доаѓа од ниската основа постигната во првата половина од годината (кога нето-паричниот тек беше ниско негативен), така што кумулативниот ефект е негативни 33,6 отсто (за првите девет месеци од 2024 година). Нето-готовинскиот тек на ниво на групација има негативен предзнак и изнесува 5,9 милијарди евра. Ставката што привлекува внимание во извештајот за парични текови се резервите, кои се зголемени за 25 проценти во автомобилскиот сегмент. Поради моментално задушената побарувачка, овие резерви може да биде проблематично да се претворат во оперативен готовински тек. Скрупулата на инвеститорите дефинитивно ќе биде поврзана со способноста на „Фолксваген“ да реализира оперативна готовина од резервите, особено пред трошоците за реструктурирање, воведувањето нови модели и развојот на технологии (капиталните инвестиции се зголемени за 12 проценти во првите девет месеци од 2024 година). Крајниот резултат е дека готовината на крајот на периодот на ниво на групација се зголеми за 12,5 отсто, најмногу благодарение на сегментот за финансиски услуги (лизинг) на „Фолксваген“, кој забележа раст од 52,1 отсто. Сепак, клучниот автомобилски сегмент (кој генерира 85 отсто од приходите за „Фолксваген“) забележа пад на готовината за 10,6 отсто (во првите девет месеци од 2024 година). Лизингот во „Фолксваген“ доби на значење (во првите девет месеци од 2024 година беа потпишани 15,2 отсто повеќе договори отколку во истиот период во 2023 година) поради пофлексибилните услови (во споредба со купувањето возила), особено за електричните автомобили, кои имаат високи трошоци за набавка за потрошувачот. Исто така, приходите од лизинг се помалку зависни од производствените циклуси и прекините во синџирите на снабдување и, во принцип, се посигурни за „Фолксваген“.
Bloomberg Mercury
Вниманието на инвеститорите во овој квартал беше најмногу кон трошоците (односно профитабилноста), поради конфликтот на интереси на „Фолксваген“ со државата, регулативите на ЕУ и синдикатите. Имено, бидејќи главниот збор во индустријата е инфлацијата на трошоците, „Фолксваген“ апелира државата да ги зголеми субвенциите за поттикнување на побарувачката на електрични автомобили, а во исто време размислува за затворање на три германски фабрики, илјадници отпуштања и раскинување на договорите со работниците. Затворањето на германските фабрики има фискална смисла (бидејќи тие се меѓу најскапите во синџирот на снабдување на „Фолксваген“), но има сериозни импликации за германската економија. Според процените на „Блумберг интелиџенс“ (Bloomberg Intelligence), затворањето на фабриките може да му донесе заштеди на „Фолксваген“ од 2,5 милијарди евра годишно (или 1.900 евра по продаден автомобил во Европа). Понатамошните најавени мерки вклучуваат намалување на платите за 10 отсто за 140.000 работници. Како дополнување на проблемите, „Фолксваген“ мора да го зголеми производството на електрични автомобили (кои се помалку профитабилни од моторите со внатрешно согорување на „Фолксваген“), бидејќи тие се најизложени на казни за емисија на CO2 од ЕУ.
За „Фолксваген“ ситуацијата не изгледа добро ниту во Кина (каде што електричните автомобили се пошироко прифатени отколку на европскиот пазар). Кина има удел од 13,3 отсто во приходите на „Фолксваген“, а во првите девет месеци приходите на овој пазар паднале за 12,2 отсто. Работата на „Фолксваген“ во Кина дополнително е загрозена од најавените „одмазднички“ тарифи на кинеските производители, на сметка на тарифите што ги објави ЕУ за автомобилите произведени во Кина. „Фолксваген“ досега уживаше пониски оперативни трошоци и други стимулации во Кина, а потенцијалните тарифи може сериозно да ја загрозат конкурентноста на неговиот бизнис во Кина, каде што конкуренцијата е веќе жестока, а потрошувачите сѐ повеќе се приклонуваат кон домашните брендови.
Очекувања
Во кварталот што следува очекуваме продолжување на стагнантниот тренд на испорачани возила и приходи на „Фолксваген“, како и континуиран притисок врз профитабилноста. Долгорочните очекувања зависат од подобрувањето на основите на побарувачката за електрични возила, како и од потенцијалниот ефект од најавените потези на „Фолксваген“ за ограничување на трошоците. Целите на „Фолксваген“ за 2024 година - 320 милијарди евра приход, две милијарди евра нето-готовински тек (за автоодделот) - не влеваат доверба кај инвеститорите. Проектираните приходи се всушност на минатогодишното ниво. Гледајќи ја стратегиската позиција на „Фолксваген“, нивните скромни прогнози за приходите и хиперфокусирањето на намалување на трошоците имаат смисла. Борбата се води на повеќе фронта. Падот на побарувачката за електрични возила во Европа, како и разнишаната позиција на клучниот пазар на Кина, има сериозни импликации врз профитабилноста на „Фолксваген“, а на крајот и врз ликвидноста. Досега „Фолксваген“ ги одржуваше приходите преку повисоки цени, но постои закана дека поскапувањето ќе го засити пазарот.
.webp){kind=icon}