Анализа на инвестициските фондови и македонските блучипови - пет вести на денот

Викендот не е време за одмор кога станува збор за американскиот претседател Доналд Трамп и неговите закани за царини во повеќемесечната трговска војна што има тенденција да ги преобличи глобалните трговски односи. Овој пат, тој одлучи да воведе царини од 30 проценти за ЕУ и Мексико, посочувајќи дека ако земјите не успеат да преговорат подобри услови, новите царински стапки ќе сташат во сила на 1 август.

Мексиканската претседателка Клаудија Шајнбаум истакна увереност дека Мексико ќе се одбрани од новиот сет царини бидејќи разговорите за да се избегне најлошото сценарио веќе се во тек. „Имаме одредено искуство со овие работи веќе неколку месеци“, рече Шајнбаум. „И мислам дека ќе постигнеме договор со владата на Соединетите Американски Држави.“

Измеривме колку „тежат“ македонските блучипови: за пет години ја зголемиле вредноста за 130 отсто

Вкупната пазарна капитализација на членките на индексот МБИ10 за пет години е зголемена од 1,9 милијарда евра на 4,38 милијарди евра на крајот од 2024 година, или 130 отсто. Во првите два квартала од 2025 година пазарната капитализација на овие десет компании пораснала за уште минимални 1,82 отсто, односно на 30 јуни изнесувала 4,46 милијарди евра.

Пазарната капитализација на сите котирани компании на Македонската берза пораснала двојно или точно 97 отсто последниве пет години, за 30 процентни поени послабо во однос на блучиповите.  

Како работат домашните инвестициски фондови во 2025 година?

Нето-вредноста на средствата на отворените инвестициски фондови во Македонија пораснала за 52,3 отсто за една година, покажува извештајот на Комисијата за хартии од вредност.

Во првиот квартал од 2025 година порастот на вкупната нето-вредност на средствата на инвестициските фондови изнесува околу 28,5 милиони евра. Во јануари и февруари има месечно зголемување на нето-вредноста на средствата, додека во март е забележано намалување.

Викенд заканите на Трамп се нов тест за досега отпорните пазари

Финансиските пазари, кои се покажаа како прилично нечувствителни на заканите со царини од САД, ќе се соочат со нов тест на отворањето на овонеделното тргување откако претседателот Доналд Трамп прогласи царинска стапка од 30 проценти за Европската Унија и Мексико, која ќе стапи на сила на 1 август.

Трамп ги засили трговските мерки, ветувајќи дека повеќе и поголеми царини ќе стапат на сила за сите, од Канада до Бразил и Алжир, и поканувајќи ги трговските партнери на понатамошни преговори. И покрај предупредувањата, инвеститорите досега се однесуваа како да сметаат на тоа дека американскиот претседател ќе се повлече, откако претходно виделе такви пресврти од неговата администрација.

Иран ја разгледува понудата на САД за рестартирање на нуклеарните преговори

Иранскиот министер за надворешни работи изјави дека САД се обидуваат да ги обноват нуклеарните преговори со Техеран, нагласувајќи дека неговата земја не брза да продолжи со разговорите.

„Американците инсистираат да се вратат на преговарачката маса“, рече Абас Арагчи, додавајќи дека Иран добил „повеќе пораки“. Техеран ги разгледува своите можности во врска со времето, локацијата и структурата на потенцијалните разговори, но „не брза да влезе во непромислени преговори“. Арагчи беше главен преговарач во разговорите со САД под посредништво од Оман, кои пропаднаа откако Израел на 13 јуни започна изненадувачки напад врз нуклеарните постројки на Иран.

Слетувате во Истанбул? Останете на вашето седиште или следува казна

Додека авиокомпаниите се обидуваат да натрупаат што е можно повеќе седишта во авионот, тесниот метален труп на авионот може да биде клаустрофобичен. Затоа не е ни чудо што патниците сакаат да излезат што е можно побрзо, па некои од нив скокаат од своите седишта додека авионот сè уште се движи по пистата. Не обидувајте се да го правите тоа во Турција.

Државата предупредува дека ќе ги казни патниците што ги игнорираат упатствата на кабинскиот персонал со тоа што прерано ќе ги напуштат своите седишта. „Ги преземаме сите мерки на претпазливост, а потоа некој едноставно станува и почнува да оди пред авионот дури и да застане“, вели Ахмет Болат, претседател на „Туркиш ерлајнс“, главниот авиопревозник во земјата. „Порано, само се потпиравме на тоа колку луѓето имаат разбирање. Сега ќе се олесни работата на кабинскиот персонал. Сега тоа е закон“.