Кои акции од МБИ10 имаат најголем раст во 2024 година?

Сите компании кои го сочинуваат берзанскиот индекс МБИ10 имаат зголемување на вредноста на акциите во текот на 2024 година, а со раст на просечната цена од 88,5 проценти од почетокот на годинава заклучно со 10 октомври предводат акциите на „Македонијатурист“. Втори на листата се акциите на „НЛБ Банка“ со зголемување на просечната цена од 51 процент, а трети се акциите на „Комерцијална банка“ со раст од 66,6 проценти.

Карактеристично е дека во овој период речиси сите компании од МБИ10 имаат раст на просечната цена на акциите поголем од 20 проценти односно исклучок е само „Македонски Телеком“ со зголемување од 11 проценти.

Позитивни финансиски резултати

Растот на акциите на компаниите од МБИ10 е сосем оправдан ако се земат предвид полугодишните финансиски резултати на компаниите кои го сочинуваат овој индекс. Имено, сите компании покажаа нето добивка во првото полугодие од годинава со тоа што кај осум од нив има раст на добивката во однос на истиот период од минатата година, а само „ТТК Банка“ и „УНИ Банка“ покажаа помала нето добивка.

Дополнително раздвижување на берзата во изминатиов период предизвикаа обидот на „Комерцијална банка“ да ја преземе „Стопанска банка Битола“ и зачестеното тргување со големи блокови акции од „Македонијатурист“.

„Блумберг Адрија“ веќе пишуваше дека МБИ10 се најде меѓу првите топ пет берзански индекси во светот по остварениот раст од почетокот на годинава, заклучно со 6 септември, според рангирањето на терминалот на „Блумберг“. Со раст на вредноста од 40,12 проценти, МБИ10 тогаш го зазеде четвртото место меѓу вкупно 353 берзански индекси.

 

Потребен е поголем обем на тргување

Главниот извршен директор на Македонската берза, Иван Штериев неодамна во интервју за „Блумберг Адрија“ посочи дека ценовниот раст на акциите на нашиот пазар и растот на прометот имаат свој фундамент и во резултатите и дивидендните политики на најликвидните котирани компании на берзата, особено банките.

„Годинава на тоа се надоврзува една серија на значајни корпоративни настани (промена на менаџерски структури, сплитови, најавени или очекувани преземања итн.).Од друга страна, во системот БЕСТ просечно дневно од јануари до средината на септември 2024 година се склучуваа 90 трансакции (наспроти 46 во 2023 година), а просечниот дневен промет изнесува околу 445.000 евра (во 2023 година: околу 182.000)“, рече Штериев.

Тој додаде дека од анализата на прометот произлегуваат и факторите што ја обликуваат нашата пазарна слика, односно (не)ликвидноста.

„Берзите и тргувањето со хартии од вредност, во оптимално сценарио, за да бидат поефикасни и поатрактивни, по дифолт (од англиски: default) бараат голем обем. Познато е дека на пазарите на капитал ликвидноста креира уште поголема ликвидност. Тоа, пак, зависи од големината на целокупната економија, бројот на жители во земјата, но и стандардот на населението и неговите навики за штедење и инвестирање“, вели Штериев.