Падот на азиските технолошки акции отвора можност за инвестиции во ВИ

Падот на азиските акции предизвикан од војната го поттикнува интересот на глобалните инвеститори за зголемување на изложеноста кон големите компании за чипови, што ја одразува довербата дека бумот на вештачката интелигенција може да го издржи конфликтот на Блискиот Исток.

Менаџерите на фондови од „Абердин“ (Aberdeen Investments), „Инвеско“ (Invesco Ltd.) и „Фиделити“ (Fidelity International) ги зголемуваат своите обложувања на ВИ, тврдејќи дека последната распродажба е повеќе резултат на панично продавање отколку на влошени деловни услови.

Клучен азиски берзански показател минатата недела падна за повеќе од 6,0 отсто, во споредба со пад од 2,0 отсто кај индексот S&P 500, што укажува на можна претерана реакција на пазарите во регионот. Пред избувнувањето на војната со Иран, водечките производители на чипови од Јужна Кореја и Тајван беа меѓу најголемите добитници од стравувањата на Волстрит за нарушувачкото влијание на вештачката интелигенција, благодарение на нивната доминација во глобалниот синџир на снабдување.

Bloomberg

„Оваа волатилност ја гледаме како можност за дополнително купување во услови на корекција на пазарот“, изјави Прукса Иамтонгтонг, раководител за акции во регионот Азија-Пацифик во „Абердин“ (Aberdeen Investments). „Неодамнешната распродажба е помалку поттикната од фундаменталните фактори, а повеќе од обновените стравувања од стагфлација поради повисоките цени на нафтата.“

Американско-израелските напади врз Иран имаа поголемо влијание врз Азија отколку врз Волстрит, при што технолошки ориентираниот корејски бенчмарк индекс минатата недела ја претрпе најголемата распродажба во својата историја. Додека инвеститорите ги затвораа позициите изградени со позајмени средства, паничното продавање зема замав и ги повлече надолу гигантите за чипови „Самсунг електроникс“ (Samsung Electronics Co.) и „СК Хајникс“ (SK Hynix Inc.).

И покрај неделниот пад, азискиот берзански референтен индекс и натаму е за повеќе од 7,0 отсто повисок од почетокот на годината, во споредба со загуба од 1,5 отсто кај индексот S&P 500.

„Макроекономската позадина за Азија е развојот на циклусот во индустријата на полупроводници, кој очекувам да остане силен оваа година, поттикнат од капиталните инвестиции во вештачка интелигенција“, изјави Дејвид Чао, глобален стратег за пазари во „Инвеско“ (Invesco Asset Management). Тој смета дека „секој пад претставува можност за купување“, со оглед на солидните фундаментални изгледи.

Според Јан Самсон, портфолио менаџер, „Фиделити“ (Fidelity International) разгледува зголемување на изложеноста кон Тајван, пазар на кој доминираат производители на чипови, вклучувајќи ја и „ТСМЦ“ (Taiwan Semiconductor Manufacturing Co.), . Компаниите за полупроводници од островот се „добар, стабилен и релативно евтин начин за инвестирање во ВИ“, рече тој.

Како знак на подолгорочен оптимизам кон секторот, од шесте аналитичари кои ги ажурирале своите проценки за „Самсунг електроникс“ по распродажбата, петмина имаат препорака за купување или надминување на пазарот, додека еден е неутрален, според податоците на Блумберг.

Bloomberg

Се разбира, можноста за продолжена војна и повторно забрзување на инфлацијата се значајни ризици што инвеститорите не можат да си дозволат да ги игнорираат.

Но за некои клучно е да се примени селективен пристап.

„Не им велиме на клиентите да го следат секој пад кај ВИ акциите“, изјави Стивен Довер, главен стратег за пазари и раководител на Франклин Темплтон институтот.

„Оваа корекција ја користиме за да се префрлиме кон поквалитетни азиски лидери во ВИ и полупроводниците, со видливи парични текови, посилни биланси и појасна улога во глобалниот ВИ екосистем.“