.webp){kind=icon}
Волстрит затвори на црвено втор ден по ред во понеделникот, откако претседателот на ФЕД, Џером Пауел, објави дека американската централна банка нема толку брзо да се повлече од својата строга монетарна политика.
Dow Jones падна за 0,57 отсто, на 32.058 поени, додека Nasdaq загуби 1,02 отсто и застана на 12.017 поени. Индексот S&P 500 падна за 0,67 отсто, на 4.030 поени, што е негов најголем пад во два дена во последните два и пол месецa.
Песимизмот се прелеа „преку барата“ на европските пазари, па така најважните берзански индекси на стариот континент во понеделникот завршија во минус. Франкфуртски DAX се лизна за 0,61 отсто, на 12.892 поени, а париски CAC за 0,83 отсто, на 6.222 поени. Во Британија вчера немаше тргување поради празник.
И на повеќето азиски берзи утрово цените на акциите паднаа бидејќи инвеститорите стравуваат од зголемување на каматните стапки и забавување на економскиот раст. Индексот MSCI на азиско-пацифичките акции, без Јапонија, утрово околу 7 часот беше намален за 0,4 отсто, откако вчера падна за речиси два отсто.
На токиската берза индексот Nikkei порасна за 1,2 отсто, цените на акциите во Австралија и Јужна Кореја пораснаа меѓу 0,5 и 1 отсто, додека во Шангај и Хонгконг паднаа меѓу 0,6 и 0,9 отсто.
Пауел пред неколку дена рече дека враќањето на инфлацијата на целта од 2 отсто е „главниот фокус на централната банка во моментот“, иако на потрошувачите и бизнисите ќе им биде нанесена болка со таквиот чекор. Тој повтори дека уште едно „невообичаено големо“ зголемување на референтната каматна стапка може да биде соодветен чекор кога официјалните лица ќе се сретнат следниот месец.
Според проценките на пазарот на пари, има повеќе од 70 отсто шанси ФЕД да ги зголеми каматните стапки за 0,75 процентни поени во септември. Исто така, се проценува дека до крајот на годината зголемувањето би можело да изнесува 3,7 отсто.
Ова дополнително ќе ја оптовари американската економија, која технички сè уште е во рецесија, но Пауел најави дека ФЕД е подготвен да го жртвува економскиот раст и да го олади пазарот на трудот за да ја заузда инфлацијата.
