Токените на „Робинхуд“ за приватни акции привлекуваат инвеститори, но и критики

„Робинхуд маркетс“ (Robinhood Markets Inc.) во понеделникот, на 30 јуни, започна да нуди „токенизирани“ акции – верзија на акции на компанијата за криптовалути, надевајќи се дека во Европа ќе воведе нова, 24/7 ера на тргување со акции базирана на блокчејн технологија, којашто на крајот треба да мигрира во САД.

Повратниот ефект беше брз. Два дена по дебито, кое беше придружено со споделување на токени на „Опен еј-ај“ во вредност од еден милион долари, компанијата ги предупреди клиентите на „Робинхуд“ да не ги купуваат хартиите од вредност. Кратко потоа, Банката на Литванија, примарниот регулатор на „Робинхуд“ во ЕУ, испрати прашања до брокерската куќа.

Хестер Пирс, која ја предводи работната група за крипто на Комисијата за хартии од вредност на САД и која се смета за најголем заговорник за блокчејн во агенцијата, се осврна пошироко на новата технологија, предупредувајќи дека американските производи што вклучуваат токенизирани хартии од вредност треба да ги следат законите за хартии од вредност. Таа нагласи дека „магичните способности“ на блокчејн не ја менуваат основната природа на средството. „Иако токенизацијата базирана на блокчејн е нова, процесот на издавање инструмент што претставува хартија од вредност не е“, рече Пирс, која е назначена од американскиот претседател Доналд Трамп. „Важат истите законски барања.“

Со тоа што ги стави на располагање токенизираните акции на своите 150.000 квалификувани клиенти во Европа, „Робинхуд“ го привлече вниманието кон акциите базирани на блокчејн. Досега, токенизираните акции беа во голема мера ограничени на европски крипто берзи или мали проекти. Во САД тие остануваат во регулаторна неизвесност, а брокерските куќи таму сè уште не ги ставиле на располагање - иако неколку, вклучувајќи го и „Робинхуд“, се заинтересирани да се обидат.

„Робинхуд“ не кажува колку од неговите европски клиенти досега ги купиле новите хартии од вредност. Покрај токенизираните акции во „Опен еј-ај“, компанијата, исто така, подели и токени на „Спејс икс“ во вредност од 500.000 долари, дел од обидот да се покаже како технологијата би можела да го отклучи пристапот и за приватни компании.

Тоа е атрактивен предлог. Според една мерка, проценките на компаниите со ограничена сопственост пораснаа повеќе од пет пати побрзо од индексот S&P 500 во текот на изминатата година: Индексот Unicorn, којшто е референтна вредност за приватните фирми, до 9 јули се зголеми за околу 70 проценти. Но, тие добивки беа ограничени само на богати инвеститори или институции.

Точно е дека „Робинхуд“ со ова ги задоволува барањата на своите малопродажни клиенти, но и дека е комплицирано и контроверзно. Токените се всушност деривативни договори врзани за проценката на „Робинхуд“ за цената на основните акции на приватната компанија, посочува фирмата во ситен фонт во известувањето за инвеститорите од ЕУ, и „не гарантира дека нејзината хеџирана изложеност во однос на токените на приватните акции ќе биде 1:1 во однос на основните средства на приватните акции“.

„Опен еј-ај“ го нагласи тој момент минатата недела во објава преку социјалната мрежа X и ги повика инвеститорите да „бидат внимателни“. Некои набљудувачи од индустријата забележаа дека е нереално да се ветува точна цена на приватните акции 24 часа на ден. Други се пожалија дека токените ја намалуваат вредноста за акционерите, особено во компаниите кои сè уште не котираат на берза.

„Императивот за демократизација на приватните пазари и давање на малопродажните инвеститори исти можности како и на институционалните инвеститори е реален“, рече Џонатан Шафер, главен извршен директор на „Фишн лабс“ (Fission Labs), децентрализирана финансиска платформа која овозможува пристап до ризичен капитал за инвестиции. „Но, треба да се запрашаме дали дериватите завиткани како токени го решаваат основниот проблем со пристапот.“

Извршниот директор на „Робинхуд“, Влад Тенев, се осврна на загриженоста на социјалните медиуми во интервјуто во вторникот за „Блумберг ТВ“. Фирмата актиелно работи на одговарање на прашањата од Банката на Литванија. „Иако токените технички не се акции, тие им даваат на приватните инвеститори изложеност на тие приватни средства“, напиша Тенев на X.

Фирмата не ја забавува својата амбиција. „Робинхуд“ цели да има „илјадници приватни компании на платформата“, рече Тенев за време на телевизиското интервју, и да донесе токени од приватни компании во САД, каде што „можноста е преголема за да се игнорира“.

 

- Текстот е напишан со помош од Емили Никол и Метју Грифин.
 

Во моментов нема коментари за веста. Биди прв да коментира...

Остави коментар