Најголемата светска криптоберза „Бајненс“ бележи нов деловен замав годинава, додека криптопазарот закрепнува поддржан од подобра регулатива и нови инвестициски инструменти. Можности за проширување на бизнисот гледаат и во регионот Адрија, кој го сметаат за погоден за развој на блокчејн и крипто.
„Регионот на поранешна Југославија претставува динамичен и ветувачки пејзаж за можности за бизнис во крипто и блокчејн-просторот. Во ’Бајненс’ ги препознаваме потенцијалот и различноста на овие пазари и сме оптимисти за можностите за раст и развој“, вели регионалниот директор на „Бајненс“, Кирило Хомјаков, за „Блумберг Адрија“.
Во одговорот преку е-пошта на прашањата за бизнисот во Србија и регионот, Хомјаков не прецизира кои услуги на „Бајненс“ моментално се достапни во овие области и кога тие би можеле да се подобрат. Сепак, тој нагласи дека компанијата, како светски лидер во оваа индустрија, секогаш ги истражува можностите за проширување на својата понуда и подобрување на пристапноста до корисниците низ светот.
„Од суштинско значење е градењето силни врски со локалните заедници. Со организирање настани, работилници и состаноци, ’Бајненс’ може директно да стапи во контакт со корисниците, да ги разбере нивните потреби и соодветно да ги приспособи услугите. Во блиска иднина ќе одржиме таков состанок во една од земјите од регионот“, најави тој.
Тој потсети дека остануваат посветени на зголемување на слободата во однос на парите на светско ниво. „Неодамна достигнавме пресвртница од 200 милиони корисници, возбудени сме што ќе продолжиме да растеме и се стремиме да достигнеме една милијарда корисници, работејќи заедно на понатамошно унапредување на блокчејн-индустријата“.
Споменатата пресвртница од 200 милиони корисници доаѓа пред седмата годишнина на „Бајненс“ во јули. Извршниот директор Ричард Тенг неодамна ја опиша оваа година како значајна година за криптоиндустријата, благодарение на поголемата регулаторна јасност во секторот и лансирањето фондови со кои се тргува на берза, а кои инвестираат во биткоин.
Ричард Тенг/Блумберг
Биткоин ЕТФ-овите (англ. exchange-traded fund - фонд со кој се тргува на берза) во Соединетите Американски Држави (САД) беа одобрени во јануари, а деновиве набљудувачите на пазарот чекаат да започнат со тргување со такви финансиски производи и за етер.
Да потсетиме дека Тенг ја презеде функцијата извршен директор откако Чангпенг Жао поднесе оставка од истата функција минатата година. Ова доаѓа откако Жао и „Бајненс“ се изјаснија за виновни пред американските власти за неусогласеност со прописите за спречување на перење пари и санкции. Порамнувањето вклучуваше казна од над четири милијарди долари. Според процените на „Блумберг“, Жао останува најголемиот акционер на „Бајненс“, со нето-богатство од 41,9 милијарда долари, што го прави најбогатиот затвореник во САД, каде што отслужува четиримесечна затворска казна.
Чангпенг Жао/Блумберг
И покрај правните предизвици, Тенг се пофали дека средствата од клиентите на берзата на „Бајненс“ годинава пораснале за 42 милијарди долари, бидејќи цените на криптовалутите заздравуваат, при што биткоинот достигна ново рекордно високо ниво од речиси 74.000 долари во март. Според податоците од аналитичката платформа „Дефилама“, „Бајненс“ има повеќе од 110 милијарди долари средства на својата берза.
Кога станува збор за правните прашања, кои остануваат едни од клучните во сè уште младиот криптосектор, Хомјаков рече дека тие континуирано ја следат регулативата за да обезбедат усогласеност и да ја приспособат нивната понуда на локалните правни рамки.
„Позитивниот регулаторен развој може дополнително да ги подобри деловните можности во регионот“, наведе тој во своите одговори за „Блумберг Адрија“.
Bloomberg
Тој додаде дека земјите од поранешна Југославија се пазари во развој со зголемен интерес за дигитални средства и блокчејн-технологија. „Стапката на усвојување на криптовалути расте, обезбедувајќи плодна почва за проширување на нашите услуги“.
Дополнително, тој оцени дека регионот може да се пофали со млада и технолошки упатена популација, која сака да ги прифати новите технологии.
„Оваа демографија е многу приспособлива на дигиталните иновации, што го прави идеален пазар за усвојување криптовалути и блокчејн-апликации. На територијата на поранешна Југославија има сè поголем фонд на таленти меѓу програмерите, претприемачите и иноваторите. Тие таленти можат да почнат локални блокчејн-проекти и да придонесат за глобалната криптоекономија. ’Бајненс’ има цел да ги поддржи и да соработува со регионалните таленти за поттикнување на иновациите“, рече Хомјаков.
Според него, образованието е камен-темелник на пристапот на „Бајненс“.
„Преку ’Бајненс академијата’ и партнерства со локалните образовни институции, имаме цел да ги зголемиме свеста и разбирањето за блокчејн-технологијата и нејзините придобивки. Тоа помага да се изгради заедница со знаење и вештини за ефективно користење на нашата платформа и услуги“, заклучи тој.
.webp){kind=icon}
Во моментов нема коментари за веста. Биди прв да коментира...