Трговците повеќе се плашат да не ја пропуштат заработката отколку од царините

Паузата на царините на претседателот Доналд Трамп истекува на 9 јули, а при тоа се постигнати малку договори и има скромен напредок во преговорите. Сепак, берзата – која некогаш силно реагираше на трговски вести – сега гледа мал ризик: индексите се близу рекордни нивоа, а нестабилноста е речиси исчезната.

Зошто е толку мирно?

Дел од смиреноста произлегува од очекувањата дека Трамп повторно ќе го продолжи рокот, следејќи ја својата шема „закани се остро, па потоа попушти“ – стратегија што аналитичарите ја викаат „TACO“ (Trump Always Chickens Out – Трамп секогаш се премислува). Но уште поважно, професионалците на Волстрит немаат намера да се борат со пазарниот замав додека економијата е здрава, а корпорациска Америка се приспособува на трговските политики – барем засега.

„Сè уште има одреден фокус на 9 јули, но денес се следат и многу други фактори“, вели Мајкл Кантровиц, главен инвестициски стратег во „Пајпер сандлер“. „Инвеститорите повторно се малку загрижени. Додека не скокнат каматните стапки, инфлацијата или невработеноста, акциите ќе продолжат полека да растат“.

Bloomberg

S&P 500 индексот штотуку го заврши својот најдобар квартал од декември 2023 и накратко ја проби границата од 6 200 поени, пред во вторникот да падне назад и да затвори со – 0,1 отсто. Nasdaq 100, доминантно технолошки индекс, имаше најдобар квартал од март 2023, бидејќи познатите лидери на пазарот повторно застанаа на чело. И двата индекса запишаа загуби во првиот квартал.

Во меѓувреме, трговците ги зголемија вложувањата во најризичните сегменти на пазарот. Дури и институционалните инвеститори – кои најчесто стоеја на страна од април досега – постепено се враќаат. Податоците за тргувањето со опции, пак, покажуваат дека Волстрит не очекува значителна нестабилност во скоро време.

Паметниот капитал се вклучува

„Веројатно ќе има некакви трговски договори, а во меѓувреме, процените за добивките се стабилизираа по нивниот пад веднаш по април“, изјави Стивен Чиавароне, висок портфолио менаџер и стратег за акции во „Федереитед Хермес“, во интервју за ТВ Блумберг во понеделникот. „Она што почна како обичен раст поради олеснување, почнува да се претвора во нешто реално – и токму тоа ги вовлекува инвеститорите – полека и неволно.“

Двоцифрениот скок на S&P 500 од неговото дно на 8 април – непосредно пред Трамп да ја паузира царинската мерка – најмногу беше поттикнат од малите инвеститори. Но сега, така наречените „паметни пари“ (институционални и професионални инвеститори) почнуваат да се приклучуваат, бидејќи растот сè уште не покажува знаци на запирање.

Според податоците на Параг Тате од „Дојче банк“, систематските стратегии минатата недела го зголемиле своето изложување кон акции, иако и натаму остануваат потпросечно позиционирани, со удели во повеќето сектори под историскиот просек.

Според процената на Мајкл Кантровиц од „Пајпер сандлер“, пазарите веќе „исклучиле“ 84 отсто од макроекономскиот ризик, оставајќи простор за акциите дополнително да растат, и покрај тоа што S&P 500 додаде над 10 трилиони долари пазарна вредност од почетокот на април. Оптимизмот не падна дури и по војната на Блискиот Исток, неизвесната макроекономска перспектива и нејасностите околу трговската политика.

„Бевме доста оптимисти за јуни, и тоа поради работи што немаат врска со Трамп – туку поради други позитивни фактори“, рече Александар Алтман, глобален шеф за тактички стратегии во „Берклис“. Тој ги наведе дерегулацијата на банкарскиот сектор, континуираното инвестирање на големите технолошки компании во вештачка интелигенција и даночно-фискалниот пакет на Трамп вреден 3,3 трилиони долари како фактори што ја поддржуваат економијата.

Сенатот го усвои законот во вторникот со 51 спрема 50 гласа, при што потпретседателот Џеј Ди Ванс го даде одлучувачкиот глас. Но, законот сè уште може да се соочи со отпор во Претставничкиот дом.

Секако, сето ова не значи дека ризиците на пазарот исчезнале. Дури и ако Трамп ја продолжи паузата за царините, има и други давачки што веројатно ќе ги зголемат трошоците за компаниите, за потрошувачите — или за обете страни.

Умерен ентузијазам

„На крајот, сепак ќе завршиме со високи царински стапки и ќе мораме да ги апсорбираме тие трошоци во некој момент во иднина“, изјави Александар Алтман. „Ова е пазар во кој во моментов е многу тешко да се тргува со визија подалеку од четири недели. И многу е тешко да се има цврст став за настани кои можеби ќе се случат, а можеби и не, за шест месеци“.

Според моменталната состојба, земјите извознички што немаат билатерален договор до 9 јули, ќе се соочат со царините предложени од Трамп на 2 април, кои се многу повисоки од тековната основна стапка од 10 отсто, позната како „реципроцитетна стапка“ што важи за повеќето држави.

Обединетото Кралство постигна договор со кој се намалија дел од предложените давачки, но се задржа реципроцитетната стапка и остана нерешен еден од главните проблеми на Британија – 25 отсто царина на челик.

Со Кина, пак, според американскиот секретар за трговија Хауард Латник, е финализиран трговскиот договор од Женева, но тој истакна дека се работи за далеку од сеопфатен договор, со многу клучни прашања што сè уште остануваат отворени. Трамп во меѓувреме се закани со зголемување на царините за Јапонија.

„Немаме никакви значајни трговски договори — имаме некои меморандуми за разбирање, некое усогласување за натамошни чекори, но ништо конкретно“, изјави Кејт Мур, главен инвестициски директор на одделот за управување со богатство во „Ситигруп“. „Искрено кажано, изненадена сум што пазарот изгледа како да не се грижи за ова. Тоа е една од причините зошто ова не ми личи како пазар што е воден од фундаментални фактори, и покрај тоа што гледаме многу сила во технологијата и вештачката интелигенција“.

Во исто време, трговскиот оддел на „ЏП Морган“ смета дека пазарната конфигурација е позитивна, со проекција на низа рекордни нивоа, бидејќи добивките носат позитивен импулс, а се очекува објавување на трговски договори.

Андру Тајлер, шеф во банката, внимава на извештајот за невработеност надвор од земјоделскиот сектор кој ќе биде објавен во четврток. Ако бројката остане над 100.000, очекува пазарот да бележи нови рекорди. Според анкета на „Блумберг“ меѓу економистите, се очекува резултатот да изнесува 110.000.

„Засега, пазарот ќе ги игнорира тие потенцијални настани“, напиша Тајлер во белешката до клиентите во понеделникот, мислејќи на трговските турбуленции. „Дополнително, сметаме дека рокот 9 јули ќе биде одложен за да се избегне нестабилност на пазарот“.