Берзански преглед: Биткоинот над 100.000 долари, германски рекорд и несигурност на нафтениот пазар

Минатата недела на берзите најмногу се истакна веста за растот на биткоинот над границата од 100.000 долари за токен. Германскиот индекс DAX првпат во историјата надмина 20.000 бода, додека политичката криза во Франција се прелева и на финансиските пазари. Каде се можностите за инвестирање?

Во последниот месец на раст, поттикнат главно од изборот на Доналд Трамп за претседател на САД, најголемата и најстара криптовалута, биткоинот, конечно ја надмина психолошката граница од 100.000 долари.

 

По победата на Трамп, на криптопазарот владее вистинска прослава. Индустријата оптимистички очекува мерки од новата американска администрација, наклонета кон криптото, која ќе стапи на должност на 20 јануари 2025 година. Се очекува укинување на строгиот државен надзор над криптовалутите што се спроведуваше за време на администрацијата на Џо Бајден. Дополнителен оптимизам донесе именувањето на Пол Аткинс, љубител на криптовалути, за претседател на Комисијата за хартии од вредност.

Bloomberg

Француската политичка криза ги потресе пазарите

Франција ја тресе политичка криза откако претставниците на Долниот дом на Парламентот ѝ изгласаа недоверба на владата на премиерот Мишел Барние. Гласањето следуваше откако премиерот во понеделникот наметна носење буџетски закони.

Француските пазари очекуваа смена на владата, што резултира со раст на цените на десетгодишните француски обврзници, со што приносот падна на 2,88 отсто. Трошоците за задолжување на Франција, втората најголема економија во Европската Унија, и натаму се повисоки од тие на помалите економии, како Шпанија и Грција.

 

 

 

Ако се погледне индексот CAC40, кој ги следи 40-те најквалитетни акции во Франција, јасно покажува дека се ближи крајот на доста динамичната година не само на политички туку и на берзански план. Во споредба со референтните индекси на германските акции, француските заостануваат најмногу во последните 31 година, а политичките превирања во Париз укажуваат на натамошен пад на вредноста.

Лојзе Козоле од брокерската куќа „Илирика“ изјави дека политичката несигурност во Франција создава одреден ограничен притисок на пазарите на капитал, што е особено видливо во францускиот банкарски сектор. На пример, во последниот месец најмногу паднаа цените на акциите на „БНП Парибас“ (BNP Paribas), за 11,52 отсто, „Кредит Агрикол“ (Crédit Agricole), за 11,46 отсто, и на „Сосиете Женерал“ (Société Générale), за 11 отсто.

 

 

 

 

Меѓу француските акции годинава најмногу одушевија акциите на „Сафран“ (Safran), производител на авионски и ракетни мотори, вселенска технологија и безбедносни системи, кои пораснаа дури за 43 проценти. Акциите на „Шнајдер електрик“ (Schneider Electric), специјализираната компанија за дигитална автоматизација и управување со енергија, оствари раст од 37 отсто. Принос поголем од 30 проценти оствари и акцијата на „Сен Гобан“ (Saint-Gobain), специјализиран за производство, преработка и дистрибуција на материјали.

Германија со рекордни достигнувања

Од Франција преминуваме кон нејзиниот источен сосед Германија, која исто така ја тресе политичка криза. Додека германските политички партии се подготвуваат за предвремени избори, главниот германски индекс DAX првпат во историјата се искачи над 20.000 бода. Со раст од речиси 20 отсто годинава, DAX е водечкиот индекс во Европа. Неговиот раст предизвика обложувања на глобалното економско здравје и закрепнувањето на Кина и покрај предизвиците со кои се соочува Германија, како длабоката криза во автомобилската индустрија.

Светските индекси во зелено

Минатата недела сите главни светски индекси завршија во зелено. Најголем добитник беше германскиот индекс DAX, со раст од 4,8 отсто. Американскиот индустриски индекс Dow Jones остана речиси непроменет откако претходната недела оствари најголем раст. Подобри резултати забележуваме кај индексот S&P, чиј раст е 1,3 отсто, како и кај технолошкиот индекс NASDAQ, со раст од 3,4 проценти. Јапонскиот индекс Nikkei бележи солиден раст од 2,7 отсто во последните седум дена.

Bloomberg Adria

Американскиот индекс S&P 500 годинава порасна за 27 отсто. Ако не дојде до поголеми корекции во декември, оваа ќе биде втора последователна година со раст од најмалку 20 проценти, што во историјата се случило само четири пати, извести РТВ Словенија. Натамошен раст (и нов рекорд) исто така ќе има влијание и на одлуката на Фед, кој за намалување на каматите ќе одлучува на 17 и 18 декември.

Bloomberg Adria

Што се случи на регионалните берзи? Минатата недела најголем раст оствари македонскиот индекс МБИ, и тоа за шест отсто. Другите регионални берзански индекси останаа повеќе или помалку непроменети.

Depositphotos

Пазарот на нафта

Bloomberg Adria

Минатата недела беше бурна и за нафтениот пазар. Нафтената организација ОПЕК + (Организацијата на земји извознички на нафта и нивни сојузници) во четвртокот го продолжи ограничувањето на производството на нафта до април. Планираното зголемување на производството, предвидено за јануари 2025 година, е одложено до пролет. ОПЕК + моментално активно ограничува околу шест отсто од глобалната понуда на нафта, соочувајќи се со забавување на побарувачката и зголемување на производството во земјите надвор од оваа организација, што ги држи цените ниски, извести „Семафор“.

 

 

 

 

 

Ниту зачестените ескалации на Блискиот Исток, регионот што произведува повеќе од 40 проценти од светската нафта, веќе со месеци не предизвикуваат позначително поскапување на тој клучен ресурс. „Ескалацијата веќе беше очекувана на финансиските пазари, па ризикот е главно пресметан во цената, а пазарите се приспособија“, изјави Тајлен Шарлах, аналитичар во „Асекс“ (Acex).

 

 

 

 

Движење на еврото во однос на доларот до 2025 година

Аналитичарите на „Блумберг Адрија“ минатата недела објавија прогнози за валутните движења за 2025 година. Во последните три месеци индексот на американскиот долар DXY покажа раст од 6,5 проценти во однос на главната валута, со што го надмина петгодишниот просек. Најавата за нови царини за Канада и Мексико, како и дополнителни за Кина, само го зголеми притисокот врз доларот.

 

Разликата во реалните каматни стапки меѓу Фед и Европската централна банка (ЕЦБ) ги поддржува натамошните очекувања за умерена апрецијација на доларот во однос на другите валути. Нестабилноста на доларот значително се намали, моментално е 30 отсто под 30-годишниот просек, што укажува на поголема стабилност во последните месеци.

Ако САД избегнат воведување царини за производите од ЕУ или ги воведат по пониски стапки од очекуваното, еврото може да се врати на ниво од 1,08 долар, сметаат аналитичарите на „Блумберг Адрија“.

Bloomberg

Акциите во вториот мандат на Трамп

Еден месец по избирањето на стариот нов претседател на САД, го анализиравме движењето на акциите на компаниите наклонети кон републиканците. Го проучивме движењето на вредностите на компаниите, како што се „Трамп медија енд технолоџи“ (Trump Media & Technology), „Тесла“ (Tesle) и неколку нафтени компании.

Во анализата се фокусиравме на шестмесечното движење на акциите на одбраните фирми.

Случувања во текот на неделава

Понеделник, 9 декември

• Во Јапонија ќе се објават податоци за БДП за третото тримесечје

• Кина ќе објави податоци за инфлацијата

• Министрите за финансии на ЕУ се состануваат во Брисел, каде што ќе им се придружи британската министерка за надворешни работи

 

Вторник, 10 декември

• Податоци за трговскиот биланс во Кина

• Инфлација во Германија

• Издадени одобренија за градење во Македонија

• Индекси на градежни цени во Македонија

• Индекс на трошоци на живот во Македонија

 

Среда, 11 декември

• Инфлација во Русија

• Туризам во Македонија

 

Четврток, 12 декември 

• БДП во Обединетото Кралство

• Одлука на ЕЦБ за каматните стапки

• Индекс на цени на производителите во САД

 

Петок, 13 декември

• Индустриско производство во Јапонија

• Индустриско производство во еврозоната

• Инфлација во Франција

• Индекси на промет во индустријата во Македонија

• Индекси на промет во услугите во Македонија