.webp){kind=icon}
Инвеститорите кои се подготвени да свртат нова страница од најлошата година за акциите од глобалната финансиска криза, би требало да бидат подготвени за уште болки во 2023 година.
Тоа е пораката од водечките стратези во Морган Стенли, Голдман Сакс и други, кои предупредуваат дека акциите ќе се соочат со нов пад во првото полугодие бидејќи корпоративните заработки подлежат на послаб економски раст и на се' уште вртоглаво високата инфлација, а централните банки остануваат јастребовски настроени.
Стратезите велат дека втората половина од годината ќе биде означена со заздравување откако Федералните резерви (ФЕД) ќе престанат да ги покачуваат каматните стапки, но најверојатно тоа ќе биде пригушено заздравување што и натаму ќе ги остави акциите само умерено повисоки отколку што се на крајот од 2022 година.
„Ризиците со кои се бореа берзите оваа година не завршија и тоа ме прави нервозен поради натамошните изгледи, особено во првата половина од 2023 година“, рече Мислав Матејка, глобален акциски стратег во ЈПМорган Чејс.
Движење на индексот S&P 500 и прогноза за идната година / Bloomberg Mercury
Во просек проценката на 22-цата стратези што ги анкетираше „Блумберг“ е дека индексот S&P 500 следната година ќе заврши на 4.078 бодови, или околу седум проценти повисоко од сегашното ниво. Најоптимистичното предвидување е зголемување од 24 проценти, додека според мечкините гледишта се предвидува пад од 11 отсто. Слично истражување во Европа, спроведено меѓу 14 стратези, предвидува просечна добивка од околу пет проценти за индексот Stoxx 600.
Постојат брдо предизвици, од монетарно затегнување до војна во Украина и европска енергетска криза. Првиот од набројаните веќе помогна да се смири неодамнешниот раст на акциите.
Дури доаѓаат и подобри вести за инфлацијата со големо предупредување бидејќи централните банки не се колебаат и премислуваат од нивниот фокус да го стават растот на цените под контрола. Јастребовските тонови и од ФЕД и од Европската централна банка (ЕЦБ) минатата недела предизвикаа остри падови на капиталот и ги потсетија инвеститорите дека нема да биде едноставно да се одреди времето на долго очекуваната промена на политиките.
Од друга страна, Банката на Јапонија изненади со шокантна измена на својата политика на приноси од обврзници.
Тимот на ЈПМорган очекува дека индексот S&P 500 ќе падне назад кон нивото забележано во 2022 година, пред одлуките на ФЕД да поттикнат заздравување во втората половина, што ќе ги остави на околу 10 проценти повисоко ниво од моменталното. Во најлошиот момент оваа година, во октомври, индексот падна за 25 проценти, на 3.577 бодови.
Главните менаџери за пари, исто така, предвидуваат тежок почеток на 2023 година, со добивки кои ќе бидат префрлени во втората половина, покажува истражувањето на „Блумберг“, објавено месецов.
Американските акции не успеаја да го надминат трендот од претходните мечкини пазари / Bloomberg Mercury
За тие кои имаат оптимистично гледиште, може да се укаже на отпорност на американската економија, побавно темпо на зголемување на каматите и отварање на Кина од строгите правила поради ковид.
И покрај сето тоа, еден од главните консензуси меѓу стратезите е дека пазарот на акции уште не ги одразува општо лошите економски изгледи.
Кристијан Милер-Глисман и Сесилија Мариоти од Голдман сакс на крајот од минатиот месец рекоа дека нивниот модел имплицира 39 проценти веројатност за забавување на растот во САД во следните 12 месеци.
Мајкл Вилсон од Морган Стенли, кој има цврсто мечкино гледиште, очекува дека индексот S&P 500 во првото тримесечје ќе падне за дури 21 отсто. По заздравувањето индексот ќе ја заврши годината на околу 3.900 бодови, што имплицира раст од околу два проценти од затварањето на тргувањето во понеделникот.
Заработката на компаниите е поврзана со влошените економски изгледи. Иако добивката покажа изненадувачка отпорност на ненадминатата инфлација во 2022 година, се очекува дека следната година ќе се сруши паралелно со растот на притисокот врз цените, а послабата побарувачка го зголемува ризикот за стагфлација.
Вилсон предупреди дека сегашниот пад на добивката може да одговара на падот што го видовме во текот на финансиската криза од 2008 година, а предупреди и дека тоа не е пресметано во акциите.
Стратезите од Волстрит предупредуваат дека акциите уште не го пресметале ризикот за заработка / Bloomberg Mercury
Анкетата на Бенк оф Америка, исто така, покажува дека управителите на фондовите очекуваат дека изгледите за заработка следната година ќе се влошат во однос на фиксните приходи на најниско ниво од 2009 година.
„Не очекуваме дека овогодинешната конструктивна позадина на растот ќе се задржи и во 2023 година“, рече Дубравко Лакос-Бујас, стратег во ЈПМорган. Тој очекува пад на добивките од девет отсто во САД, 10 проценти во еврозоната и четири отсто во Јапонија.
Според зборовите на стратегот на Голдман Сакс, Шерон Бел, падот на заработката во Европа можеби нема да биде така лоша како во текот на типичната рецесија. Таму каде што мина контракцијата и доведе до пад на профитот за околу 30 отсто, овој пад може да биде ограничен на осум проценти поради луксузните и рударски компании поради кинеското ублажување на ковид ограничувањата.
Во Азија оттргнувањето на Пекинг од нулта ковид политиката, исто така, ги подобри изгледите за тамошните акции.
Стратезите на Морган Стенли, вклучително и Џонатан Гарнер, и натаму имаат претеран товар во однос на акциите на пазарите во развој во однос на развиените пазари бидејќи повеќе се уверени дека почнува нов циклус на раст. Тимот на Номура холдингс во меѓувреме рече дека рецесијата на запад овозможи Азија да ги надомести резултатите бидејќи тамошните акции нудат поевтини проценки и подобри базични изгледи.
„2023 е година во која прогнозите за глобален раст претрпеа значаен удар. Тоа е постојана неизвесна перспектива со многу нестабилност за навигација. Акциите и натаму се предизвик“, рече Мевиш Ајаб, виш инвестициски стратег во Стејт стрит глобал.
