Азиските акции пораснаа, продолжувајќи ја својата прва неделна добивка од почетокот на војната на Блискиот исток, додека инвеститорите внимателно ги очекуваат преговорите меѓу САД и Иран оваа недела. Нафтата е на пат да ја постигне најголемата неделна загуба во последните девет месеци.
Индексот MSCI Asia Pacific порасна за 0,8 проценти откако американскиот претседател Доналд Трамп изјави дека е „оптимист“ во врска со договорот со Иран, иако истовремено му се закани на Техеран поради наплата на такси во Ормускиот теснец. Технолошките акции, кои се сметаат за помалку изложени на војната во Иран, остварија подобар резултат, при што Јужна Кореја, како лидер во инвестиции во вештачка интелигенција, скокна за 1,7 проценти.
Фјучерсите на американските акции ги избришаа претходните загуби, додека сличните фјучерси упатуваат на добивки за европските акции. Расположението го поттикна и фактот што нафтата од типот Брент го намали претходниот раст од 1,2 проценти и порасна за 0,6 проценти на 96,53 долари по барел. Доларот, кој се наметна како прибежиште за време на шестнеделната војна, ја бележи својата најголема неделна загуба од јануари.
Инвеститорите го следат кревкото примирје и планираните преговори меѓу САД и Иран во Исламабад, кои започнуваат в сабота, барајќи насоки за следните потези на пазарот. Иако согласноста на Израел да преговара со Либан го подобри расположението, продолженото затворање на Ормускиот теснец, клучната артерија за проток на сурова нафта, ги држи инвеститорите во напнатост, бидејќи претходните недели беа обележани со нагли поместувања на почетокот на тргувањето во понеделник.
„Пазарот почнува да ја пресметува можноста дека може да се постигне некаков договор за викендот“, изјави Хао Хонг, главен инвестиционен директор во хеџ-фондот ЛАМ (Lotus Asset Management). „Мојот квантитативен модел покажува дека техничкото закрепнување треба да продолжи барем уште неколку дена. Пазарот почнува да се фокусира на периодот по војната.“
Израелскиот премиер Бенјамин Нетанјаху се согласи да преговара со Либан, додека Трамп изјави дека израелскиот лидер ќе ги намали нападите врз земјата исцрпена од војна, испраќајќи надеж за деескалација. „Ен-би-си“ (NBC News) известува дека Трамп побарал од него да ги намали нападите за да се обезбеди успех во преговорите со Иран.
Меѓутоа, во четврток, министерството за надворешни работи на Кувајт соопшти дека Иран и неговите сојузници извршиле нови напади со дронови, целејќи низ витални објекти во земјата.
„Падот на волатилноста на пазарите на акции, обврзници и валути е позитивен за азиските акции, особено за технолошките компании, имајќи ги предвид нивните лоши резултати од почетокот на војната“, изјави Раџив Де Мело, портфолио менаџер во компанијата ГАМ (Gama Asset Management S). „Не ги намалувам позициите пред викендот бидејќи изгледа дека се оди во насока на дијалог, а не конфликт.“
Што велат стратезите на „Блумберг“
„Изгледа дека инвеститорите сакаат да ги игнорираат грижите за кревкото примирје помеѓу САД и Иран, сè додека Трамп не испраќа знаци за повторна ескалација на војната. Тоа исто така значи дека закрепнувањето на акциите изгледа претерано, бидејќи фокусот на потенцијалниот крај на конфликтот ги игнорира последиците од долготрајните шокови во снабдувањето кои ги предизвика војната.“
- Гарфилд Рејнолдс
Меѓу другите инвеститори, уште владее недоверба.
„Всушност, не сум воопшто оптимистичен“, изјави Ник Ферес, главен инвестиционен директор во компанијата ВПАМ (Vantage Point Asset Management) во Сингапур. „Дури и ако се постигне договор за време на викендот, големи се шансите дека снабдувањето со нафта ќе остане ограничено. Тоа повеќе не се одразува во премијата за ризик на акциите.“
На другите пазари, златото благо падна и се тргуваше по цена од околу 4.760 долари по унца. Американските државни обврзници го прекинаа четиридневниот раст, додека инвеститорите ги очекуваат податоците за инфлацијата во САД кои ќе бидат објавени в петок, за да видат какво ќе биде влијанието од повисоките цени на нафтата предизвикани од војната со Иран.
Економистите предвидуваат раст на индексот на потрошувачки цени од 0,9 проценти, што би бил најголемиот раст на месечно ниво од 2022 година, според анкета на „Блумберг“.
„Ризикот од вести поврзани со војната и натаму е најголемиот двигател на нестабилноста“, напиша во белешка Кајл Рода, финансиски аналитичар во „Капитал.ком“ (Capital.com). „Сепак, податоците за инфлацијата исто така претставуваат значителен ризик за движењата на пазарот.“
.webp){kind=icon}
