ББА коментар: Како ќе вози „Ферари“ по ударот од САД

Една од опциите за „Ферари“ е да ги забрза испораките во САД пред да стапат во сила официјалните тарифи или да ги одложи по планираното воведување на тарифите (особено за ограничениот број суперавтомобили од повеќе милиони долари – „дејтона СП3“ со просечна продажна цена во 2024 година од 1,6 милиони евра и „монца СП11“). Она што најмногу би ја задоволило компанијата е да ги пренасочи испораките во други региони и на тој начин да ги заштити нејзините резултати од пад.

„Ферари“ со години бележи двоцифрени стапки на раст на приходите (2024 – 11,8 проценти, 2023 – 17,2 проценти, 2022 – 19,3 проценти), поттикнат од промените на цените бидејќи промените во количините на продадените производи не надминуваат два процента во последните две години (во 2024 година, растот на продадените автомобили беше 1,7 проценти, а една година претходно 1,5 проценти). Од стабилноста на ЕБИТДА маржата од 38,1 проценти, можеме да заклучиме дека „Ферари“ го префрли зголемувањето на трошоците на клиентите. Потврда за тоа е постојаноста на бруто маржата од околу 50 отсто за изминатите две години.

Загриженоста на инвеститорите за одлуката на Доналд Трамп за автомобилскиот сектор директно се одрази на цените на акциите на компанијата. Гледајќи пошироко во автомобилскиот сектор од почетокот на годината досега во Европа „Стелантис “ загуби 2,8 проценти, „Фолксваген“ падна за 3,1 проценти, а „Мерцедес-Бенц“ за 2,6 проценти. Дури и „Ферари“, која е производител само на луксузни автомобили, падна за 1,7 проценти и покрај плановите да ги зголеми цените до 10 отсто за делумно да го надомести влијанието на тарифите.

Извршниот директор на Ферари, Бенедето Виња, неодамна изјави дека побарувачката останува позитивна и дека ценовната моќ на автомобилот е силна, со зголемената побарувачка за персонализација што ја става компанијата на пат да ги исполни своите цели за 2026 година уште во 2025 година. Со бранот лансирање на модели со висока маржа во претходниот период, ова создаде силна финансиска основа за зголемени инвестиции во истражување и развој на електрификација и нови технологии, додека „Ферари“ ја приспособува својата понуда на тековните трендови на пазарот.

Во 2024 година, бројот на продадени хибридни возила претставува најголем дел од продажбата со 51 процент од вкупниот број продадени возила. Тој сооднос е значително променет ако се спореди со 2022 година, кога учеството на тој тип изнесуваше само 22 отсто. Цената на акциите на „Ферари“ е зголемена за 30 отсто во однос на почетокот на 2024 година благодарение на растот на продажбата и стабилните показатели за профитабилност.

Тој раст ќе беше уште поголем доколку цената на акцијата не паднеше за 10 отсто во однос на почетокот на февруари годинава, кога се појави можноста за воведување царини за американскиот пазар. Според тоа, вредноста на „Ферари“ е пониска за 8,7 милијарди евра во однос на крајот на минатата година, што доведе до намалување на соодносот цена/заработка и цена/книговодствена вредност. Сегашната вредност на индикаторот цена/заработка се намали на 47 од 49, како и индикаторот цена/книговодствена вредност кој е на ниво од 21,7 во однос на крајот на минатата година кога изнесуваше 22,5. Инвеститорите го чекаат потегот на првиот човек на „Ферари“ за да видат дали можат да најдат решение за притисокот прво врз приходите, а подоцна и врз профитабилноста.