text size
Европските индустриски компании се очекува да покажат подобри резултати од сите други сектори во текот на ова тримесечје, поттикнати од растот на вложувањата во вештачка интелигенција (ВИ) и одбраната, што го подобрува изгледот за производителите на инфраструктура и оружје.
Според податоците на „Блумберг интелиџенс“ (Bloomberg Intelligence), индексот MSCI Europe Industrials треба да забележи раст на добивката по акција од 4,9 отсто за третиот квартал – повеќе од кој било друг сектор во регионот.
Добивките на индустриските компании се очекува да ги надминат сите други сектори
Прочитај повеќе
„Сименс“ планира да ја изгради најсилната турбина на ветер
Kомпанијата се обидува да ја задржи својата лидерска позиција во еден од најбрзорастечките енергетски сектори.
11.06.2024
„Сименс“ и „Мајкрософт“ развиваат асистент со вештачка интелигенција за во фабриките
„Тоа ќе го сведе на минути времето на задачи што претходно траеле со недели“, велат од „Сименс“.
01.11.2023
Барањата на Трамп до НАТО им даваат ветар во грб на европските производители на оружје
Барањата на Трамп кон НАТО го променија односот на Европа кон одбраната – земјите сега вложуваат повеќе во домашно оружје и сопствена индустрија.
05.10.2025
Европа заостанува во војната со дронови – нема доволно противвоздушна одбрана
Зголемените руски упади со дронови ја принудија Европа да гради „ѕид од дронови“, но недостигот од пари и технологија ја одложува реализацијата.
01.10.2025
Bloomberg
Растот главно ќе биде поттикнат од секторот за опрема и капитални добра, кој, според стратегот Каиди Менг од „Блумберг интелиџенс“, се очекува да постигне зголемување на добивката по акција од 15 отсто за овој период. Половина од тој раст доаѓа од три водечки компании: германската енергетска фирма „Сименс енерџи“ (Siemens Energy AG), швајцарската компанија за автоматизација АББ (ABB Ltd.) и италијанскиот производител на кабли „Присмијан“ (Prysmian SpA).
Овие три компании се дел од трендот на електрификација, кој произлегува од растот на вложувањата во ВИ и проширувањето на дата-центрите, изјави стратегот Лорен Дуеје од „Блумберг интелиџенс“. „Бидејќи пазарот очекува уште поголеми инвестиции во ВИ следната година, овој сегмент продолжува успешно да расте“, додаде тој.
АББ работи на развој на следната генерација дата-центри за ВИ во соработка со „Енвидија“ (Nvidia Corp.). Очекуваната цена на акцијата на „Присмијан“ неодамна беше зголемена од страна на „УБС груп“ (UBS Group AG), која го истакна силното присуство на компанијата на американскиот пазар на дата-центри. Аналитичарот Вивек Мидха од „Ситигруп“ (Citigroup) оцени дека компанијата има стабилен раст и очекува подобра прогноза при објавата на резултатите кон крајот на октомври.
„Невидената побарувачка и стабилната реализација на нарачките кај ‘Сименс енерџи’ најверојатно ќе доведат до зголемување на среднорочните цели на резултатите за четвртиот фискален квартал во ноември“, велат аналитичарите Омид Вазир и Полин Ешбах од „Блумберг интелиџенс“. „Побарувачката за гасни турбини и технологија за електрични мрежи ги надминува очекувањата, поттикната од електрификацијата и растот на дата-центрите во САД.“
Зголемените трошоци за одбрана исто така се клучен фактор за растот на секторот, при што се очекуваат силни квартални резултати и позитивни прогнози од производителите на воена опрема како „Рајнметал“ (Rheinmetall AG), „Талес“ (Thales SA) и „Леонардо“ (Leonardo SpA).
Аналитичарите ги зголемија очекувањата за индустрискиот сектор
Bloomberg
Поттикнат од растот на вештачката интелигенција (ВИ) и трошоците за одбрана, европскиот индустриски сектор е еден од само два што бележат позитивни ревизии на процените во последниот период – заедно со финансискиот сектор. Во меѓувреме, очекувањата за поширокиот индекс Stoxx Europe 600 се намалуваат, бидејќи инвеститорите сè повеќе предвидуваат послаба сезона на добивки.
Според стратегот Лорен Дуеје од „Блумберг интелиџенс“, предноста на индустрискиот сектор може да продолжи и следната година, бидејќи трендовите на електрификација и одбранбени вложувања остануваат силни. Дополнителен поттик може да дојде од големите инфраструктурни инвестиции во Германија и позитивниот ефект од пониските каматни стапки врз градежниот пазар.
Европските индустриски компании го надминуваат поширокиот пазарен индекс
Bloomberg
Компаниите, сепак, се соочуваат и со низа предизвици.
Индустриското производство во Германија се намали за 4,3 отсто во август во споредба со претходниот месец, што, според Вазир и Такер од „Блумберг интелиџенс“, веројатно се одразило врз резултатите во третиот квартал на европските производители на капитални добра со силна поврзаност со автоиндустријата. Ова особено се однесува на автомобилската дивизија на СКФ (SKF AB), индустрискиот технолошки сегмент на „Атлас Копко“ (Atlas Copco AB) и дигиталните индустрии на „Сименс“.
Дополнителен притисок може да предизвикаат и царинските бариери, кои би можеле да ја намалат побарувачката и да влијаат врз цените, зголемувајќи ги трошоците за ублажување на ефектите.
„Прашањето е колку од овие компании испорачаа производи во првиот и почетокот на вториот квартал за да ги избегнат царините и како ќе се движат обемите во втората половина за да се нормализираат нивните резерви“, изјави Дуеје.
Ескалацијата на трговската војна меѓу САД и Кина може да биде уште еден сериозен ризик, бидејќи двете земји преземаат нови контрамерки пред продолжувањето на трговските разговори. Тоа може да доведе до намалена побарувачка за европските индустриски производи во Кина, додека кинеските компании би можеле да станат поконкурентни и да преземат дел од пазарниот удел на европските ривали, предупреди Дуеје.
Флуктуациите на валутите претставуваат дополнителен предизвик, особено за шведските индустриски компании, кои се чувствителни на слабеењето на доларот и зајакнувањето на шведската круна.
.webp){kind=icon}
