Шансите за рецесија во САД се 45 отсто, вели милијардерот Стив Коен

Милијардерот Стив Коен изјави дека шансите за рецесија во САД моментално изнесуваат околу 45 отсто.

„Сѐ уште не сме во рецесија, но имаме значително забавен економски раст“, рече основачот на хеџ-фондот „Поинт 72 асет менаџмент“ (Point72 Asset Management) во средата, на конференцијата „Сон инвестмент“ (Sohn Investment) во Њујорк.

Коен истакна дека не очекува Федералните резерви веднаш да ги намалат каматните стапки, бидејќи „ќе бидат загрижени поради инфлацијата предизвикана од царините“. Тој предвидува дека економскиот раст на САД следната година ќе се забави на 1,5 отсто или помалку – „што е во ред, но не и извонредно“.

Тој ги опиша падот и брзото закрепнување на берзата во април како необични, додавајќи дека сега е фокусиран на тоа како пазарот ќе реагира на следниот сет економски податоци од САД.

„Сакам да видам како ќе реагира пазарот, бидејќи тоа многу ќе ми каже дали цените се соодветни“, рече Коен.

Дури и ако пазарот падне, тој очекува намалување од 10 до 15 отсто, „што не би било катастрофа“. Тој додаде дека постои можност американскиот берзански пазар да остане во рамките на актуелниот трговски опсег некое време.

„Пазарите не мора да растат секоја година“, смета Коен. „Пазарите може да стагнираат или да има корекција, а тоа е сосема нормално“.

Неговиот фонд „Поинт 72“ во април остварил раст од 2,3 отсто  во услови на силна пазарна нестабилност, според веќе објавените информации од „Блумберг“. Со тоа, вкупниот принос од почетокот на годината достигнал 3 отсто.

Во моментов нема коментари за веста. Биди прв да коментира...

Остави коментар