Биткоинот достигна рекордни 120.000 долари

Биткоинот ја надмина вредноста од 120.000 долари, додека оптимизмот меѓу инвеститорите сè повеќе расте, откако криптовалутата излезе од тесниот опсег на тргување, што ги натера скептиците да се прашуваат дали ќе ја повтори силната динамика од почетокот на годината, кога поставуваше нови рекорди.

По силниот скок предизвикан од реизборот на Доналд Трамп за претседател на САД, биткоинот ги мина месеците со осцилации околу границата од 100.000 долари. Загриженоста за политичките и економските потези на Трамп го ублажи ентузијазмот што го предизвика неговиот проруски и прокрипто став. Меѓутоа, сега, кога други ризични облици на имот, како акции, се повторно блиску до рекордни нивоа, биткоинот продолжува со својот раст.

„Оваа промена укажува на поподготвен и зрел поглед кон биткоинпт - не само како шпекулативен имот туку и како макроекономска заштита и структурно ограничен начин за зачувување на вредноста“, изјави Џорџ Мандрес, трговец во компанијата ХБТО (XBTO Trading LLC). Според него, зголемениот оптимизам кон ризичните инвестиции на берзите, заедно со значителните институционални приливи во спот берзанските фондови за биткоин и етереум, го поттикнал овој постепен раст, кој се разликува од претходните циклуси, кои беа обележени со нагли осцилации во цената.

Bloomberg

Водечката криптовалута порасна за 1,9 отсто, достигнувајќи 121.344 долари, што го носи вкупниот раст од декември на околу 30 отсто. Во текот на минатата година биткоинот ја удвои својата вредност. Обновениот налет на биткоинот се прошири и на помалите токени – второпласираниот етер порасна за 1,5 отсто, додека ХРП (XRP) и солана (Solana) забележаа раст од околу 2,7 отсто во понеделникот напладне во Сингапур.

„Биткоинот го проби нивото од 120.000 долари, но вистинскиот тест е нивото од 125.000 долари“, изјави Рејчел Лукас, криптоаналитичарка во компанијата БТЦ (BTC Markets). Иако краткорочно се очекува остварување профит, „растечкиот тренд има сила“, додаде таа, поттикнат од силната побарувачка за фондови што се тргуваат на берза (ЕТФ). Според неа, „поддршката на 112.000 долари и секој пад изгледа повеќе како можност за купување отколку за прекин на трендот“.

Еден од факторите што го поддржаа најновиот раст беше ликвидацијата на песимистичките облози за криптовалутите кон крајот на неделата. Трговците што се обложиле на пад на биткоинот претрпеа најголеми удари – според податоците на платформата „Коинглас“ (Coinglass), повеќе од милијарда долари беа збришани од позициите.

Вредноста на токените порасна и благодарение на очекувањата за настанот што е наречен „Недела на криптовалутите“ во САД, за време на кој е предвидено законодавците да расправаат, а можеби и да гласаат за клучни закони во врска со дигиталните средства.

Меѓутоа, некои аналитичари не се целосно уверени во продолжување на растот на биткоинот. „Според моето мислење, ова не е раст базиран на макроекономски фактори, туку изолиран настан“, изјави Николај Сондергаард, истражувачки аналитичар во компанијата „Нансен“ (Nansen). „Сепак, не се менува фактот дека политичките потези во САД, како што се фискалното проширување и очекувањата за понатамошно олеснување на монетарната политика, создадоа амбиент што несомнено е поволен за биткоинот“.