Сè погласно се слушаат оние што купуваат државни обврзници, но „Блекрок“ (BlackRock) не се согласува.
Компанијата се држи до планот да избегнува долгорочни државни хартии од вредност, бидејќи нивото на долгот расте, државните задолжувања се зголемуваат и инфлацијата достигнува покачени нивоа. Инвеститорите како компензација ќе бараат сè повисоки приноси, а каматните стапки може да останат високи подолго отколку што очекува пазарот, според компанијата што е најголем светски менаџер на пари.
„Инвестираме помалку во номинални долгорочни државни обврзници во секое сценарио од овој нов режим“, напишаа потпретседателот Филип Хилдебранд и неговите колеги во извештај што испитува четири различни пазарни сценарија. „Централните банки веројатно нема да дојдат на помош со брзо намалување на каматните стапки при рецесија, која замислуваат да ја спушти инфлацијата на посакуваната цел“.
Рекордниот годишен пад на државните обврзници во САД ги принудува инвеститорите со фиксен приход да го преиспитаат својот план за 2023 година, бидејќи некои стратези предупредуваат оти оптимизмот околу врвот во циклусот на зголемување на каматните стапки можеби е предвремен. Учесниците на пазарот се поделени во поглед на изгледите, при што некои, како што се „Фиделити интернешнл“ (Fidelity International) и „Јупитер асет менаџмент“ (Jupiter Asset Management), собираат обврзници за да му се спротивстават на ризикот од рецесија.
Очекувањата на „Блекрок“ се базираат на ставот дека долгорочниот државен долг веќе не ја исполнува својата традиционална улога како диверзификатор на портфолијата, поради упорната инфлација. Референтните десетгодишни приноси на државните обврзници во САД се зголемија речиси тројно во однос на годишниот минимум и достигнаа 4,34 отсто во октомври, откако Федералните резерви агресивно ги зголемија стапките за да ја скротат највисоката инфлација во последните четири децении.
Bloomberg
Приносите на десетгодишните американски обврзници во вторникот паднаа за еден базичен поен, на 3,60 отсто.
„Гледаме дека инвеститорите бараат поголема компензација за нивното држење, бидејќи централните банки ја заоструваат монетарната политика во време на рекордно ниво на долг“, се вели во извештајот, во однос на долгорочните државни обврзници.
Додека централните банки низ светот се обидуваат да го забават растот на цените, „Блекрок“ верува дека долгорочните двигатели, како што е стареењето на работната сила, ќе го задржат притисокот над нивото пред пандемијата. Фирмата ги фаворизира обврзниците поврзани со инфлацијата за да го заштити своето портфолио.
.webp){kind=icon}
