Што се случува со американските 30-годишни обврзници?

Американските 30-годишни државни обврзници паднаа трет ден по ред, туркајќи ги приносите на највисоко ниво за повеќе од еден месец пред објавувањето на клучниот извештај за инфлацијата.

Обврзниците паднаа низ кривата, при што приносите на 30-годишните обврзници се искачија за околу два базични поени повисоки на околу 4,97 отсто до доцна попладне во понеделникот во Њујорк.

Движењата, делумно, ги следеа другите пазари, бидејќи инвеститорите низ целиот свет се повеќе загрижени за способностите на владите да ги ограничат буџетските дефицити. Но, во САД, инвеститорите се фокусирани на објавувањето на индексот на потрошувачки цени за јуни во вторник, за кој некои стратези на Волстрит очекуваат да ги покаже ефектите од трговските царини на претседателот Доналд Трамп.

Марк Кабана, раководител на стратегијата за американски стапки во  BofA Securities, рече дека зголемувањето би можело да го принуди пазарот да ја преиспита патеката по која оди ФЕД.

Трговците гледаат околу 65 отсто шанса за намалување на каматните стапки во септември, додека претходно целосно го прогнозираа кратењето на каматите на септемврискиот состанок на ФЕД.

Повисоката од очекуваната инфлација „ќе му даде на пазарот мала пауза“, рече тој на „Блумберг ТВ“. „Можеме ли да ги оправдаме овие 15-ина базични поени намалување на каматните стапки што се предвидени во септември или речиси двете целосни намалувања што се предвидени до крајот на годината? И мислиме дека пазарот ќе сфати дека не.“

Bloomberg Mercury

 

Бројките може да послужат како материјал за голем број претставници  на Федералните резерви оваа недела. Трамп, во меѓувреме, ги засили нападите врз претседателот на Федералните резерви, Џером Пауел.

Сојузниците на Трамп го преиспитуваат начинот на кој Пауел ги спроведува скапите реновирања во седиштето на централната банка како можна основа за негово отстранување пред да заврши неговиот мандат во мај 2026. Доколку Пауел биде разрешен, тоа би можело да предизвика распродажба на доларот и државните обврзници, предупреди стратегот на Дојче Банк, Џорџ Саравелос.

Глобални притисоци

Притисокот се зголемува глобално врз државниот долг, особено врз долгорочните обврзници. Во Јапонија, приносите скокнаа поради загриженоста за понатамошно трошење и намалување на даноците. Во Германија и Франција, приносите на долгорочните обврзници, исто така, се зголемија бидејќи инвеститорите бараат поголема премија за финансирање на зголемените владини трошоци за одбрана.

Јапонските избори и најавите на Трамп за царините за викендот беа непосредна причина за најновото зголемување. Тие предизвикаа загриженост за прекумерниот државен долг, премногу обврзници што излегуваат на пазарот и инфлацијата што е сè уште премногу присутна на развиените пазари низ целиот свет.

Додека приносите со пократок рок на достасување го следат патот на каматните стапки поблиску - и бележат помали движења поради очекувањата за намалувања - губењето на апетитот на долгиот крај од кривата на принос е подиректен одраз на стравот дека растечките купишта суверен долг низ целиот свет на крајот би можеле да достигнат пресвртна точка.

Приносите на американските 30-годишни обврзници се зголемија за повеќе од 20 базични поени од почетокот на месецот, приближувајќи се до 5 отсто, ниво кое последен пат беше достигнато на почетокот на јуни.

„Приносот на 30-годишната американска државна обврзница е околу 5% и веројатно повторно ќе се искачи,“ изјави Џорџ Бори, главен инвестициски стратег за фиксни приходи во „Олспринг Глобал Инвестментс“ (Allspring Global Investments), за Блумберг Радио во понеделникот. „Реалноста е дека фискалното трошење од страна на владите е многу распространето низ целиот свет, а вентилот за ослободување на притисокот е долгиот крај на кривата на принос.“

Во моментов нема коментари за веста. Биди прв да коментира...

Остави коментар