Се зголемуваат обложувањата за јулско зголемување на каматите пред инфлацијата во САД

Трговците со обврзници ги зголемија обложувањата дека американската централна банка ќе ги зголеми каматните стапки во јули, во пресрет на објавувањето на податоците за инфлацијата во САД и настапот на претседателот на Федералните резерви, кои би можеле дополнително да ја потврдат потребата од таков потег.

Очекувањата за повисоки каматни стапки се гледаат и на пазарот на опции поврзани со каматните стапки, каде што пазарната процена за веројатноста за зголемување од 25 базични поени во текот на овој месец порасна на околу 50 отсто, од помалку од 10 отсто претходно, како и на пазарот на американски државни обврзници. Приносот на двегодишната американска државна обврзница, кој е почувствителен на промените на каматната стапка на Фед отколку приносите на подолгорочните обврзници, и во вторникот остана над 4,25 отсто, надминувајќи ја референтната каматна стапка со сѐ поголема разлика.

„Јулската седница е реална можност за зголемување на каматните стапки“, изјави Ед Ал-Хусаини, портфолио-менаџер во „Колумбија Триднидл“ (Columbia Threadneedle), кој смета дека таков потег е поверојатен отколку спротивното. Иако мерката за инфлација на која цели Фед во мај изнесуваше 4,1 отсто, што е нешто пониско од индексот на потрошувачките цени, „ќе ни треба и малку среќа за бројките повторно да почнат да се движат кон два отсто“.

Приносот на двегодишната американска обврзница сѐ повеќе ја надминува референтната каматна стапка на Фед

Извор: Bloomberg

Овие движења дополнително се засилија откако гувернерот на Фед, Кристофер Волер, кој до неодамна важеше за еден од најумерените претставници на централната банка, изјави дека треба да се разгледа зголемување на каматните стапки „во блиска иднина“ доколку новите податоци за инфлацијата покажат „уште едно високо читање“ на базичната инфлација, односно инфлацијата без цените на храната и енергијата.

Податоците за индексот на потрошувачките цени за јуни, кои треба да бидат објавени во вторник во 8:30 часот по локално време во Вашингтон, според средните прогнози во анкетата на „Блумберг“, се очекува да го покажат првото забавување и на вкупната и на базичната инфлација од јануари наваму. Во мај тие изнесуваа 4,2, односно 2,9 отсто.

Сепак, трговците со обврзници сѐ повеќе стравуваат дека ќе бидат потребни повисоки каматни стапки за инфлацијата повторно да се приближи до целта на Фед од два отсто. Цените на нафтата го продолжија растот во вторникот, откако американските воени сили треба повторно да воведат блокада на сообраќајот кон и од иранските пристаништа и крајбрежни области. Американскиот претседател Доналд Трамп изјави и дека САД ќе продолжат со нападите врз Иран.

Неизвесноста дополнително ја засилува воздржаноста на претседателот на Фед, Кевин Ворш, да дава прогнози за идниот тек на монетарната политика. Ворш, кој ја презеде функцијата во мај, треба да сведочи пред Конгресот во вторник и среда, во рамките на полугодишниот извештај на централната банка за монетарната политика.

Пазарите на краткорочни каматни стапки целосно имаат вградено во цените едно зголемување на каматните стапки на Фед до крајот на годинава и уште едно до средината на 2027 година, што, според Ал-Хусаини, веројатно нема да биде доволно. Тој смета дека централната банка најверојатно ќе ги поништи сите три намалувања од по 25 базични поени што ги направи во последните четири месеци од минатата година како одговор на слабеењето на пазарот на трудот.

Веројатноста за такво сценарио се зголеми откако Ворш, говорејќи на симпозиумот на Европската централна банка во Синтра, Португалија, на 1 јули, укажа на неодамнешното намалување на инфлациските ризици.

Проекции за движењето на каматната политика на Фед

Договорите OIS укажуваат на две зголемувања на каматните стапки од по 25 базични поени до март 2027 година

 

Забелешка: Проекциите се засноваат на договори за прекуноќни индексни свопови (OIS) според датумите на одлуките на Фед/Bloomberg

Обложувањата за скорашно зголемување на каматните стапки на Фед нагло се зголемија и на пазарот на фјучерси на каматните стапки, што придонесе за раст на отворените позиции во августовските фјучерси на федералните фондови. Бројот на договори во кои трговците имаат отворени позиции се зголеми за околу 23 отсто во јули. Податоците за отворените позиции се објавуваат по затворањето на тргувањето, а поради активноста в понеделник се очекува тие дополнително да пораснат.

Се очекува извештајот за индексот на потрошувачките цени, CPI, да покаже пад на вкупното ниво на цените од 0,1 отсто во однос на мај, со што годишната стапка на инфлација би се намалила на 3,8 отсто од 4,2 отсто. Базичната инфлација, пак, според прогнозите, ќе се зголеми за 0,2 отсто во однос на мај, а на годишно ниво ќе изнесува 2,8 отсто.

Сепак, дури и ако податоците за CPI бидат пониски од очекувањата, тоа веројатно ќе донесе само ограничено олеснување на пазарот на обврзници. Приносот на двегодишните американски државни обврзници овој месец се зголеми за околу 10 базични поени, а приносот на десетгодишните за 15 базични поени, со што беа избришани годинашните добивки на пазарот, мерени преку индексот Bloomberg Treasury.

„Инвеститорите и натаму се фокусирани на седницата на Федералниот комитет за операции на отворен пазар (FOMC) на 29 јули како можен термин за првото зголемување на каматните стапки од страна на Ворш“, напиша во белешка Ијан Линген, директор за стратегија за американски каматни стапки во БMO (BMO Capital Markets).

Тој очекува уверувањето на пазарот дека Фед ќе ги зголеми каматните стапки во јули да ослабне по објавувањето на јунските податоци за инфлацијата и сведочењето на Ворш оваа недела, но смета дека тоа намалување ќе биде ограничено поради неподготвеноста на Ворш однапред да дава насоки за идната монетарна политика.

Според Линген, пазарот би можел и понатаму да вградува барем одредена веројатност за јулско зголемување на каматните стапки, дури и ако податоците за инфлацијата бидат поволни. Тој додава дека Фед може да ги изненади инвеститорите со зголемување на каматите, иако таквото сценарио нема да биде целосно пресметано во пазарните очекувања.