Милијардерот Стив Коен поддржа скратена работна недела

Милијардерот Стив Коен, основач на „Поинт 72“ (Point72 Asset Management) и сопственик на Њујорк Метс (New York Mets), очекува повеќе компании да се префрлат на четиридневната работна недела. Ова е и една од причините зошто инвестирал во голф.

За појаснување, во САД сè повеќе луѓе играат голф во слободното време, особено во средината на работната недела, откако почна далечинското работење.

„Верувам дека четиридневната работна недела се приближува“, рече Коен во своето прво интервју за „Си-ен-би-си“ (CNBC), додавајќи: „Тоа се совпаѓа со идејата дека луѓето имаат повеќе слободно време за себе“.

Коен, страстен играч на голф, рече дека голем број фактори го туркаат светот кон пократки работни денови, вклучувајќи го и доаѓањето на вештачката интелигенција. Во прилог на фактот дека „луѓето навистина не се толку продуктивни во петок“, според овој милијардер, зборува и зголемениот број на компании што дозволуваат хибриден начин на работа.

Коен, инаку, е дел од конзорциумот што неодамна се согласи да инвестира до три милијарди долари во организацијата контролирана од ПГА (PGA Tour). Договорот, постигнат со голем број инвеститори, вклучувајќи ги и милијардерот Марк Ласри и сопственикот на бејзбол-тимот Милвоки Бруерс (Milwaukee Brewers), Марк Атанасио, е дел од новата независна организација што на некои играчи  ќе им даде удел во капиталот. Фондот за јавни инвестиции на Саудиска Арабија е во процес на преговори за потенцијална инвестиција.

Коен е исто така сопственик на тим во новата виртуелна голф-лига ТГЛ (TGL), која е финансирана од Тајгер Вудс и Рори Мекилрој.

Американецот, сепак, рече дека трговците и портфолио-менаџерите што работат за него ќе продолжат да одат на работа пет дена во неделата. „Ако имате портфолио со кое управувате и земате слободен петок, таму може да се појави проблем“, вели тој.

„Граѓанска должност“ за Коен

Во опсежното интервју, Коен, кој вообичаено избегнува да зборува со медиумите, зборуваше за иднината на Метс, неговите планови за казино и забавен центар во близината на Сити Филд, како и за неговите гледишта за инвестирање.

Тој го спореди водењето на тимот со водењето на неговиот хеџ-фонд од 32 милијарди долари, велејќи дека во двата случаја им дава „многу слобода“ на своите вработени да донесуваат одлуки.

Во првите три години откако Коен стана сопственик на Метс, тимот потроши многу за да потпише слободни бејзбол-ветерани како Макс Шерцер, Франциско Линдор и Џастин Верландер, зголемувајќи го својот платен список на рекордни 375 милиони долари минатата сезона.

Сепак, тоа не резултираше со успех, бидејќи тимот го пропушти плејофот.

Коен продолжува да тврди дека сега се фокусира на создавање таленти наместо на купување играчи, метод за кој вели дека се покажал успешен во „Поинт 72“.

Новиот претседател за бејзбол-операции на неговата компанија, Дејвид Стернс, успеа да ги одведе Милвоки Бруерс во плејофот четири сезони по ред додека раководеше со тимот, и покрај релативно скромниот буџет.

„Она кон кое навистина треба да се стремите е да развиете талент; тоа не се разликува од она што го правам во мојот хеџ-фонд“, рече Коен, додавајќи дека го гледа поседувањето на Метс како своја „граѓанска должност“.

Она што може да донесе профит се казиното и забавниот центар. Тој проект би чинел околу осум милијарди долари, а најголемиот дел од парите би бил од приватни извори.

Кога станува збор за инвестирање, Коен ја нарече вештачката интелигенција „вечна тема“.

Во моментов нема коментари за веста. Биди прв да коментира...

Остави коментар