„Голдман Сакс“ не гледа закана за доминацијата на доларот по поддршката за јенот

Американската поддршка за напорите на Јапонија да го зајакне јенот веројатно нема да му наштети на статусот на доларот како најдоминантна резервна валута во светот, наведува „Голдман сакс“ (Goldman Sachs Group Inc.).

Јапонија е најголемиот странски инвеститор на пазарот на американски државни обврзници вреден 31 илјада милијарди долари, а минатомесечната заедничка интервенција на девизниот пазар предизвика одредена загриженост дека американската поддршка за јенот - веројатно насочена кон спречување несакана нестабилност кај американските обврзници - би можела да ја поткопа довербата во доларските резерви. Таквиот аргумент претпоставува дека САД во иднина би можеле да се обидат да ги спречат другите да продаваат американски државни обврзници, соопшти „Голдман“.

„Ова изгледа како прилично голем логички скок“, напишаа стратезите, меѓу кои и Мајкл Кехил, во белешка. „Скептични сме кон аргументите дека ова е негативно за статусот на доларот како резервна валута.“

Банката укажа на пристапот на Јапонија до репо-механизмот на Федералните резерви за странски и меѓународни монетарни власти - ФИМА (FIMA), кој им овозможува на странските централни банки да обезбедат долари користејќи ги своите американски државни обврзници како обезбедување, без да мора да ги продаваат. Според банката, тоа нагласува една од клучните предности на доларот: длабоки пазари на капитал за создавање резерви во нормални услови и пристап до ликвидност во периоди на стрес.

„Веруваме дека активностите на американското Министерство за финансии, како и достапноста и корисноста на механизмот ФИМА, помагаат да се покаже дека во моментов никој друг не може ни приближно да се натпреварува со корисноста на американскиот долар, неговите мрежни ефекти и инфраструктурата што го поддржува“, додаваат стратезите.

Доларот паѓа и покрај тоа што приносите во САД се блиску до повеќегодишни максимуми

Извор: Bloomberg

Заедничката кампања на Вашингтон и Токио за зајакнување на јенот е прва од ваков вид во речиси три децении. Иако интервенцијата беше спроведена преку еврото за да се избегне нарушување на пазарот на американски државни обврзници, некои инвеститори изразија загриженост дека директната американска поддршка за јенот би можела ненамерно да го ослаби доларот и да ја намали привлечноста на американските обврзници како резервни средства.

Начинот на кој беше спроведена интервенцијата, исто така, привлече внимание. „Фајненшл тајмс“ (Financial Times) објави дека САД минатата недела ја затекнале Европската централна банка неподготвена, информирајќи ги претставниците во Франкфурт дури откако продале евра за да купат јени.

Што велат стратезите на „Блумберг“...

„Факторите што стојат зад движењата на доларот и пазарот на обврзници се чини дека се подлабоко вкоренети. За доларот, ефектите од заедничката американско-јапонска интервенција кај јенот се уште еден голем катализатор.“

-Кристин Акино, главна уредничка на Маркетс Лајв 

Оттогаш, јенот загуби речиси половина од добивките остварени благодарение на интервенцијата и во петокот во Азија се тргуваше околу 158,34 јени за долар. Индексот на Блумберг за доларот оваа недела се намали за 0,1 отсто.

Тоа не значи дека „Голдман“ не гледа ризици за доминацијата на доларот. Стратезите признаа дека неизвесноста околу политиките може да влијае врз неговата глобална улога - загриженост што беше во центарот на нивниот негативен став за доларот во 2025 година. Но, тие рекоа дека поврзувањето на тие ризици со американската поддршка за јенот е претерано.

Банката наведе дека постојат претходни случаи во кои земји ги користеле своите вложувања во американски државни обврзници за да ги поддржат сопствените валути, без тоа да предизвика приговори од Вашингтон. Во март, на пример, неколку земји продадоа значителни количества американски државни обврзници за да ги поддржат своите валути во услови на знаци на пазарни тензии.

„Сметаме дека ваквите епизоди на принудна продажба всушност помагаат со текот на времето дополнително да се зацврсти улогата на доларот“, напишаа стратезите.