Дали кинеските „величествени десет“ ќе ги победат американските „величествени седум“?

„Новата ера има големи можности за развој на приватната економија и голем потенцијал“, рече кинескиот претседател Шји Џјинпинг пред публиката на Кинеските технолошки лидери во понеделникот, додавајќи: „Време е приватните компании и приватните претприемачи да ги покажат своите таленти“.

Без да го спомене американскиот претседател Доналд Трамп, Шји ги повика водечките технолошки претприемачи да го задржат својот натпреварувачки дух и доверба во иднината на земјата, нагласувајќи дека сегашните предизвици се привремени. Тој вети дека ќе ги елиминира неразумните такси или казни за приватните компании и ќе ги израмни условите за игра, според „Блумберг“.

„Со оглед на времето, форматот и содржината, состанокот во понеделникот го гледаме како јасна порака од највисокото раководство за стабилизирање на очекувањата за приватните компании и претприемачите, иако имплементацијата - вклучувајќи поголем стимул од страната на побарувачката и реформите во политиката поповолни за пазарот - останува клучна за обновата на довербата“, коментираат економистите на „Голдман Сакс“ за кинескиот состанок.

Цврсто кореографираниот собир за поддршка на претприемништвото означува пресврт во пристапот на Пекинг кон технолошките гиганти по регулаторната акција пред четири години и ја одразува загриженоста на креаторите на политиката за забавување на растот и напорите на САД за обликување на технолошкиот развој на Кина, изјавија аналитичарите за „Ројтерс“.

Дури и пред Шји Џјинпинг да се сретне со врвните деловни лидери во Кина, инвеститорите почнаа да влеваат пари во кинеските технолошки акции, обложувајќи се на крај на повеќегодишниот притисок врз приватниот сектор. Случајот за купување кинески акции - особено технолошки акции - се подобрува, можеби доволно за да ги привлече долгорочните инвеститори, изјавија инвестициските банки за „Ројтерс“, укажувајќи на појавата на стартапот „Дипсик“ (DeepSeek).

Bloomberg

„Банката на Америка“, на пример, соопшти дека Кина може да се ребрендира од ознака „вредна за трговија“ во ознака „вредна за инвестиции“. Ова би претставувало голема промена во начинот на размислување на инвеститорите кои веќе некое време ги оставаат настрана кинеските акции и заземаат кратки позиции на кинеската берза.

За таа цел, разгледавме кои  кинески технолошки акции ги споменуваат аналитичарите.

Рекорд на технолошкиот Hang Seng и „десетте величествени“

Прво, да ја погледнеме реакцијата на берзата. Кинескиот индексот CSI 300 изгуби 0,97 отсто и покрај охрабрувачките знаци од технолошкиот самит во понеделникот. Индексот Hang Seng во Хонг Конг се зголеми за 0,99 отсто, додека технолошкиот индекс Hang Seng се зголеми за 1,58 отсто на највисокото ниво од февруари 2022 година.

Фокусот е ставен на кинеските технолошки акции, кои се наречени „десет величествени“, коишто се одговор на американските технолошки акции, таканаречените „седум величествени“.

Во првите десет се вклучени гигантите за е-трговија „Алибаба“ (Alibaba) и „ЈД.ком“ (JD.com), производителите на автомобили „Гели“ (Geely) и БЈД (BYD), технолошкиот конгломерат „Ксаоми“ (Xiaomi), интернет гигантите „Тенсент“ (Tencent) и „Нитизи“ (Netease), операторот за пребарувачот „Баиду“ (Baidu), компанијата за испорака на храна „Меиутан“ (Meituan) и производителот на чипови СМИК (SMIC).

Прво, да го погледнеме гигантот за е-трговија „Алибаба“, чиј прв човек и соосновач Џек Ма се повлече од јавниот живот пред неколку години по судир со регулаторите. Акциите на „Алибаба“ пораснаа за 68,76 отсто во изминатата година, а кинескиот технолошки гигант неодамна ја претстави и својата најнова серија на модели со вештачка интелигенција, „Квен“ (Qwen 2.5.)

Следен беше технолошкиот гигант „Баиду“, која во четвртокот објави пад на кварталниот приход од 2 отсто, притисната од забавувањето на нејзиниот адвертајзинг бизнис, иако објави успех во своите услуги за вештачка интелигенција базирана на облак. Во трите месеци до декември, компанијата објави приход од 34,12 милијарди јуани (4,69 милијарди долари), во споредба со проценките на аналитичарите од 33,32 милијарди јуани, според „Ројтерс“.

Основачот на „Тенсент“, Пони Ма, чиј „Вичет“ (WeChat) беше пионер на концептот „супер апликација“ којшто беше пофален од Илон Маск, исто така присуствуваше на технолошкиот самит во понеделникот, според „Блумберг“. Акциите на „Тенсент“пораснаа за околу 66 отсто во изминатата година.

Соосновачот на Алибаба Џек Ма/Извор: Bloomberg

Што тргна наопаку за кинеските технолошки компании?

Секторот напредуваше по првичната јавна понуда на „Алибаба груп“во 2014 година, бидејќи фондовите за ризичен капитал и инвеститорите почнаа да го препознаваат богатството што може да се создаде во најнаселената земја во светот. Основачите на технологијата како Џек Ма и Ванг Ксингом станаа милијардери и познати личности.

Нивниот раскошен начин на живот не му се допадна на раководството на земјата. Во 2020 година, кога Ма остро го критикуваше државниот финансиски сектор и владините регулатори на конференција во Шангај, тоа ги налути официјалните лица во Пекинг.

Регулаторите го изненадија Волстрит со запирање на првичната јавна понуда на подружницата на „Алибаба“, „Ент груп“ (Ant Group) - во тоа време најголемата планирана почетна јавна понуда во светот - пред да почнат да вршат притисок врз остатокот од деловната империја на мај.

Следеше опсежна регулаторна акција, која опфаќа приватно туторство, индустријата за игри и финансиска технологија. Компаниите како „Алибаба“, „Тенсент“и „Диди Глобал“платија висока цена за да ја вратат довербата на претставниците на Пекинг. Многу од богатите основачи на компаниите се повлекоа од очите на јавноста.