text size
Трговците со крипто избегнуваат даноци од милијарди долари со искористување на дивите промени на цените и „собирање“ на загубите за да можат да ги надоместат со други профити, се вели во труд објавен од Националното биро за економски истражувања. Анализата, заснована на базата на податоци од 500 големи трговци на мало и милијарди трансакции на 34 криптоберзи, покажа дека главно нерегулираната класа на средства станува потпора за избегнување данок.
Тргувањето со крипто експлодира откако се појави во 2009 година. Пазарот вредеше повеќе од една илјада милијарди долари во првата половина на 2022 година, а речиси една третина од Американците на возраст од 18 до 29 години тврдат дека инвестирале, тргувале или користеле некоја криптовалута. Регулаторите се борат да одржат чекор со трендот.
Трговците избегнуваат даноци од дури 50 милијарди долари годишно така што не ги пријавуваат своите добивки, процени минатата година генералниот директор на „Барклис“ (Barclays Plc), Џозеф Абате.
Американската даночна управа почна да се бори така што бара од брокерите до крајот на годинава да ги пријават криптотрансакциите во вредност од најмалку 10.000 долари. Меѓутоа, зголемената контрола го менува однесувањето. Некои трговци едноставно се префрлаат од нелегално затајување на легално избегнување, пишува во објавениот труд. Наместо да ги кријат добивките, трговците избегнуваат даноци со пријавување загуби користејќи „лажни трансакции за перење“ што се забранети на регулираните пазари на хартии од вредност (станува збор за облик на пазарни манипулации со кои инвеститорот истовремено продава и купува исти финансиски инструменти за да создаде погрешна, вештачка активност на пазарот). Ваквите трансакции се продажби што ги кристализираат загубите пред средствата да се откупат речиси веднаш. Кристализирањето на загубите за да се компензираат другите профити и да се намали вкупната даночна сметка е познато како „берба на даночни загуби“. На пазарите на хартии од вредност стратегијата не е дозволена доколку истото средство се купи 30 дена пред или по продажбата.
„Потребата за надзор и јасна политика за оданочување на крипто е меѓу најитните, бидејќи постојните даночни закони и регулативи не се дизајнирани да се справат со порастот на криптосредствата“, велат авторите на трудот. Нивната анализа покажа дека откако Даночната управа почна да ја засилува својата контрола, бербата на даночните загуби е за осум отсто повисока кај домашните американски трговци во критичните периоди, како што се крајот на годината или падот на пазарот, во однос на меѓународните конкуренти.
Авторите исто така предупредија дека поголема контрола може да ги поттикне луѓето да ги префрлат тргувањата и трансакциите на берзи надвор од САД. Тие сметаат дека американските регулатори ќе треба да се координираат меѓународно за тоа каков данок да се наплати, но и за да се спречи едноставното преселување на берзи во странство.
.webp){kind=icon}
