„Порше“ (Porsche AG) ја забавува стратегијата за електрични возила откако вложувањата што требаше да донесат раст ги намалија профитните маржи и ѝ наштетија и на матичната „Фолксваген“ (Volkswagen AG).
Компанијата што го произведува моделот 911 се откажа од плановите за идно луксузно теренско возило (СУВ) на батерии и најави дека ќе се насочи кон нови модели со мотори на внатрешно согорување и хибриди за да ја зајакне понудата. Овој пресврт ќе ја намали оперативната добивка за 1,8 милијарда евра (2,1 милијарди долари) и ги натера и „Порше“ и „Фолксваген“ да ги намалат деловните прогнози за годината.
Станува збор за уште еден удар за германската автоиндустрија, која веќе се соочува со високи трошоци и намалена продажба. Акциите на „Порше“ во Франкфурт паднаа за речиси 6,5 отсто, што значи дека од почетокот на годината бележат пад од околу 27 отсто. Акциите на „Фолксваген“ се намалија за 3,4 отсто.
Прочитај повеќе
Акциите на БЈД паднаа по извештајот дека Ворен Бафет го продал сиот свој удел
Фирмата на Бафет ги држеше акциите повеќе од 15 години, откако првпат купи 225 милиони акции во септември 2008 година.
пред 5 часа
Ќе успее ли автоиндустријата да ги помести климатските цели - Брисел е на потег
Најголемите производители на автомобили во Европа в петок на состанок во Брисел ќе бараат реални климатски цели.
11.09.2025
Ова се најлуксузните електрични кампери, кои практично возат сами
Новите модели се насочени кон помладите богати клиенти што бараат удобност без бучава и емисии.
30.08.2025
Производителите на возила од ЕУ велат дека целосна транзиција кон ЕВ не е изводлива
Европските производители на автомобили велат дека планираната забрана на ЕУ за мотори со внатрешно согорување повеќе не е реално изводлива во зададениот рок.
27.08.2025
Германските производители, како и нивните европски конкуренти „Стелантис“ (Stellantis NV) и „Рено“ (Renault SA), се борат со побарувачка за електрични возила пониска од очекуваната, и покрај тоа што вложија милијарди евра во технологијата. „Порше“ тешко успева да ги исполни очекувањата по влезот на берзата во 2022 година, при што забавувањето во Кина и американските царини дополнително влијаат негативно. Најавата за пониска добивка во петокот беше четврти пат годинава компанијата да ги намали своите прогнози, а цената на акциите падна толку ниско што „Порше“ се повлекува од DAX, референтниот индекс на Германија.
„Порше“ ја намали прогнозата за профитната маржа
Купувачите на автомобили „речиси не гледаат вредност во луксузните електрични возила“, вели Матијас Шмит, независен автомобилски аналитичар со седиште кај Хамбург. „’Порше’ сега го сфати тоа и повторно се фокусира кон моделите со мотори на внатрешно согорување, кои носат високи маржи.“
Дел од проблемот се должи на тешкотиите на „Порше“ во Кина, најголемиот автомобилски пазар во светот, каде што луксузната потрошувачка е ослабена, а локалните производители предводени од БЈД (BYD Co.) доминираат со електрични возила. Компанијата е исто така меѓу најпогодените од царините на претседателот Доналд Трамп во САД – најголемиот пазар за „Порше“, каде што се потпира исклучиво на увоз. Проблемите на производителот на спортски автомобили сè повеќе се одразуваат и врз матичната „Фолксваген“, која како прва меѓу традиционалните производители се насочи кон електрични возила, но веќе се повлекува од некои од поамбициозните планови за батерии и спроведува голема реорганизација за намалување на трошоците.
Во петокот компанијата предупреди дека ќе запише непаричен трошок од околу 3 милијарди евра поврзан со промените на „Порше“ и ја намали својата прогноза за оперативна профитна маржа годинава на 2 до 3 отсто, од претходната најава за најмногу 5 отсто.
Сепак, „Фолксваген“ годинава постигна одреден напредок кај електричните возила. Во Европа продава повеќе од „Тесла“ (Tesla Inc.), „Стелантис“ и БЈД и претстави неколку попристапни модели на батерии за дополнително поттикнување на побарувачката. Производителите во регионот би можеле да добијат и регулаторно олеснување, откако политичари, меѓу кои и германскиот канцелар Фридрих Мерц, ја поддржаа оцената на индустријата дека планот на Европската Унија за продажба исклучиво на нови електрични возила за десет години е нереален.
Но луксузните брендови на „Фолксваген“, кои порано ги зголемуваа профитните маржи, сега се соочуваат со проблеми. Групацијата „Ауди“ (Audi), во која се вклучени и „Бентли“ (Bentley), „Ламборгини“ (Lamborghini) и производителот на мотоцикли „Дукати“ (Ducati), во јули ја намали прогнозата за годината, откако испораките паднаа на повеќето поголеми пазари во првата половина, вклучувајќи ги и Северна Америка и некогашниот носител на профит, Кина.
„Порше“ смени повеќе раководители и ги намалува трошоците, вклучувајќи и отпуштања, за да се врати на вистинскиот колосек. Компанијата исто така се откажа од планот да произведува сопствени батерии поради слабата побарувачка за електрични возила.
Сепак, најновите проблеми вршат дополнителен притисок врз Оливер Блуме, кој е извршен директор и на двете компании, да се повлече од функцијата во „Порше“ и да му овозможи на некој друг да го реорганизира брендот. Потрагата по нов лидер веќе започна, објави „Блумберг њуз“ (Bloomberg News) минатиот месец, при што сопственичкото семејство Порше-Пиех води разговори со потенцијални кандидати.
„’Порше“ повеќе од две години ги разочарува инвеститорите“, напиша аналитичарот на „Чити“ (Citi) Харалд Хендриксе.
„Тешко е да се заклучи дека тие разочарувања завршиле.“
Автопроизводителот претходно предвидуваше од 5 до 7 отсто за 2025 година
Bloomberg
.webp){kind=icon}
Во моментов нема коментари за веста. Биди прв да коментира...