.webp){kind=icon}
Тужбата на Комисијата за хартии од вредност на САД (SEC) против криптоберзата „Бајненс“ (Binance) и нејзиниот шеф Чангпенг Жао внесува нова несигурност во секторот кој се бори да ја одржи својата мејнстрим релевантност.
SEC ги обвини „Бајненс“ (Binance Holdings Ltd.) и Жаo за лошо управување со средствата на клиентите, грешно наведување на инвеститорите и регулаторите и кршење на правилата за хартии од вредност. Акцијата го зголемува регулаторниот притисок врз најголемата платформа за тргување со дигитални средства. Тоа е, исто така, уште еден удар за криптосекторот по падот во 2022 година, што влијаеше за колапс на ривалот FTX во услови на низа наводи за измама.
Пазарот се соочува со тешка задача да ја врати довербата, додека во меѓувреме инвеститорите се префрлаат на теми како акции на вештачка интелигенција. Вкупната вредност на дигиталните токени падна на 1,1 билион долари од врвот од над 3 билиони долари во 2021 година, кога џиновскиот стимул во ерата на пандемијата поттикна бум кај токените како биткоинот.
„Џејн Стрит Груп“ (Jane Street Group, LLC), „Џамп Трејдинг“ (Jump Trading) и други големи трговски фирми се повлекоа од крипто во САД во услови на зголемена регулаторна контрола. Намалувањето на ликвидноста може да претставува пречка за инвеститорите со тоа што ќе го отежне влегувањето и излегувањето од инвестициите во дигитални средства на уреден начин.
„Многу поинаку“
„Индустријата ќе биде многу поинаква за една година“, напиша во белешка Маркус Тилен, шеф на истражување во „Матрикспорт“. „Волуменот на тргување веројатно дополнително ќе се намали и ќе ги притисне проекциите за приходите на креаторите на пазарот. Криптото во САД ќе продолжи да минува низ нуклеарна зима“.
Depositphotos
Американскиот регулатор во жалбата наведе 12 токени како средства што спаѓаат во негова надлежност, проширувајќи ја листата на токени кои се сметаат за нерегистрирани хартии од вредност за да опфаќа криптосредства вредни повеќе од 115 милијарди долари. Тоа подразбира дека треба да се применуваат строги правила, што би можело да ја отежне трговијата со токените доколку берзите се дистанцираат од работа со нив.
Цените на дигиталните средства во вторникот главно го задржаа падот предизвикан од тужбата. Индексот на топ 100 токени опадна за околу 4 отсто откако приговорот се појави во понеделникот. Биткоинот, најголемиот токен, падна поблиску до нивото од 25.000 долари.
Нето одливот од берзата „Бајненс“ достигна 702 милиони долари во понеделникот, што е најмногу од февруари, според контролната табла на „Дјун аналитикс“ (Dune Analytics).
Најголемиот дигитален токен се повлекува кон нивото од 25.000 долари
Bloomberg
„Бајненс“ ја нарече акцијата на регулаторот SEC „разочарувачка“, посочувајќи дека со добра волја започнале разговори со комизијата со цел да се реши проблемот.
„Иако ги сфаќаме сериозно наводите на SEC, тие не треба да бидат предмет на спроведување, особено не на итна основа“, велат од фирмата. „Ние имаме намера енергично да ја браниме нашата платформа“.
Берзата се соочува со низа истраги, вклучително и тужба од страна на американската комисија за тргување со фјучерси на стоки. Акција на американското Министерство за правда „против 'Бајненс' и/или поврзани субјекти и поединци веројатно нема да изостане“, напиша во белешка Елиот Стајн, постар аналитичар за правни постапки на „Блумберг интелиџенс“.
Бум, пад
За некои крипто експерти, секторот само го следи очекуваниот циклус на бум и пад. Тие укажуваат на враќањето од 56 отсто на биткоинот во текот на годинава како доказ дека заздравувањето е во тек.
„Неодамна во март, адвокатите на SEC јавно кажуваа дека 'Бајненс' води нерегистрирана берза за хартии од вредност и затоа знаевме дека овој ден неизбежно ќе дојде“, рече Ноел Ачесон, авторка на билтенот „Крипто е сега макро“ (Crypto Is Macro Now). „До одреден степен можевме да видиме и извесно олеснување откако тоа се случи“.
Надвор од САД, локации како што се Хонгконг и Дубаи се обидуваат да се додворат на инвестициите во крипто. Европската унија во април ги одобри најсеопфатните правила за дигитални средства досега.
Тоа потенцијално им дава на криптофирмите попријатни места за да се обидат да закрепнат од длабокото ограничување и да ги научат лекциите од минатогодишниот пад. „Недостатокот на американска регулаторна транспарентност ќе го придвижи криптото кон други јурисдикции“, рече Цици Лу, основач на советодавната фирма за блокчејн „Вен Линк Партнерс“ (Venn Link Partners).
