Изгледите за реформите на Мерц ги возбудуваат пазарите

Инвеститорите на азиските пазари не беа преголеми оптимисти по петочниот пад на американскиот Волстрит. Индексите во регионот денеска главно паднаа откако петочните економски показатели во САД го одразија забавувањето на економијата и упорната инфлација. Индексот Hang Seng во Хонг Конг денеска падна за 0,37 отсто, откако во петокот ја достигна највисоката вредност во последните три години. Индексот CSI300 во континентална Кина, исто така, падна за 0,26 отсто во неизвесното тргување, објави Си-Ен-Би-Си (CNBC). 

Песимизмот се должи на податоците од петокот во САД и загриженоста на инвеститорите за неизвесните последици од трговската војна на американскиот претседател Доналд Трамп. Индексот Dow Jones industrial average минатиот викенд падна за 1,69 отсто на 43.428,02 поени. Ова е најголема загуба на вредноста оваа година, со дводневна загуба од околу 1.200 поени. Индексот S&P 500 исто така падна за 1,71 отсто на 6.013,13 поени.

САД: Поплава од статистички песимизам

Последното читање доаѓа откако индексот на расположението на потрошувачите на Универзитетот во Мичиген падна на 64,7 во февруари, што е пад од речиси 10 отсто, бидејќи потрошувачите се загрижени за инфлацијата, која може да биде поттикната од тарифните војни на Трамп. Според „Блумберг“, истражувањето за петгодишната прогноза за инфлација изнесуваше 3,5 отсто, највисоко од 1995 година.

Дополнително, постојната продажба на домови во САД падна минатиот месец на 4,08 милиони единици. Низ Атлантикот, индексот на менаџери за набавки во услужниот сектор, исто така, падна на територијата на намалување во февруари, според податоците на S&P Global.

Ефектот на Мерц

Во меѓувреме, пазарите со ентузијазам го поздравија изборот на Христијанско-демократската унија (ЦДУ/ЦСУ) на предвремените избори во Германија. Претпоставениот канцелар Фридрих Мерц вети опсежни економски реформи за заживување на најголемата економија во Европската унија и третата по големина во светот, но аналитичарите се реални и веруваат дека конзервативците прво мора да формираат коалиција. Мерц рече дека тоа ќе го стори до Велигден, но економистите велат дека ќе поминат месеци, па дури и години, пред мерките да имаат влијание врз реалната економија.

И покрај тоа, еврото денеска зајакна во однос на доларот и другите главни валути. Еврото зајакна за 0,7 отсто во азиското тргување, а само во февруари доби вредност од 1,5 отсто.

Позитивната нота беше проследена со фјучерси за германскиот индекс DAX, кој порасна во азиското тргување, како и договорите за Euro STOXX 50. Еврото најмногу зајакна во однос на доларот во изминатиот месец.

„Исходот е во основа поволен за пазарот“, изјави за „Блумберг“, Џереми Стреч, главен меѓународен стратег во „Канадската Империјална банка за Трговија“. Сепак, „инвеститорите можеби се малку нервозни за да видат како новата коалиција - штом ќе биде формирана - ќе се справи со фискалните предизвици“.

Очекуваните приноси на германските обврзници паѓаа уште пред изборите, бидејќи пазарите го очекуваа исходот, кој се оствари синоќа. Очекуваните приноси на германските 10-годишни обврзници паднаа за шест базични поени на 2,47 отсто.

Германските обврзници се лизнаа во однос на клучните репери, при што хартиите од вредност со подолг датум паднаа повеќе од хартиите од вредност со пократок датум, а кривата на принос стана најстрмна од 2022 година.

Наведеното укажува дека денешното тргување на германските и европските берзи ќе биде едно од подобрите или попрофитабилните во новата година.

Ефектот на „Дипсик“

Инвеститорите со нетрпение го очекуваат извештајот за заработката на „Енвидија“оваа недела, кој ќе покаже како пенетрацијата на кинескиот чет-бот „Дипсик“ влијаеше врз бизнисот на американската технолошка компанија. Производителот на графички процесори за напојување на вештачката интелигенција ќе ги објави своите први резултати за заработка по појавата на кинескиот предизвикувач.