Роберт Киосаки, популарниот автор на книги за финансиска едукација, го промени својот став за најперспективниот облик на инвестирање.
Авторот на успешната книга „Богат татко, сиромашен татко“ (Rich Dad, Poor Dad) која е преведена на 51 јазик и продадена во повеќе од 41 милион примероци ширум светот, беше познат по својот став дека недвижностите се клучна форма на сопственост. Тој го истакнува тоа во повеќето свои книги. Но, сега се предомисли. На својот официјален твитер-профил ги објави причините поради кои повеќе не препорачува инвестирање во недвижности. Твитот ги воодушеви инвеститорите во криптовалути, но и ги изненади оние кои преферираат недвижности.
Киосаки нагласува дека сега претпочита инвестиции во биткоин и благородни метали како среброто и златото. Истакнува дека причината за тоа е опишана во книгата објавена во 2022 година со наслов Капиталистички манифест: Пари за ништо - сребро, злато и биткоин (Capitalist Manifesto: Money for Nothing – Silver, Gold and Bitcoin).
Тој посочува дека од 2020 година станало многу потешко да се инвестира во недвижен имот, бидејќи новоизбраната американска влада одлучи да ги зголеми даноците на недвижностите и да спроведе контрола врз изнајмувањето станови. Како уште еден параметар за намалувањето на вредноста на недвижностите го споменува зголемувањето на каматите што се случува овие месеци.
Киосаки додава дека биткоинот не може да го заштити паричниот приход, но може да го заштити богатството. Авторот наведува дека го предвидел колапсот на американската економија уште во 90-тите и како една од причините за оваа ситуација ја наведува кризата од 2008 година. Смета дека за ваквата состојба придонело печатењето, односно издавањето дополнителни суми пари, особено во последните две години.
.webp){kind=icon}