Недостатоците во ВИ ја загрозуваат европската стабилност

Европа ужива во момент на пробив како главен корисник од глобалната ротација надвор од технолошките акции. Сепак, нејзиниот имунитет против слабостите во трговијата со вештачка интелигенција веројатно нема да трае долго. 

Stoxx 600 повторно достигнува рекорди во биковски тренд што е поддржан од подобрувања на заработките, позитивен тек на економски индикатори и полесно инвеститорско позиционирање во споредба со САД. Заостанатите сектори, како здравството, основните производи и финансиските услуги, имаа успешен месец. 

Меѓутоа, технолошкиот сектор се бори да се одржи. Иако овој сектор нема толкава тежина како во САД и Азија, Европа исто така ќе биде изложена на ризик доколку ослабне. ВИ-компании како „АСМЛ холдинг“ („ASML Holding NV“), „Инфинеон“ („Infineon Technologies AG“) и АББ („ABB Ltd.“) сочинуваат девет од дваесетте најголеми придонесувачи во Stoxx 600 оваа година, а тие генерираа 47 отсто од добивките на индексот. 

 

Дваесетте акции со најголем придонес за приносот на индексот Stoxx Europe 600

Само девет компании поврзани со вештачка интелигенција учествуваа со околу 47 проценти од приносите оваа година

 

 

Извор: Бloomberg

„Европскиот пазар останува проценет како совршен, со очекувања за маржите на рекордно високо ниво и ризични премии на најниско ниво во последниве 20 години, во време кога моделите на вештачка интелигенција сè повеќе ризикуваат да станат комодитет“, изјавија стратезите на Банката на Америка („Bank of America Corp.“), предводени од Себастијан Раедлер. „Ова би можело да ги доведе во прашање очекувањата за капитални инвестиции во вештачката интелигенција и да се закани со обратен тек на замавот воден од вештачката интелигенција.“ 

Од пооптимистички аспект, стратезите рекоа дека плановите за фискален стимул на Германија конечно ќе имаат ефект. Растот на домашната побарувачка во еврозоната веројатно ќе се забрза до крајот на годината, додека инфлацијата се намалува и Европската централна банка звучи забележливо помалку агресивно. 

Сите овие фактори создаваат момент на ‘мини Златокоса’, рекоа стратезите. Како резултат, тие сега претпочитаат акции изложени на домашниот пазар, компании со мала пазарна капитализација и германски акции. 

 

Акциите на производителите на полупроводници ги надминуваат пазарните приноси и заработката

Процените за заработката го поддржуваат трендот, но очекувањата се високи

Bloomberg

Различните патишта на монетарната политика на ЕЦБ и Фед се клучни. Европските официјални лица се потрудија да нагласат дека понатамошните зголемувања на каматните стапки се далеку од сигурни. Пазарот на каматни стапки значително се рекалибрираше по прекинот на огнот во Иран и сега едвај вградува едно целосно зголемување во следните 12 месеци, во споредба со речиси три пред еден месец. 

За споредба, отпорниот економски раст на САД предизвика агресивно преценување на очекувањата за каматните стапки на Фед, што ги турна реалните приноси и доларот материјално повисоко. 

„Нервозата околу технолошкиот сектор и Фед ги погоди стратегиите засновани на замав“, изјавија стратезите на „Берклис“ (Barclays Plc), предводени од Емануел Кау. „Бидејќи позиционирањето во моментов е главниот двигател на пазарот, резултатите за вториот квартал ќе бидат клучни за цените повторно да се усогласат со фундаменталните показатели.“

Засега, велат стратезите, обновениот интерес за диверзификација ѝ оди во прилог на Европа, при што пониските цени на нафтата и реформите насочени кон поттикнување на економскиот раст во Германија повторно го враќаат оптимизмот.

 

Цикличните сектори и податоците од производството | Забавувањето на PMI за производство може да поттикне одбранбена ротација во Европа

bloomberg

Стратезите на „Морган Стенли“ („Morgan Stanley“) предводени од Марина Заволок рекоа дека инвеститорите се желни да го прошируваат своето изложување. Иако речиси 70 отсто од европските фондови со долгорочни позиции се претежно насочени кон производителите на чипови и ќе продолжат да ги фаворизираат корисниците од капиталните инвестиции во вештачка интелигенција, внимателната стратегија ќе вклучи и големи компании надвор од овој сектор. 

„Европа нуди голем простор за диверзификација, подобрување на фундаментите и структурно зголемување на дисперзијата на акциите“, рекоа тие. Стратезите препорачуваат зголемување на алокацијата кон банките, додека предупредуваат дека селективноста е клучна во другите сектори. Нивните врвни избори на акции ги вклучуваат „Ербас“ („Airbus SE“), „Сент-Гобејн“ („Saint-Gobain SA“), „Индитекс“ („Inditex SA“), „Ришмон“ („Richemont SA“), „Астра Зенека“ („AstraZeneca Plc“) и „Бритиш Американ тобако“ („British American Tobacco Plc“).