Организацијата на земји извознички на нафта и нејзините сојузници (ОПЕК+) ќе го одржи состанокот на 4 декември преку Интернет, што е промена на планот за собирот што требаше да се одржи со физичко присуство во Виена, информираат луѓе запознаени со ситуацијата. Се очекува дека тоа ќе бидат значајни разговори за групата, со оглед на тоа дека нафтата избриша најголем дел од своите добивки за годинава поради ризикот од рецесија на Западот и немирите во Кина поради нејзините политики на нулта ковид.
Вчера се појавија некои прогнози дека групата може повторно да го намали производството. Но откако се донесе одлуката за онлајн состанок, некои набљудувачи на ОПЕК ги минимизираа очекувањата за промена на политиката.
„Одлуката на ОПЕК за состанок од далечина го зголемува фокусот на понеделник, кога Европската Унија воведува забрана за најголемиот дел од увозот на руска сурова нафта. Тие санкции станаа главниот настан на пазарот на нафта на крајот на годинава“, рече Хелима Крофт, главен стратег за суровини во РБЦ (RBC).
На нивниот последен состанок во октомври, првиот што се одржа со лично присуство по пандемијата, претставниците на ОПЕК+ се договорија за изненадувачко намалување на производството за два милиона барела дневно. Пазарот оттогаш се влоши до тој степен што делегатите во понеделникот рекоа дека групата може да разговара за дополнително намалување на состанокот на 4 декември.
Ријад веќе му испрати на пазарот невообичаено јасен сигнал пред состанокот. Минатата недела, саудискиот министер за енергетика, принцот Абдулазиз бин Салман, рече дека ОПЕК+ е подготвена да интервенира со дополнително намалување на понудата доколку има потреба да се балансира односот меѓу понудата и побарувачката.
Од 17 трговци и аналитичари анкетирани од „Блумберг“ оваа недела, десетмина очекуваа ново намалување на понудата, со процени што се движат од 250.000 до два милиона барела дневно. Реакцијата на цената на нафтата сугерираше дека овие очекувања ќе се ревидираат, бидејќи суровата нафта од типот брент ги избриша претходните добивки и се тргува на ниво од околу 84 долари за барел.
„ОПЕК+ сака да види како нејзините неодамнешни кратења на испораките помагаат да се намали преоптоварувањето, особено со доаѓањето на ембаргото на ЕУ“, рече Амрита Сен, главен нафтен аналитичар и коосновач во „Енерџи аспектс“ (Energy Aspects Ltd).
.webp){kind=icon}
