Обврзниците на азиските пазари во развој се нов хит меѓу инвеститорите

Инвеститорите во обврзници загрижени за растечките фискални дефицити се свртуваат кон необично засолниште: земјите во развој.

Додека долгорочните обврзници на развиените пазари се под притисок годинава поради загриженоста на инвеститорите за владините трошења, обврзниците од земјите во развој во Азија стануваат сè поатрактивни. Приносите опаѓаат, странски средства се влеваат, а неодамнешните аукции на државен долг бележат силна побарувачка — за разлика од познатите продажби во САД и Јапонија кои не поминаа најдобро.

„Се очекува многу држави во регионот да бидат погодени од царините, но досега не видовме активирање на фискални стимули. Повеќето држави и понатаму се придржуваат до ниски буџетски дефицити,“ вели Јифеи Динг, портфолио менаџер во „Инвеско Хонгконг“ (Invesco Hong Kong Ltd.), кој смета дека обврзниците од пазарите во развој сега нудат добра вредност.

Оваа инвестициска логика го истакнува силниот пресврт на глобалните пазари годинава. Кога американските обврзници беа потресени во април поради страв од новите царини, поранешниот секретар за финансии Лоренс Самерс рече дека тие веќе се однесуваат како обврзници од земји во развој. Сега, инвеститорите сѐ повеќе се свртуваат кон вистинските обврзници од тие земји.

Bloomberg Mercury

 

Резултатите од првичните аукции тоа го потврдуваат. Продажбата на индонезиски државен долг на почетокот од јули привлече најголем интерес од 2020 година наваму. Понудата на тајландски 30-годишни обврзници на 2 јули имаше највисок однос понуда-побарувачка во последните две години. Слична понуда од Малезија во јуни исто така наиде на огромна побарувачка.

Приносите на обврзниците од земјите во развој опаѓаат во изминатата година, додека оние во развиените држави се зголемуваат, покажуваат податоците на Блумберг. Цената на кредитните деривати (CDS) — инструмент за осигурување од државен банкрот — опаднала значително повеќе кај азиските земји во развој отколку кај развиените, откако претседателот Доналд Трамп ги најави царините на „Денот на ослободувањето“ во април.

Суверените кредитни рејтинзи за големите азиски економии изгледаат отпорни со оглед на нивните силни девизни резерви, ограниченото потпирање на долгот во странство и здравите салда на тековните сметки, напиша аналитичарот на „Голдман Сакс“ Кенет Хо во белешка од 10 јули.

Фискална дисциплина

Разликата во перформансите на пазарите на обврзници не се должи само на фискалната политика. Обврзниците од земјите во развој и понатаму нудат повисоки приноси од американските или европските. Често има и помала понуда. Централните банки во овие земји можеби имаат поквалитетни информации за инфлацијата, што им овозможува порано да ги намалат каматните стапки отколку Федералните резерви.

Опаѓањето на доларот за околу 8.3 отсто годинава исто така е голем фактор. Инвеститорите што очекуваат ваквиот тренд да продолжи, природно гледаат кон обврзници во други валути.

Но, подобрената фискална одговорност во земјите во развој исто така ја менува рамнотежата. Додека фискалниот дефицит на САД се зголеми од 3.7 отсто во 2022 на 7.3 отсто минатата година, просечниот дефицит во азиските земји во развој се намали благо на 6.7 отсто, според ММФ.

„Многу држави беа неподготвени да водат политики на раст преку дефицит,“ вели Раџив де Мело, глобален портфолио менаџер во „Гама Асет Менаџмент“ (Gama Asset Management). „Монетарната и фискалната дисциплина помогнаа да се задржи инфлацијата и им дозволија на политичарите во земјите во развој да ги намалат каматните стапки, дури и додека Федералните резерви не правеа ништо.“

Bloomberg Mercury

 

Постои надеж и за некои држави надвор од Азија. Романија неодамна излезе на пазарите со евро и доларски обврзници по најавата на план за штедење, што предизвика пораст на побарувачката. Аргентина повторно бележи примарен буџетски суфицит благодарение на агресивните кратења од страна на претседателот Хавиер Милеј.

Сепак, најјасните потези на пазарот доаѓаат од Азија. Според податоците на Блумберг, глобалните фондови во вториот квартал вложиле 34 милијарди долари во државни обврзници на Тајланд, Индонезија, Малезија, Индија и Јужна Кореја — најголем квартален прилив во последните две години.

 

-Со помош на Џаехуин Еом, Зиџија Сонг и Бенџамин Харви.