Берзите во минус во пресрет на податоците за инфлација во САД

Азиските акции паднаа пред објавата на критичниот извештај за инфлацијата во САД, но и бидејќи ќор-сокакот за максималната граница на американскиот долг го намалува расположението на инвеститорите.

Индексот S&P 500 падна за 0,5 проценти, а технолошкиот индекс Nasdaq 100 за 0,7 отсто. Клучните азиски берзански индекси се во пад во опсег од 0,2 до 0,7 проценти.

 

 

Американските мерила се заглавени во тесен опсег на тргување бидејќи инвеститорите го одмеруваат потенцијалниот крај на зголемувањето на каматните стапки од страна на Федералните резерви (ФЕД) наспроти можноста за економско забавување. Слична е приказната за акциите на глобално ниво.

Доларот ослабе маргинално наспроти сите негови врсници од групата 10 најтргувани валути.

Претставниците на ФЕД, вклучувајќи го и претседателот на ФЕД-Њујорк, Џон Вилијамс, внимаваат на знаците на кредитна криза. Вилијамс рече дека не вклучил намалување на стапката во својата прогноза за оваа година, но ја остави вратата отворена поради шансите за пауза. Своповите сугерираат дека трговците очекуваат намалување од најмалку 50 базични поени до крајот на 2023 година.

„Сепак, некои инвеститори не сакаат да ги променат своите инвестициски стратегии врз основа на овонеделните случувања, зашто ќе има уште еден извештај за инфлацијата и платите пред следната одлука на ФЕД на средината на јуни“, истакна Четан Сет, стратег за капитал во „Номура“ (Nomura Holdings Inc), во рамките на гостувањето на телевизијата „Блумберг“.

На другите пазари нема поголеми раздвижувања. Така е кога станува збор за златото, но мирно е и на криптопазарот, каде што биткоинот ја зголеми вредноста за 0,1 отсто и чини 27.700,1 долар, а незначителна е промената на етерот, кој се тргува за 1.850,55 долари.