Стратезите од Волстрит: Не очекувајте Трамп да ги спаси акциите потресени од војната со Иран

Додека американските акции во вторник почнаа делумно да ги намалуваат најдлабоките загуби, изгледаше дека трговците повторно почнуваат да се обложуваат дека американскиот претседател Доналд Трамп ќе најде начин да ги ограничи последиците од уште една криза што ја предизвика.

Но, стратезите од Волстрит предупредуваат дека инвеститорите не треба да се потпираат на т.н. „Трамп пут“ кога станува збор за војната со Иран.

„Тоа нè враќа на класичната фраза за војната дека откако ќе започне, таа добива сопствена динамика“, изјави Боб Елиот, главен инвестициски директор во инвестициската компанија „Анлимитед“ (Unlimited) со седиште во Њујорк. „Можноста да се влијае и да се реагира на притисокот што постои на пазарите не е толку лесна како што беше за време на Денот на ослободувањето, кога во суштина претседателот Трамп имаше целосна контрола врз политичките одлуки.“

Нападот на САД и Израел врз Иран го дестабилизира Блискиот Исток и се заканува да предизвика нов инфлаторен шок за американската економија преку растот на цените на нафтата. Воедно, нема јасна претстава кога и како би можел да заврши конфликтот, што ја зголемува можноста за долготрајна војна и непредвидливи последици што се надвор од контролата на Белата куќа.

Тоа ја прави војната со Иран различна од трговската војна на Трамп, неговите изјави за можното преземање на Гренланд или нападите врз независноста на Федерални резерви, кои ги вознемирија инвеститорите во САД и во странство. Во секој од тие случаи, трговците очекуваа дека Трамп ќе се повлече доколку финансиските пазари паднат премногу, стратегија што стана позната како ТАЦО-трговија, скратеница од „Trump Always Chickens Out“ односно Трамп секогаш се повлекува, што создаде менталитет на „купување при пад“, дозволувајќи им на акциите повторно да се опорават.

Тој инстинкт можеби ја ублажи почетната реакција во САД, каде што акциите и обврзниците паднаа значително помалку отколку на пазарите во странство. Во последните два дена акциите отвораа со остар пад, но во текот на трговската сесија постепено ги намалуваа загубите. Во вторникот индексот S&P 500 заврши со пад од 0,9 отсто, откако претходно во текот на денот падна и до 2,5 отсто.

„Како и секогаш кога имаме распродажба, по првиот пад се појавија купувачи со логично ниво на поддршка, а трговците водени од стравот да не ја пропуштат шансата го туркаа почетниот раст уште повисоко“, изјави Стив Сосник, главен стратег во „Интерактив брокерс“ (Interactive Brokers).

Купувачите се враќаат 
Акциите отскокнуваат од најниските нивоа во конфликтот со Иран

Bloomberg

Трамп во вторникот изјави дека САД ќе обезбедат гаранции за осигурување и поморска придружба за нафтените танкери и другите бродови што минуваат низ Ормускиот Теснец, со цел да се спречи можна енергетска криза предизвикана од конфликтот.

Но, остриот раст на цените на нафтата се заканува дополнително да ја засили инфлацијата во САД и отвори сомнежи дали Фед ќе продолжат со намалување на каматните стапки. Во последните недели акциите веќе беа под притисок поради стравувањата од влијанието на вештачката интелигенција, појавата на проблеми на кредитните пазари и забавувањето на растот на вработувањето.

Инвестицискиот стратег во „Бејрд“ (Baird), Рос Мејфилд, изјави дека ризикот од значителна штета врз нафтената инфраструктура на Блискиот Исток би можел да ги продолжи последиците од војната, без оглед на тоа колку брзо ќе заврши конфликтот.

Администрацијата на Трамп сигнализира дека бомбардирањата би можеле да траат со недели, но не даде јасно објаснување што би значело крај на конфликтот. Засега, аналитичарите велат дека реакцијата на пазарите не е доволно силна за да предизвика сериозна загриженост во Вашингтон, како што беше случај во април, кога поширокиот пад на пазарите го натера Трамп привремено да ги запре царините.

Мет Герткен, главен геополитички и политички стратег за САД во „БЦА“ (BCA Research), изјави дека за да се создаде значителен притисок врз Белата куќа би бил потребен ризик од „рецесија предизвикана од пазарите“, односно пад на акциите од околу 10 до 15 отсто.

„Потребно е падот да биде многу подлабок за навистина да стане проблем за Трамп“, изјави Џина Мартин Адамс, главен пазарен стратег во „ХБ Велт“ (HB Wealth Management). „Треба да биде многу, многу подлабок.“

Џон Бригс, раководител за американските каматни стапки во „Натиксис“ (Natixis), се согласува со овој став. Тој изјави дека би бил потребен раст на приносите на обврзниците што би бил „дестабилизирачки и би се прелеал на кредитните и акциските пазари“ за да го поттикне Трамп да се обиде да се извлече од конфликтот.

Сепак, без оглед на потезите на Трамп, движењето на акциите во голема мера може да зависи од тоа како конфликтот ќе влијае врз цените на нафтата. Во минатото акциите обично растеле за време на конфликти на Блискиот Исток, сè додека цената на суровата нафта не скокне за 75 отсто или повеќе во споредба со претходната година, укажува главниот инвестициски директор и главен стратег за американските акции во „Морган Стенли“ (Morgan Stanley), Мајк Вилсон.

Лори Калвина, од „РБЦ“ (RBC Capital Markets),  изјави дека инвеститорите треба да бидат внимателни со историските преседани што покажуваат дека купувањето акции по пад предизвикан од геополитички настани често носи добивка. Таа предупреди дека доказите за закрепнување на акциите не секогаш ги одразуваат ризиците од пошироки војни.

„Ова искуство, заедно со 2022 година кога Русија ја нападна Украина и САД доживеаја силен инфлаторен скок по пандемијата, нè потсетува дека е многу тешко геополитичките настани да се анализираат изолирано кога станува збор за берзата.“

Кит Бјукенен од „Глобалт инвестментс“ (Globalt Investments) изјави дека војната со Иран носи слични ризици за САД како оние што ги предизвика војната меѓу Русија и Украина, која ги зголеми цените на енергијата, ја поттикна инфлацијата и придонесе за падот на берзите во 2022 година, кога Фед ги зголемуваа каматните стапки.

Дополнително, тој нагласи дека Трамп „не го контролира копчето за исклучување“.

„Вклучени се и други многу моќни актери“, изјави Бјукенен, портфолио менаџер во компанијата. „Ова е подлабока и подолготрајна ситуација од некои други случаи.“