Доларот го враќа статусот на засолниште од нестабилноста на акциите

Доларот и американските акции се во најголема обратна корелација во речиси една година, што ја потврдува типичната врска меѓу имотот поврзан со статусот на доларот како сигурно прибежиште.

Индексот на доларот на „Блумберг“ се зголеми за речиси два процента откако кон крајот на минатиот месец изби војната на Блискиот Исток, додека индексот S&P 500 падна за повеќе од два процента. Тоа ја доведе краткорочната корелација до најниско ниво од почетокот на 2025 година.

Стратезите го припишуваат ова на врската помеѓу доларот и растечките цени на суровата нафта, што им помогна на САД како водечки светски производител на нафта. Ако трендот продолжи, тоа ќе му помогне на доларот да функционира како важен инструмент за трговците што сакаат да ја заштитат својата изложеност во портфолијата  - улога што доларот со месеци се обидуваше да ја исполни.

„За некои големи инвеститори, најважен фактор е корелацијата“, вели Ендру Ватрус, стратешки аналитичар за валути во Групата 10 на „Морган Стенли“ (Morgan Stanley). Во последните две недели „постоеше многу изразена негативна корелација помеѓу доларот и акциите“.

Доларот со години се движеше обратнопропорционално од американските акции, при што инвеститорите ја купуваа валутата кога апетитот за ризичен имот опаѓаше и обратно. Лани овој однос се промени, откако воведувањето универзални царини од претседателот Доналд Трамп во април предизвика масовна продажба на американски средства и доларот имаше најлоши резултати во првата половина на годината од 1970-тите.

Едни од клучните причини за враќање на корелацијата беа позицијата на САД како водечки светски производител на нафта и улогата на доларот како валута за глобална трговија со сурова нафта, со зголемувањето на цените на ВТИ (West Texas Intermediate) за повеќе од 40 проценти, што ја зголеми побарувачката за американската валута.

„Една валута од Г10, која е и сигурно прибежиште и поврзана со енергетска економија, е американскиот долар. Интуитивно е доларот да порасне“, вели Ватрус од „Морган Стенли“.

Истовремено, растот на цените на нафтата ја оживеа загриженоста за инфлацијата и ги поттикна инвеститорите да ги ревидираат очекувањата за тоа колку Федералните резерви можат да ги намалат каматните стапки, што го оптовари пазарот на акции. Стратезите од „Дојчебанк“ минатата недела забележаа дека обратната корелација помеѓу S&P 500 и цените на нафтата била „практично совршена“.

Покрај зголемените трошоци за енергија, доларот доби поддршка од американските инвеститори што враќаат средства дома поради геополитичката неизвесност, вели Боб Саваж, раководител на макростратегија на пазарите во БНЈ (BNY).

Сепак, тешко е да се предвиди колку долго ќе трае статусот на доларот како сигурно прибежиште, особено ако цените на нафтата брзо се намалат и повторно ги насочат инвеститорите кон царините, американските фискални проблеми и други фактори што претходно влијаеја на валутата. Алтернативното сценарио предвидува продолжен конфликт, кој ги одржува високите цени на нафтата и ја забавува американската економија, што на крајот би ја ослабело валутата.

„Движењето на цените беше убедливо позитивно за доларот, но тешко е да се процени колку од тоа беше предизвикано од покривање на краткорочните позиции, а колку означува почеток на нов одржлив растечки тренд“, велат од „Блумберг интелиџенс“.