Зошто пораснаа акциите на „Алфабет“, а паднаа на „Мета“ и „Мајкрософт“?

Пазарот ја награди „Алфабет“, матичната компанија на „Гугл“, а ги казни „Мета платформс“ и „Мајкрософт“ откако трите гиганти кои се дел од групата „Величествени 7“ во средата ги објавија резултатите од работењето во третиот квартал годинава. Имено, по објавата, вредноста на акциите на „Алфабет“ порасна за околу седум проценти, а на „Мета платформс“ и на „Мајкрософт“ падна за осум и за четири проценти соодветно. Заедничко за сите компании е што продолжуваат да вложуваат милијарди во развој на производи и услуги базирани на вештачка интелигенција и покрај засилените стравувања дека станува збор за сектор кој создава балон на пазарот. Всушност, првичната реакција на пазарот по последните квартални резултати го отсликува степенот на доверба на инвеститорите во оправданоста на огромните трошења во вештачката интелигенција односно подготвеноста на компаниите да ги надоместат овие трошоци преку приходи од други услуги и производи. 

Карта во ракавот

За разлика од „Мајкрософт“ и „Алфабет“, „Мета платформс“ не е голем снабдувач на клауд-услуги (cloud computing) за надворешни клиенти, што значи декаа нејзиниот бран на трошење може да биде поризичен бидејќи повеќе инвестира во сопствени производи и услуги базирани на ВИ. И „Алфабет“ и „Мајкрософт“ велат дека зголемувањето на нивните капитални расходи е поттикнато од зголемената побарувачка од клиентите, додека инвестициите на „Мета платформс“ се поттикнати од сопствените потреби на компанијата.

„Доколку „Мајкрософт“ и „Алфабет“ ја преценат потребата за услуги за вештачка интелигенција, тие веќе имаат начин да го продадат вишокот компјутерска моќ на други. И таа надворешна побарувачка останува здрава. Двете компании објавија огромно зголемување на нивните заостанати нарачки - бројка којашто покажува колку клиентите се обврзале да потрошат во иднина“, се наведува во анализата објавена на терминалот на „Блумберг“.

Сепак, одделот за клауд-услуги „Азуре“ (Azure) кој е главното средство на „Мајкрософт“за враќање на тие инвестиции забележа раст на приходите, но тој беше со приближно иста стапка како и претходниот квартал. Повисока стапка на раст би дала поголема сигурност дека прекумерното трошење вреди.

Во меѓувреме, „Гугл“ на „Алфабет“ даде поохрабрувачки изгледи. Клауд-платформата на „Гугл“ склучила повеќе договори тешки милијарди долари во првите девет месеци од 2025 година отколку во претходните две години, според финансискиот директор Анат Ашкенази. Всушност, приходите од клауд-услуги на „Гугл“ се зголемија за 34 проценти на 15,2 милијарди долари, надминувајќи ја проценката од 14,8 милијарди долари.

ФОМО кај „Мета платформс“

„Мета платформс“ во средата соопшти дека зголемените инвестиции во вештачката интелигенција, како за вработување на истражувачи, така и во центри за податоци, им наштетиле на нејзините оперативни маржи на профит и го намалиле слободниот паричен тек за една третина во третиот квартал. Од крајот на минатата година, готовинскиот биланс на „Мета“ се намалил за 43 проценти. Сепак, првиот човек на компанијата, Марк Закерберг во среда вечерта изјави дека планира уште повеќе да ги зголеми трошоците следната година за да ја задоволи постојаната внатрешна побарувачка за поголем капацитет за пресметување со вештачка интелигенција и за развој на сопствени производи за вештачка интелигенција.

„Мислам дека е вистинската стратегија агресивно однапред да се гради капацитет за да бидеме подготвени за најоптимистичките случаи“, им рече тој на аналитичарите.

За време на состанокот за приходите, Закерберг рече дека компанијата има опции ако на крајот испадне дека троши премногу на инфраструктура. Во едно сценарио, слично како и конкурентите би можела да ја продаде компјутерската моќ на други компании.

„Сè уште не сме го направиле тоа“, рече тој. „Но, очигледно, ако стигнете до точка каде што сте претерале со градењето, би можеле да го имате тоа како опција.“

Според Закерберг, поголема опасност во однос на вештачката интелигенција е трошењето премалку, а не премногу.

„Мислам дека е доста рано, но мислам дека ги гледаме приносите во основната дејност“, рече тој. „Тоа ни дава голема доверба дека треба да инвестираме многу повеќе и сакаме да бидеме сигурни дека нема да инвестираме недоволно.“

Со помош на Мет Деј, Курт Вагнер, Броди Форд, Рајли Грифин и Кармен Аројо/Блумберг.