S&P 500 на чекор до врвот, но неизвесноста околу заработките влева претпазливост

Индексот S&P 500 се наоѓа на чекор од рекордната вредност, но со оглед на тоа што сезоната на објавување квартални резултати почнува за неколку недели, темелите на актуелниот раст на пазарот наскоро ќе бидат сериозно тестирани.

И покрај постојаните загрижености околу царините, Волстрит очекува дека профитот на компаниите во индексот во вториот квартал ќе порасне за само 2,8 проценти на годишно ниво, според податоците на „Блумберг интелиџенс“. Тоа би бил најслаб раст во последните две години. Дополнителна причина за загриженост е фактот што пораст на добивката се очекува во само шест од вкупно 11 сектори на S&P 500, што е најмал број уште од првиот квартал од 2023 година, според процените на „Јардени рисрч“.

Ваквите бледи прогнози дополнително ги засилуваат предупредувањата за одржливоста на растот на акциите. Некои аналитичари предупредуваат дека вреднувањата се веќе пренадувани и дека за нивно оправдување ќе бидат потребни или исклучително добри заработки или драстично намалување на каматните стапки од страна на Федералните резерви. Техничката анализа покажува дека индексот би можел да падне во наредните месеци доколку закрепнувањето не го поддржат повеќе сектори.

„Постојан реален ризик за растот на пазарот“, вели Сара Хант, главен стратег во „Алпин вуд капитал инвесторс“. „Заработките се клучен двигател на пазарот, а главното прашање е дали падот во одредени сектори ќе го надмине растот во други.“

Bloomberg

Главната причина за песимистичките прогнози се глобалните царини, кои би можеле сериозно да влијаат на резултатите на компаниите во сезоната на заработки што започнува на средината на јули. Некои компании веќе издаваат предупредувања: „Федекс“ оваа недела соопшти дека очекува послаб профит од прогнозираното и не даде насоки за остатокот од годината, повикувајќи се на „неизвесната глобална побарувачка“. Сличен став изрази и „Генерал милс“, кој најави пад на приспособениот профит бидејќи потрошувачите под притисок на царини и геополитички тензии бараат поевтини алтернативи.

Енергетиката на удар

Аналитичарите очекуваат дека енергетскиот сектор ќе забележи најголем пад на профитот во вториот квартал — дури 25,5 отсто на годишно ниво, според податоците на „Јардени рисрч“. Првпат по десет квартали, секторот за дискрециска потрошувачка не би требало да прикаже раст на добивка.

„Потрошувачката генерално забавува, бидејќи пазарот на труд слабее, расте неизвесноста околу тарифите, а последните импулси од постковид-одмаздничката потрошувачка исчезнуваат“, пишува Рос Мејфилд, инвестициски стратег во „Баирд“.

Сепак, некои аналитичари сметаат дека процените се прениско поставени. „Во последните неколку недели, аналитичарите престанаа да ги намалуваат прогнозите, и не би се изненадил ако почнат да ги зголемуваат“, вели Ед Јардени, претседател на „Јардени рисрч“. „Веќе се пооптимистични за 2026 година.“

Според зборовите на Сем Стоувал, главен инвестициски стратег во ЦФРА, компаниите вешто управувале со очекувањата, така што послабите резултати можеби веќе се вклучени во цените на акциите.

Сепак, дури ни солидни квартални резултати можеби нема да бидат доволни за да ја смират загриженоста околу царините. Иако во првиот квартал многу американски, европски и кинески компании пријавија подобри резултати од очекуваното, многу од нив ги повлекоа годишните насоки или дадоа претпазливи прогнози, наведувајќи растечки трошоци, слаба потрошувачка и пад на довербата поради трговските тензии.

Истражување на „Бизнис раундтејбл“ од јуни, спроведено меѓу 169 главни извршни директори, покажа пад на очекувањата и плановите за следните шест месеци, бидејќи ситуацијата со царините сè уште не е расчистена. Инвеститорите би можеле да се смират дури кога компаниите конкретно ќе покажат како управувале со трговските турбуленции во април и мај.

„Компаниите сè уште немаат јасна слика за целосното влијание на тарифите, а сè повеќе од нив ги намалуваат прогнозите за 2025 година, бидејќи е тешко точно да се процени колку трошоците ќе им ги нагризат профитните маржи“, вели Венди Сунг, аналитичарка во „Блумберг интелиџенс“.