Европските фјучерси растат, нафтата паѓа по средбата за судбината на Украина

Финансиските пазари тргуваа во тесен опсег, при што глобалните акции се држеа близу рекордно високото ниво откако средбата на американскиот претседател Доналд Трамп со претседателот на Украина и со европските лидери заврши со повик за трилатерална средба со Русија.

Фјучерсите на европскиот индекс на акции добија 0,2 проценти бидејќи лидерите на САД, Украина, Европа и НАТО го поздравија напредокот во разговорите за прекин на војната во Украина. Нафтата падна за 0,8 проценти поради шпекулациите дека прекинот на огнот би можел да доведе до поголема руска понуда. Азиските акции беа непроменети, додека акциите во континентална Кина се држеа блиску до нивното децениско највисоко ниво. Фјучерсите на јапонските државни обврзници ги продолжија загубите откако продажбата на 20-годишен државен долг слабо привлече побарувачка.

Договорите за американските акции паднаа за 0,2 проценти, а државните обврзници беа стабилни откако „Ес енд пи глобал рејтингс“ (S&P Global Ratings) ја потврди својата долгорочна оценка AA+ за САД, како и својата краткорочна оценка A-1+. Вредноста на доларот малку се промени.

Bloomberg Mercury

 

Пазарите беа претпазливо оптимистички настроени кон мировниот процес во Украина откако Трамп го повика Владимир Путин да започне со планирање средба со Володимир Зеленски. Таквата заднина ги поставува темелите за клучна недела, при што инвеститорите го пренасочуваат вниманието кон годишниот симпозиум за економска политика на Федералните резерви (Фед) во Џексон Хоул, Вајоминг, кој започнува в четврток, а каде што се очекува да се видат потенцијални сигнали за патот на каматните стапки.

„Парите моментално само чекаат настрана додека не се појави нов сигнал што ќе ги помести пазарите кон нови максимуми“, рече Ник Твидејл, главен аналитичар во „АТФХ глобал маркетс“ (ATFX Global Markets) во Сиднеј. „Инвеститорите се подготвуваа за нестабилност по разговорите, но тоа не се случи и затоа сега до крајот на неделата ќе се фокусираат на новините од централните банки, со огромен фокус на Федералните резерви“.

Bloomberg Mercury

 

По вчерашната средба со украинскиот претседател и со европските лидери во Белата куќа, Трамп му се јави на Путин и го повика рускиот лидер да почне да прави планови за состанок со Зеленски.

Предлогот - кој Трамп го претстави како средба еден на еден меѓу лидерите на Украина и Русија, по кој ќе следува состанок на кој ќе учествуваат сите тројца - претставуваше најнов пресврт во напорите на американскиот претседател да посредува во брзо завршување на конфликтот, кој трае повеќе од три години.

Луѓето во Украина и во Русија „се изморени од војната, а тоа обично е добар предуслов за завршување една војна“, рече Ручир Шарма, основач на „Брејкаут капитал партнерс“ (Breakout Capital Partners LP), во интервју за телевизијата „Блумберг“. „Постои потенцијал за раст во следните неколку месеци. Најголем корисник ќе биде Европа во однос на завршувањето на украинската војна“.

Што велат стратезите на „Блумберг“

„Мировниот процес веројатно ќе биде долг. Како резултат на тоа, се наѕира пониско ценовно ниво за нафтата, додека акциите и другите средства може да ги остават настрана геополитичките прашања засега бидејќи се фокусираат на перспективите на монетарната политика на САД“, вели Гарфилд Рејнолдс, лидер на тимот на МЛИВ (MLIV).

Во меѓувреме, се очекува претседателот на американските Федерални резерви, Џером Пауел, да ја открие новата рамка на политиката на Фед - стратегијата што ќе ја користи за да ги постигне своите цели за инфлација и вработување. Пауел може да даде и некои навестувања за тоа во која насока размислуваат надлежните од Фед пред состанокот за монетарната политика во септември.

Обложувањата за каматите покажуваат приближно 80 проценти шанса дека Федералните резерви ќе ги намалат стапките следниот месец за 25 базични поени, со две намалувања предвидени до крајот на годината.

„Засега се чини дека инвеститорите се обложуваат дека знаците на слабост на пазарот на трудот ќе го надминат ризикот од инфлација во дебатата на Федералните резерви за намалување на стапките“, рече Крис Ларкин од „Морган Стенли“.

Корпоративни вести:

• Акциите на „Интел“ пораснаа во тргувањето по затворањето откако „Софтбанк“ (SoftBank Group Corp.) се согласи да купи акции на „Интел“ (Intel Corp.) во вредност од две милијарди долари, изненадувачки договор, чија цел е да го поткрепи американското име, кое се бори со проблеми, а наедно да ги зајакне сопствените амбиции за чипови. Акциите на „Софтбанк“ паднаа.
   
• „Шејн“ (Shein Group Ltd.) размислува да ја врати својата база во Кина, со надеж дека тоа ќе им помогне на властите во Пекинг да ги одобрат плановите на малопродавачот на брза мода да излезе на берза во Хонгконг.
   
• Основната добивка на БХП (BHP Group) за целата година се намали за повеќе од една четвртина и падна на најниско ниво од пандемијата, што во голема мера е во согласност со пазарните очекувања.

Во моментов нема коментари за веста. Биди прв да коментира...

Остави коментар