Истражување: Сопствениците на крипто често имаат психопатски особини

Ако некогаш сте се посомневале дека вашиот пријател што е опседнат со крипто можеби е психопат, можно е и да не сте во заблуда.

Сопствениците на дигитални средства имаат тенденција да покажуваат повисоки нивоа на „мрачни“ особини на личноста, како нарцизам, макијавелизам, психопатија и садизам, според неодамнешен академски труд на истражувачите од Универзитетот во Торонто и Универзитетот во Мајами, објавен во списанието „Плос уан“ (PLOS One).

„Резултатите презентирани овде сугерираат дека сопственоста на криптовалути е поврзана со неколку ненормативни и веројатно неприспособливи карактеристики“, се наведува во извештајот, додавајќи дека „поединците што купуваат крипто, во просек, имаат поголема веројатност да веруваат во теории на заговор, да поддржуваат екстремистички групи и да споделуваат популистички чувства“.

Студијата, во која беа анкетирани 2.001 возрасен Американец, забележа дека сопствениците на крипто имаат тенденција да добиваат повисоки резултати во однос на мерките за потреба од хаос, параноја, шизотипски атрибути, догматизам, менталитет на жртва и психолошка реакција, што е клинички термин за мотивации предизвикани од чувства дека личните слободите се изгубени. Нешто помалку од 30 отсто од испитаниците во истражувањето рекле дека поседуваат или поседувале крипто.

Речиси се подразбира дека има многу примери на „мрачни“ особини на личноста и во традиционалниот корпоративен свет. Иако оваа студија е прва од ваков вид што извлекува заклучоци помеѓу сопствениците на криптовалути и психолошките особини, други обезбедија врски помеѓу психопатијата и наметливото корпоративно лидерство. Еден труд од 2014 година, објавен во „Елсвиер“ (Elsevier), откри значајна врска меѓу оцените на вработените за особини на психопатија кај нивните претпоставени и психолошката вознемиреност кај самите работници односно нивното задоволство од работата.

Врз основа на барем анегдотски докази, хумористичното самоомаловажување е исто така вообичаена особина на криптофанатиците што ги доживеале сите подеми и падови на пазарот, измами и скандали. Па така, некои трговци со голема брзина ја присвојуваат етикетата на психопат.

 

 

На пример, заклучоците од студијата не беа изненадување за Крис Вилер, 57-годишен трговец со крипто.

„Буквално треба да си луд за да се вклучиш во нешто каде што вашата нето-вредност се зголемува за милион и се намалува за еден милион за еден ден“, рече Вилер. „Ништо не е загарантирано“.

Во 2021 година цената на биткоинот се искачи на речиси 69.000 долари пред да потоне под 16.000 долари во 2022 година и потоа да се врати на врвот на сите времиња од речиси 74.000 долари годинава. Во текот на последните неколку години индустријата за дигитални средства беше погодена од многу фактори, од лидери во индустријата што беа осудени за измама до претседателскиот кандидат Доналд Трамп, кој промовираше стратегиски национални резерви на биткоин.

Најсилните карактеристики за тоа дали некој поседува криптовалути вклучуваат варијабли како што се да се биде маж, да се има ментален склоп на жртва или да се потпира на маргинални извори на социјалните мрежи за вести, напишаа истражувачите.

Секако, примерокот на учесници во студијата беше релативно ограничен, а на анкетираните им беше кажано да ги пријават своите карактеристики. Но неговите заклучоци сè уште резонираат.

„Наречете нè како сакате“, рече Вилер. „Ние го предводиме патот“.